გურიაში საახალწლო სამზადისი მაინც რიტუალად ქცეულ კალანდას და ბარაქიან სუფრას უკავშირდება. ამიტომ ყველა ცდილობს, დამდეგი ახალი წლისთვის თადარიგი წინასწარ დაიჭიროს.
დღეისთვის, ოზურგეთში, ყველაზე ძალიან ყველი გაძვირდა. ერთი კილოგრამის ფასი 8-9 ლარია და, სავარაუდოდ, ახალი წლისთვის უფრო გაძვირდება; ორი ლარი ღირს ერთი ლიტრი რძე; ერთი კილოგრამი ნადუღი _ ხუთი ლარი. რაოდენ გასაკვირიც უნდა იყოს, თითქმის განახევრდა გოჭის ფასი _ თუ ორი-სამი თვის წინ, ცოცხალი წონით, ერთი კილოგრამი ათი ან თერთმეტი ლარი ღირდა, ახლა ექვსი ლარი ღირს; ბაზარში უკვე გამოჩნდა ინდაურებიც.
_ “გენდერული ბალანსი” დედალ-მამალ ინდაურებს შორის მაინც დარღვეულია. მამალი 35 ლარი ღირს, დედალი კი _ 25 ლარი, _ ნახევრად ხუმრობით გვითხრა ინდაურებით მოვაჭრე ქალბატონმა და გააგრძელა, _ თუ ახლავე იყიდით, თორემ საახალწლოდ ფასი გაორმაგდება.
დანარჩენ შინაურ ფრინველს რაც შეეხება, ზრდასრული ქათამი 13-15 ლარი ღირს, იხვი _ ათი ლარი.
საკმაოდ ძვირია საქონლის ხორციც _ ერთი კილოგრამი 13 ლარი ღირს. როგორც ამბობენ, შარშანდელის მსგავსად, საახალწლოდ ფასი უფრო მოიმატებს.
ჯერჯერობით, ერთი კილოგრამი ნედლი ქინძისა თუ ოხრახუშის ფასი ხუთ ლარს არ სცდება, თუმცა, აღნიშნავენ იმასაც, რომ თუ თოვლი მოვიდა და ამინდი გაუარესდა, მწვანილის ფასი შესაძლოა, გასამმაგდეს.
საკმაოდ გაიზარდა კარტოფილის ფასი _ ახლა ერთი კილოგრამი ხარისხიანი კარტოფილი ლარი და ოცი თეთრი ღირს; სტაფილო _ ლარნახევარი; კომბოსტო _ 50 თეთრი. ერთი კილოგრამი ხარისხიანი ხმელი ლობიოს ფასი 5,50 ლარია.
რაც შეეხება სიმინდის მარცვალს, შარშანდელთან შედარებით, ფასი გაზრდილია და ერთი კილოგრამი 80 თეთრი ღირს. ერთი კილოგრამი სიმინდის ფქვილი კი, საშუალოდ, 1,50-2 ლარია.
ერთი შეხედვით, თუ არ ჩავთვლით რძის ნაწარმზე ფასის მკვეთრ ზრდას და საპირისპიროდ გოჭის ფასის შედარებით დაწევას, რაც ბოლო პერიოდში იშვიათად ხდებოდა, ძალიან სიძვირესთან არ უნდა გვქონდეს საქმე. თუმცა, მოვაჭრეები მომხმარებლის სიმცირის გამო წუხან.
_ ხან რას ვყიდი, ხან _ რას. დღეს ბაზარში ერთი ტონა “ხამსა” მაინც შემოვიდა და მეხუთედი არ იქნება გაყიდული. ხალხს ფული არ აქვს. იშვიათად ხდება, კარგად გაიყიდოს რამე. გასულ წელს, ამ დროს, სამჯერ მეტ თევზს ვყიდდით. ხალხში ფული სულ უფრო ნაკლებად არის, _ გვეუბნება მანანა მ..
რაც შეეხება სხვადასხვა პროდუქციას, გამყიდველები ამბობენ, რომ უფრო ბოსტნეული იყიდება _ კარტოფილისა და კომბოსტოს უფრო ეტანება ხალხი, ყველა ცდილობს, ადვილად გაიტანოს თავი.
_ ხალხს ახლა უფრო უჭირს, ვიდრე შარშან. ეს ეტყობა ბაზარს. ჩვენ წლების მანძილზე აქ ვვაჭრობთ და წელს განსაკუთრებით უჭირს ხალხს ამა თუ იმ პროდუქტის ყიდვა. შესაბამისად, მეც ვცვლი პოზიციას, ხან ყველს ვყიდი, ხან _ თევზს და ხან _ ყვავილებს, _ გვეუბნება ნინა ხაჩატურიანი.
საახალწლო საუკეთესო დესერტის, გოზინაყისთვის აუცილებელი ნიგოზის და თაფლის ფასი საკმაოდ მაღალია _ ერთი კილოგრამი ნიგოზი 18-20 ლარი ღირს, ერთი კილოგრამი თაფლი კი _ 15-16 ლარი.
ოზურგეთის ბაზარში, ახალ წლამდე 25 დღით ადრე, ძალზე ცოტა რაოდენობით შეხვდებით ადამიანებს, რომლებიც საახალწლო სუფრისთვის, შედარებით იაფად, წინასწარ ყიდულობენ და იმარაგებენ სხვადასხვა პროდუქტს.
_ შობის დღესასწაულამდე ვმარხულობთ. ახლა ყველი ვიყიდეთ და უნდა შევინახოთ. საშობაოდ, საკალანდოდ, ღვეზლის გარეშე, გურული ოჯახი როგორ შეიძლება? სხვა რამეზე შეიძლება უარი თქვა, მაგრამ ღვეზელი სუფრას არ უნდა აკლდეს, ბლომად უნდა მოვამზადოთ, _ გვითხრეს დებმა ლამზირა და ზოია გოგოტიშვილებმა.
