გავრცელებული ინფორმაციით, ოზურგეთის მუნიციპალიტეტის მერის, ავთანდილ თალაკვაძის ერთ-ერთ მოადგილის პოსტზე დანიშვნა ნინო შეწირულს სურს.
ასევე ამბობენ იმასაც , რომ მას სეს-ის გურიის რეგიონული სამსახურის უფროსის პოსტზე დაბრუნებაც სურს, საიდანაც წასვლაზე, ორი წლის წინ, თავად დაწერა განცხადება. მისი წასვლა მაშინ ფაროსანას წინააღმდეგ ბრძოლის ღონისძიებებში, საწვავის საკითხში კორუფციულ გარიგებას უკავშირდებოდა, რის თაობაზეც შეწირულმა ხმამაღლა დაიწყო საუბარი.
შეწირულმა შემდეგ შპს „ვასაძის პურის“ საცხობში დაიწყო მუშაობა, წარმოების უფროსად. მოგვიანებით კი „ქართულ ოცნებას“ დაუპირისპირდა, მარიამ ჯაშის „ჩემი საქართველო -სოლიდარობის ალიანსის“ ოზურგეთის წარმომადგენელი გახდა და საპარლამენტო არჩევნებში მონაწილეობა მიიღო, თუმცა დამარცხდა.
ახლა, 2021 წლის ადგილობრივი თვითმმართველობის არჩევნებზე, ოზურგეთის მუნიციპალიტეტის მერის არჩევნების დროს, როცა ამ პოსტზე კენჭს გია ცეცხლაძე იყრიდა, შეწირული მასთან მივიდა და თანადგომა გამოუცხადა, თუმცა იქედანაც მალე წავიდა და ავთანდილ თალაკვაძესთან გადაინაცვლა.
_ ქალბატონო ნინო, გავრცელებული ინფორმაციით, ახლა მერის პირველი მოადგილის პოსტზე დასანიშნად იბრძვით…
_ეს ჭორია, რაც გამოიწვია ჯერ კიდევ პირველ ტურში ავთანდილ თალაკვაძის მიერ ნათქვამმა, რომ ერთ-ერთი მოადგილე იქნებოდა ქალი. მე ავთანდილის გვერდით დგომა გადავწყვიტე მხოლოდ იმის გამო, რომ მივიჩნიე ყველაზე რეალურ კანდიდატად. რომ არა ავთანდილის, როგორც ადამიანის, როგორც პროფესიონალის ფაქტორი, არ ვიქნებოდი მის გვერდით.
_ერთი კვირით ადრე გახარიას პარტაში გაერთიანდით, ოზურგეთში, გია ცეცხლაძეს უჭერდით მხარს და ეს როგორ გავიგოთ? თუ უარი გითხრათ და მერე წახვედით თალაკვაძესთან?
_ნამდვილად არ უთქვამს უარი. მივედი. შემოთავაზება მქონდა ერთ-ერთ ნომრად. რომ დავთანხმებოდი, ახლა ოზურგეთის საკრებულოს წევრი ვიქნებოდი.
_რა იცით, რომ იქნებოდით?
_იმ ნომრით სხვა გავიდა.
_ესე იგი, წამოხვედი იმიტომ, რომ უფრო მაღალ თანამდებობას, მერის მოადგილეობას ელოდი, გასვლის შემთხვევაში?
_არა, არ არის ასე. ჭორია. ავთანდილის ფაქტორმა გადაწყვიტა. ვინც მეტად იზრუნებს ოზურგეთზე, ვისიც უფრო გჯერა, იზიარებ მის ხედვებს, ის ვამჯობინე.
_მაშინ რა გინდოდა გია ცეხლაძესთან ორი კვირით ადრე. როცა მასთან მიხვედი, უკვე ცნობილი იყო, რომ ავთანდილ თალაკვაძეც მერის პოსტზე იყრიდა კენჭს.
_მე დამიძახა ავთანდილ თალაკვაძემ. მითხრა, გაგესაუბრები, გაგაცნობ ჩემს ხედვებს და მერე შენ თვითონ გადაწყვიტე, ვისთან იქნებიო. მომეწონა, მისი ხედვა უფრო ჩამოყალიბებული იყო.
_და ასე უცებ იცვლი შეხედულებებს? ოზურგეთში აქტიურად საუბრობენ, რომ რამდენიმე ქალბატონს გსურთ პირველი მოადგილის ან მოადგილის პოსტი.
_ეს ჭორია. არც ლელა საჯაია არ იქნება მოადგილე და არც სხვა.
_აბა, შენ იქნები?
_ უკვე ვთქვი, რომ ჭორია.
_მარიამ ჯაშის პარტიაში ხომ იყავი. „ჩემი საქართველო, სოლიდარობის ალიანსი“ ჰქვიოდა. კენჭს იყრიდი და დამარცხდი. მარიამს თუ უთხარი სხვა პარტიებთან წასვლის შესახებ?
_დიახ, ვესაუბრე და ვუთხარი ყველაფერი. თუმცა ამ დროისთვის პარტია უკვე დაშლილი იყო.
_ანუ შემოგეშალათ ხელში და სხვა პარტიებში დაიწყე ძალების მოსინჯვა?
_ვიმეორებ, მე არცერთ პარტიაში არ ვყოფილვარ. არც აწი ვაპირებ…
_ვრცელდება ინფორმაცია, რომ თუ ეს არ გამოვა, კვლავ სეს-ის რეგიონული სამსახურის უფროსად გსურს დაბრუნება, საიდანაც წასვლაზე თავად დაწერე განცხადება.
_კი, თავად წავედი და არც დაბრუნება მსურს. იქ მე 2008 წლიდან ვმუშაობდი. მაშინ სად იყო „ქართული ოცნება“.
_არ იყო, თუმცა ამბობენ, რომ მაშინდელი სოფლის მეურნების მინისტრის, ოთარ დანელიას ცოლის დაქალი ხარ და მისი პროტეჟეობით დაინიშნეთ.
_ კი არის მის მეუღლე ჩემი მეგობარი, თუმცა მე როცა კონკურსში გავედი, დანელია მაშინ მინისტრი არ იყო.
_ნინო, თქვენ გაქვთ პროფესია, გვითხარით, რომ სოფლის მეურნების დოქტორი ხარ, სამეცნიერო ხარისხს ფლობ. რატომ დაეძებ, როგორც ოზურგეთში ამბობენ, მაინც და მაინც თანამდებობას?
_არ დავეძებ. თუ პროფესიული განვითარების საშუალება მომეცემა, მუდამ აქეთკენ წავალ. ოზურგეთში ამის გარემო არ არის. რომ ჩავბმულიყავი სამეცნიერო საქმიანობაში. იყო ვდრო, თბილისში ლექციებს ვკითხულობდი.
_ახლა მუშაობთ შპს „ვასაძის პურის“ წარმოების უფროსად. აქ არ არის გარემო პროფესიული განვითარებისთვის?
_არჩევნების მეორე ტურის შემდეგ, იქ მუშაობას თავი დავანებე. სადაც საჭირო ვიქნები და მეტყვიან, მუშაობას იქ გავაგრძელებ.
_ანუ, არის სიმართლე იმაში, რომ ახლადარჩეული მერისგან შემოთავაზებას ელოდები?
_სადაც საჭიროდ ჩათვლიან, მე ვიმუშავებ იქ, _ კვლავ გაგვიმეორა ნინო შეწირულმა.
[sexy_author_bio]
