ჩოხატაურის მუნიციპალიტეტში მცხოვრებ 7 ვეტერანს ფაშისტურ გერმანიაზე გამარჯვების 73-ე წლისთავი დღე გურიის გუბერნატორმა მერაბ ჭანუყვაძემ, ჩოხატაურის მუნიციპალიტეტის მერმა ირაკლი კუჭავა, ჩოხატაურის მუნიციპალიტეტის საკრებულოს თავმჯდომარემ ზაალ მამალაძემ და მუნიციპალიტეტის სხვა თანამდებობების პირებმა მიულოცეს.
„ფაშიზმზე გამარჯვების დღე ერთ-ერთი ყველაზე მნიშვნელოვანი დღეა კაცობრიობის ისტორიაში. ამ გამარჯვებისთვის ჩვენმა თანამემამულეებმა თავგანწირულად იბრძოლეს. ძვირფასო ვეტერანებო, თითოეული თქვენგანის თავდადება და შემართება სამაგალითოა. თქვენ, საკუთარი სიცოცხლის ფასად მოგვიტანეთ დიდი გამარჯვება. რომ არა ქვეყნის განსაკუთრებული სიყვარული, ეს ბრძოლა ასე არ დასრულდებოდა. მადლობას გიხდით თავდადებისთვის, თქვენ ხართ გმირები და ვამაყობთ თქვენით. ჩვენი ვალია, ქედი მოვიხაროთ ყველა იმ ადამიანის წინაშე, ვინც ამ გამარჯვებაში წვლილი შეიტანა და სამშობლოსთვის სიცოცხლე გაწირა. მინდა განსაკუთრებულად მოგეფეროთ, მოგილოცოთ ფაშიზმზე გამარჯვება და კიდევ მრავალჯერ გვეზეიმოს ეს დღე. გისურვებთ ჯანმრთელობას და დიდხანს სიცოცხლეს, _ მიმართა ვეტერანებს გურიის გუბერნატორმა მერაბ ჭანუყვაძემ.
ვეტერანებს მნიშვნელოვანი დღე მიულოცა ჩოხატაურის მუნიციპალიტეტის მერმა ირაკლი კუჭავამ:
„გილოცავთ ფაშიზმზე გამარჯვების 73 -ე წლისთავს. ეს დღე არა მხოლოდ გამარჯვების, საკაცობრიო მადლიერების დღეცაა. რომ არა თქვენი თავდადება, მხნეობა და სიმამაცე, მსხვერპლი და შედეგები გაცილებით ტრაგიკული იქნებოდა, თუმცა, ათობით მილიონი, მათ შორის, მშვიდობიანი მოქალაქის დაღუპვა 73 წლის შემდეგაც შემაშფოთებელია.
დღეს ვიგონებთ იმ „ღიმილის გოგო ბიჭებს“ გამარჯვებისთვის რომ თავი გაწირეს. ასევე, ვიგონებთ ჩვენს დამსახურებულ ვეტერანებს, სამწუხაროდ ყოველ წელს მცირდება თქვენი რიგები, მათ შორის, ჩვენს მუნიციპალიტეტში.
ფაშიზმი, რასიზმი, ქსენოფობია, ყველა ეპოქაში დასამარცხებელია და ძვირფასო ვეტერანებო, თქვენ ამ მხრივაც სამაგალითო ადამიანები ბრძანდებით. მიიღეთ ჩვენი პატივისცემა და მადლიერება“, _ უთხრა მერმა ვეტერანებს, რომლებიც სპეციალურად მათთვის გამართულ ღონისძიებებზე საგანგებოდ გამოწყობილები მოვიდნენ.
მეორე მსოფლიო ომის მონაწილეების თავდადებულობასა და გმირობაზე ისაუბრა ჩოხატაურის საკრებულოს თავმჯდომარემ ზაალ მამალაძემ:
„9 მაისი არის დღე, როცა კაცობრიობამ გაიმარჯვა უდიდეს ბოროტებაზე და ამ გამარჯვებაში ძალიან დიდი წვლილი საქართველომ და ქართველებმა შეიტანეს. ჩვენ ბევრი სახელოვანი და ბევრიც უსახელო გმირი გვყავს, რომელთა თავდადებაც დღემდე უცნობია. პატივს მივაგებ ჩვენი გმირების ხსოვნას, მათ უკვდავ სახელებს და განსაკუთრებული პატივისცემით ვულოცავ ამ დღეს მეორე მსოფლიო ომის მონაწილე ჩვენს ვეტერანებს”, _ განაცხადა ზაალ მამალაძემ.
ომის მძიმე დღეები და გამარჯვების სიხარული კიდევ ერთხელ გაიხსენეს ვეტერანებმა, რომლებიც განსაკუთრებული სითბოთი და სიყვარულით იგონებდნენ ომში და შემდეგ დაღუპულ თანამებრძოლებს.
როგორც მხარეთმცოდნეობის მუზეუმის მიერ ორგანიზებულ ღონისძიებაზე აღინიშნა, რომ მეორე მსოფლიო ომში საქართველომ პროცენტულად ყველაზე დიდი მსხვერპლი გაიღო _ ფაშიზმის დასამარცხებლად ჩვენი ქვეყნიდან 700000 ადამიანი წავიდა და აქედან ნახევარი უკან არ დაბრუნებულა.
მუზეუმის დირექტორმა ნათია კალანდაძემ ყურადღება გაამახვილა იმაზე, რომ მეორე მსოფლიო ომში ჩოხატაურიდან 5000 ადამიანი წავიდა, რომელთა შორის 18 ქალბატონი იყო.
ჩოხატაურის მუნიციპალიტეტის მერის ირაკლი კუჭავას ინფორმაციით, 9 მაისთან დაკავშირებით, მუნიციპალიტეტში მცხოვრებ თითოეულ ადამიანს ერთჯერადი სახით 300 ლარი გადაეცა. გარდა ამისა, მუნიციპალიტეტის ბიუჯეტში ვეტერანებისთვის სპეციალური სოციალური პროგრამა მოქმედებს.
