ქალაქ ოზურგეთის მუნიციპალიტეტში მცხოვრები შორენა კოსტავა, როგორც “გურია ნიუსთან” საუბრისას თავად აღნიშნავს, 2017 წლიდან ცდილობს, ადგილობრივ ხელისუფლებას აუხსნას, რომ ოზურგეთის მუნიციპალიტეტში საზაფხულო საბავშვო ბაღების არსებობა აუცილებელია.
“პირველი წერილი 2017 წლის თებერვალში მივწერე ქალაქ ოზურგეთის მუნიციპალიტეტის მაშინდელ მერს, ბეგლარ სიორიძეს, მაგრამ უშედეგოდ. საბოლოო მიზეზად დაგვისახელეს დაგვიანებული მიმართვა _ ვეღარ გამონახავდნენ თანხებს”, _ გვეუბნება შორენა კოსტავა.
მისივე თქმით, როდესაც ოზურგეთის მუნიციპალიტეტის მერი კონსტანტინე შარაშენიძე გახდა, 2017 წლის დეკემბერში, მის სახელზე და ოზურგეთის მუნიციპალიტეტის საკრებულოს თავმჯდომარის დავით დარჩიას სახელზე ახალი წერილი გააგზავნა.
“უპირველეს ყოვლისა, გილოცავთ, ხალხის სამსახურში, მათივე არჩევით მოსვლასა და ღირსეულ გამარჯვებას. გისურვებთ თქვენს გუნდთან ერთად, ღირსეულად გეზიდოთ ძალზე საპასუხისმგებლო და საკმაოდ მძიმე ჭაპანი!
როგორც თქვენთვის ცნობილია, ქ. ოზურგეთში ფუნქციონირებს 8 საბავშვო ბაგა-ბაღი, სადაც, დაახლოებით, 1 000-ზე მეტი აღსაზრდელი იღებს შესაბამის უფასო სერვისსა და აღზრდა-განათლებას. ამ ბავშვების უკან, სულ ცოტა, 2 000 მშობელი მოიაზრება, რომელთა დიდი ნაწილიც მაქსიმალურადაა დაკავებული, ყოველდღიური საყოფაცხოვრებო მოთხოვნილების დასაკმაყოფილებლად შრომა-ჯაფაში (მე და ჩემი მეუღლეც საჯარო მოხელეები ვართ).
საჯარო მოხელის შვებულებად, კანონმდებლობის შესაბამისად, მოგეხსენებათ, განსაზღვრულია 24 სამუშაო დღე (სამსახურების ინტერესიდან გამომდინარე, თითქმის ყოველთვის, გამონაკლისების გარდა, ეს დღეები ერთად არ განისაზღვრება). ბაღის საზაფხულო არდადეგები კი, შინაგანაწესის შესაბამისად, 2 თვეა, რაც ძალზე დიდ დისკომფორტს გვიქმნის. სწორედ აქ გვესაჭიროება თქვენი დახმარება და გვერდით დგომა.
ჩემი თხოვნაა (რომელიც, სამწუხაროდ, “არ” ან “ვერ” გაითვალისწინა თქვენმა წინამორბედმა, წერილი #1005 _ მერია, #51 _ საკრებულო) ჩვენი შვილებისთვის საზაფხულო არდადეგების პერიოდი (ნაცვლად ორი თვისა) განისაზღვროს მხოლოდ ერთი თვით (აგვისტო) და შეიქმნას მათთვის საზაფხულო ბაღის ჯგუფი (ივლისი), სტანდარტთან შესაბამისობაში, როგორც ეს არის მეზობელ მუნიციპალიტეტში…
არსებული თხოვნის განხილვისას აუცილებლად გასათვალისწინებელია რიგი საკითხები, რათა საბავშვო ბაღი არ დაემსგავსოს სატუსაღოს, კერძოდ:
1) კონდიცირების სისტემის მოწესრიგება სამუშაო ოთახში (ივნისსა და სექტემბრის დასაწყისში ოთახებში კატასტროფულად ცხელი, ჩახუთული კლიმატია, დისკომფორტი აქვთ როგორც ბავშვებს, ასევე, პედაგოგ-აღმზრდელებსაც.
2) ეზოში მინიმალური საზაფხულო ინფრასტრუქტურის (ქოლგა, “სილის” მოედანი…) მოწყობა.
3) საზაფხულო ბაღში დასასაქმებელი პედაგოგ-აღმზრდელებისა და პირთა ანაზღაურების გაზრდა ამ პერიოდისთვის (მათი უმეტესობა არდადეგების პერიოდში დამატებითი თანხის მოსაპოვებლად, მოგეხსენებათ ძალზე დაბალი ანაზღაურება აქვთ, დამატებით სამსახურებს ეძებენ, ან დროებით საზღვარგარეთაც კი გადიან სამუშაოდ).
საკითხის განხილვის დროს, საჭიროების შემთხვევაში, წარმოგიდგენთ მშობელთა ხელმოწერებსაც.
წინასწარ გიხდით მადლობას და იმედი მაქვს, გულდასმით განიხილავთ ჩემს (და არა მარტო ჩემს) თხოვნას”.
ამ წერილის პასუხი შორენა კოსტავამ ოზურგეთის მუნიციპალიტეტის მერიიდან 2018 წლის მაისში მიიღო:
“ოზურგეთის მუნიციპალიტეტის მერიამ მოქალაქე შორენა კოსტავას წერილის საფუძველზე განიხილა საზაფხულო ბაღების ორგანიზების საკითხი.
განხილვისას შესწავლილი იქნა ა(ა)იპ “ოზურგეთის მუნიციპალიტეტის სკოლამდელი აღზრდის ცენტრის” ბაზაზე, ასევე, კერძო ბაღების თანადაფინანსებით საზაფხულო ჯგუფების ორგანიზების საკითხი.
აღნიშნულის განხილვისას, მუნიციპალიტეტის მერიის დავალებით, ა(ა)იპ “ოზურგეთის მუნიციპალიტეტის სკოლამდელი აღზრდის ცენტრის” მიერ მოთხოვნის შესასწავლად, შერჩევის პრინციპით, ჩატარდა გამოკითხვა, რის შედეგადაც გამოიკვეთა საზაფხულო ბაღების მომსახურების მსურველთა სავარაუდო რაოდენობა, რომელიც მშობელთა საერთო რაოდენობის 82%-ია.
ზემოთ აღნიშნულიდან გამომდინარე, გაცნობებთ, რომ ოზურგეთის მუნიციპალიტეტის მერია, როგორც ფინანსური და ტექნიკური, ასევე, აღნიშნული სერვისის მიღების მსურველთა მოცულობის გათვალისწინებით, მიმდინარე ეტაპზე მზად არ არის ა(ა)იპ “ოზურგეთის მუნიციპალიტეტის სკოლამდელი აღზრდის ცენტრის” ბაზაზე მოახდინოს საზაფხულო ბაღის ჯგუფების ჩამოყალიბება”.
შორენა კოსტავა ამბობს, რომ ოზურგეთის მუნიციპალიტეტის მერს, კონსტანტინე შარაშენიძეს წერილის გაგზავნის შემდეგ პირადად მიმართა:
“მან გადამამისამართა მრჩეველთან ალეკო ბერიძესთან _ როგორც ბატონმა კოტემ მითხრა, საკითხი მოგვარებულია და ალეკო გეტყვის ყველაფერსო.
ბატონმა ალეკომ მითხრა, ახლა მოვიდა ჩემთან წერილიო, არადა, წერილი 2017 წლის დეკემბერში გააგზავნა. მერე ამიხსნა ვარიანტი, რომელიც შეიმუშავეს _ კერძო ბაღში ვაუჩერით თანადაფინანსება. კერძოდ, 100 ლარს თითოეულ ბავშვზე ისინი ჩარიცხავდნენ და მშობელი დანარჩენს _ 150 ლარს გადაიხდიდა. ამაზე მე ვუთხარი, რომ სულელური გადაწყვეტილებაა და არ განიხილოთ,-მეთქი, რაზეც განრისხებულმა მიპასუხა, მე თქვენ სულელი მიწოდეთო. ეს “გაღმით შეედავე, გამოღმით შეგრჩებას” თემაა.
მე ჩემს შვილს გარკვეული დრო ვატარებდი იმ კონკრეტულ კერძო ბაღში, რომელიც ძალიან კარგი ბაღია, მაგრამ მაქსიმუმ, 20-30 ბავშვის მიღებას შეძლებდა, ამით კი აშკარად ვერ დააკმაყოფილებდა 82 %-ს. თან მე 150 ლარი თუ მაქვს, ე. ი. საჭიროების შემთხვევაში, იმ 100 ლარსაც გამოვნახავ, მაგრამ თუ 100 ლარის დახმარების იმედზე ვარ ამათგან, ე. ი. ის დანარჩენი 150 ლარის არ მაქვს… ხელისუფლების შემოთავაზება მხოლოდ 150 ლარის გადახდისუნარიანი მშობლებისთვის დახმარებას გულისხმობდა და გაჭირვებული საერთოდაც არ ენაღვლებოდათ… ოცჯერ 250 ლარი 5 000 ლარია, რაც ნიშნავს, რომ სახელმწიფო ბაღის თუნდაც ერთ ოთახში დაამონტაჟებდა კონდიცირებას, ეყოფოდა პედაგოგების ხელფასების საზაფხულო დანამატს და 20 ბავშვის ნორმალურ პირობებში ყოფნას… ბატონმა ალეკომ ამაზე კატეგორიულად აღნიშნა, რომ სხვა ბავშვებმა რა დააშავესო. მერე მითხრა, რომ სახელმწიფო ბაღებში კანონი კრძალავს ასეთ ჯგუფებსო. ამის პასუხად თბილისის საზაფხულო ბაღების შესახებ რეგისტრაციის შესახებ სრულყოფილი ინფორმაცია გადავუგზავნე”, _ ამბობს შორენა კოსტავა.
საკრებულოდან გაგზავნილი წერილიდან შემდეგ ინფორმაციას ვიგებთ:
“აღვნიშნავთ, რომ კომისია სავსებით იზიარებს თქვენს პოზიციას. როგორც მოგეხსენებათ, საკითხი საჭიროებს ღრმა და საფუძვლიან შესწავლას, პრობლემის გააანალიზებას და მისი ოპტიმალური გადაჭრის გზის პოვნას. მზად ვართ, აღმასრულებელი ხელისუფლების წარმომადგენლებთან ერთად, პრობლემაზე ვიმსჯელოთ ოზურგეთის მუნიციპალიტეტის 2019 წლის ბიუჯეტის მიღების დროს. მიუხედავად ასეთი პასუხისა, ეს საკითხი არ მოგვარდა 2018 წელს და ახლა საუბარია, რომ 2019 წლის ბიუჯეტის დროს ეცდებიან, შესაბამის თანხები მოიძიონ”.
ოზურგეთის მუნიციპალიტეტის საკრებულოს თავმჯდომარის დავით დარჩიას აზრი ამ საკითხთან დაკავშირებით ასეთია:
“საკრებულო აქტიურად განიხილავდა ბაღებში საზაფხულო ჯგუფების გახსნის საკითხს, რომელიც საკრებულოს განათლების, კულტურის, სპორტის, ახალგაზრდულ საქმეთა, ჯანდაცვისა და სოციალურ საკითხთა მუდმივმოქმედმა კომისიამ შესასწავლად აღმასრულებელ ორგანოს გადაუგზავნა.
მერია, ამ ეტაპზე, ფინანსური რესურსების არასაკმარისი რაოდენობით ხსნის საბავშვო ბაღებში საზაფხულო ჯგუფების გახსნის შეფერხებას. საზოგადოების მხრიდან საკითხის მაღალი ინტერესიდან გამომდინარე, საკრებულო აგრძელებს მუშაობას და 2019 წლის ბიუჯეტის პროექტის განხილვის პროცესში, ამ საკითხს მნიშვნელოვანი ყურადღება მიექცევა”, _ ამბობს დავით დარჩია.
