“სამართლიანი არჩვენების“ წარმომადგენლებმა წინასაარჩევნო მონიტორინგის III შუალედური ანგარიში წარმოადგინა.
ანგარიშში წერია, რომ ბათუმის დრამატულ თეატრში ირმა ინაშვილის, „პატრიოტთა ალიანსისა“ და კომპანია „კარფურის“ სახელით თეატრის თანამშრომლებს 77 სასურსათო კალათა დაურიგდა. კულტურის პალატის ხელმძღვანელმა დავით ოქიტაშვილმა აღნიშნა, რომ დახმარება სწორედ ირმა ინაშვილისა და „პატრიოტთა ალიანსის“ მხარდაჭერით გაიცა. ოზურგეთში, ინაშვილისა და „პატრიოტთა ალიანსის“ მხარდაჭერით, ადგილობრივი ფოლკლორის ცენტრის და ალ. წუწუნავას სახელობის სახელმწიფო თეატრის თანამშრომლებმა, ასევე, მიიღეს სასურსათო კალათები.
“ოზურგეთში, 6 აგვისტოს, სასაჩუქრე სურსათის კალათა, ირმა ინაშვილისა და „პატრიოტთა ალიანსის“ მხარდაჭერით, ადგილობრივი ფოლკლორის ცენტრის და ალ. წუწუნავას სახელობის სახელმწიფო თეატრის თანამშრომლებმა მიიღეს. „სამართლიანი არჩევნების“ დამკვირვებელთან საუბრისას, ფოლკლორის ცენტრის ადმინისტრაციის წარმომადგენელმა აღნიშნული ფაქტი დაადასტურა. თუმცა, ოზურგეთში „პატრიოტთა ალიანსის“ ხელმძღვანელმა ეს კატეგორიულად უარყო. ოზურგეთის ფოლკლორის ცენტრის თანამშრომლები და ალ. წუწუნავას სახელობის თეატრის
ადმინისტრაცია ინფორმირებულნი იყვნენ იმის შესახებ, რომ სასურსათო კალათები „პატრიოტთა ალიანსისგან“ მიიღეს.“ – აღნიშნულია ანგარიში.
“გურია ნიუსი“ ალექსანდრე წუწუნავას სახელობის ოზურგეთის დრამატული თეატრის სამხატვრო ხელმძღვანელს ვასილ ჩიგოგიძეს დაუკავშირდა. ვასილ ჩიგოგიძე ჩვენთან საუბრის დროს ამბობს, რომ სამომხმარებლო კალათა მიიღეს, მაგრამ, ეს არ იყო “პატრიოტთა ალიანსისგან“.
“20 კალათა მივიღეთ კულტურის პალატისგან. მისი ხელმძღვანელი ბატონი დავით ოქიტაშვილი იმყოფებოდა ოზურგეთში. 20 კალათიდან ხუთი გადავეცით ოზურგეთის ფოლკლორის ცენტრს და ერთი კალათა ჩოხატაურში გავაგზავნეთ. კალათები გადაეცათ იმ ადამიანებს, რომლებსაც ესაჭიროებოდათ ჩვენგან დახმარება. მინდა ვთქვა, რომ ჩვენ “პატრიოტთა ალიანსისგან“ საჩუქარი, არ მიგვიღია“, _ გვითხრა ვასილ ჩიგოგიძემ.
“სამართლიანი არჩევნები“ თვლის, რომ ადგილი ჰქონდა ამომრჩევლის სავარაუდო მოსყიდვას.
