“პატრონი რომ არ გვყავს, იმიტომ ვცხოვრობთ ასეთ ქვეყანაში!”

15 აპრილს, ოზურგეთის ჭადრების ბაღში, დაანონსებული განცხადების საფუძველზე, ოზურგეთის სამოქალაქო საზოგადოების და მოსახლეობის ის წარმომადგენლები შეიკრიბნენ, რომლებიც ორგანიზაცია “ალტ-ინფოს” ფუნქციონირების წინააღმდეგ მკვეთრ პროტესტს გამოთქვამენ.

სამოქალაქო საზოგადოების ერთ-ერთმა ყველაზე აქტიურმა წევრმა, ირმა გორდელაძემ განაცხადა, რომ “ალტ-ინფოს” ოფისების გახსნას ხელისუფლება “უნთებს მწვანე შუქს”. წინააღმდეგ შემთხვევაში, ისინი ასე ღიად მოქმედებას ვერ გაბედავდნენ.

გორდელაძემ, ასევე, თქვა, რომ მის მიმართ და, ზოგადად, პროტესტის გამომხატველთა მისამართით, ბევრი შეურაცხმყოფელი შეფასება ისმის:

_ ისიც თქვეს, ამ ქალს გაბზარულ ვედროსავით რომ აქვს თავი და ყვირის, პატრონი არ ჰყავსო? აკლიაო. მე რომ პატრონი არ მყავს, იმიტომ ვარ აქ, იმიტომ ვცხოვრობთ ასეთ ქვეყანაში, თორემ რა მინდა აქ? მე რომ მაკლია, კი ვიცი, მაგრამ შენ, ვინც ჩირგვში ზიხარ, მითხარი, რა გააკეთე ამ ქვეყნისთვის, _ ჩვეული მიმართვით დაიწყო გორდელაძემ აქცია და სოლიდარობა გამოუცხადა უკრაინელ ხალხს. შემდეგ კი შეკრებილი, ტრანსპარანტებით მოსული საზოგადოების წარმომადგენლები და სამოქალაქო აქტივისტები თაყაიშვილის ქუჩისკენ დაიძრნენ, სადაც “ალტ-ინფოს” ოფისია გახსნილი.

მსვლელობისას აქციის ორგანიზატორები მოუწოდებდნენ ერთმანეთს, ტრანსპორტის მოძრაობისთვის ხელი არ შეეშალათ. აქციას თვალს ადევნებდა და პროტესტის მონაწილეებთან ერთად, თაყაიშვილის ქუჩაზე, გადადგილდებოდა პოლიციაც.

გზა და გზა ისმოდა, როგორც აქციის მხარდამჭერთა, ისე მოწინააღმდეგეთა რეპლიკები.

_ შემოგვიერთდით, გამოხატეთ მხარდაჭერა. არა რუსეთს! ჩვენი მხარდაჭერა უკრაინას! _ ისმოდა შეძახილები.

_ მაგ ჭკუაზე ვარ ახლა, თქვენ შემოგიერთდეთ, _ გასძახეს თაყაიშვილის ქუჩაზე გავლისას აქციის მონაწილეებს.

_ რუსულ ხომალდს მისდიე, მაშინ, _ პასუხობდნენ გორდელაძე და აქციის სხვა მონაწილეები ასეთი რეპლიკების ავტორებს.

თაყაიშვილის ქუჩაზე, სადაც “ალტ-ინფოს” ოფისია გახსნილი, ოჯახის ჭიშკრის გასწვრივ და მიმდებარედ პოლიციის კორდონი იყო ჩამწკრივებული, სახლიდან კი ისმოდა ქართული საგალობლების მელოდია. სახლის ფასადზე გამოკრული იყო ჯვრის გამოსახულებიანი ბანერები.

_ ყველაზე მნიშვნელოვანი ის არის, რომ სატანა ჯვრით არის მოსული. ამ ხალხს ტვინს ურევს პუტინის ხელის ბიჭი მორგოშია და მისი თანამოაზრეები, მთავრობა კი მწვანეს უნთებს. ჩვენ არ გვძულს ეს ადამიანები, მაგრამ ფარისეველი მორწმუნეებიც არ გვინდა ჩვენს გვერდით. ვითომ ჩვენზე უფრო უყვართ ქრისტე და უფრო იციან ქრისტესმიერი სიყვარული? სწორედ ამათი ჯვრის ქვეშ არის შემალული საქართველოს რუსეთისთვის ჩაბარების იდეა! არ დავუშვებთ ამას! _ მეგაფონით ხელში მიმართა მათ გორდელაძემ.

_ ზუსტად ასი წლის წინ, სერგო ორჯონიკიძემ თქვა, რომ მშვიდობა სურდათ და მშვიდობა დაამყარეს. ახლა, ასი წლის შემდეგ, სწორედ ასე გვეუბნებიან _ ომი გინდათ? მშვიდობაა საჭიროო. ჩვენ ომით და შრომით მოვედით დღემდე და ასე გავაგრძელებთ, _ თქვა ოზურგეთელმა ვანო გოგოლაშვილმა, რომელიც ანა დოლიძის პარტიის წევრია.

აქციაზე, პროტესტის გამოხატვისას, თითოეული გამომსვლელის სიტყვებში ისმოდა, რომ არ დაუშვებდნენ გურიის ადმინისტრაციულ ცენტრში “ალტ-ინფოს” ოფისის გახსნას, რომელიც, მათივე თქმით, რუსული იდეის გამტარებელია საქართველოში და ქვეყნის რუსეთთან მიერთებას ემსახურება.

ახლად დაარსებული სამოქალაქო მოძრაობა “თავისუფლებისთვის” წევრები, რომლებიც ოზურგეთელი ახალგაზრდები არიან, ამბობდნენ, რომ ყველაზე ამაზრზენი იყო, როდესაც “ალტ-ინფოს” დაფუძნების შემდეგ, ოჯახის (ვის სახლშიც “ალტ-ინფოს” ოფისი გაიხსნა) შვილიშვილი, რომელმაც ბანერი ჩამოხსნა და უკრაინის დროშა გამოფინა, პოლიციაში დაიბარეს.

_ სამი დღეა, რაც აქ, თაყაიშვილის ქუჩაზე, “კონსერვატიული მოძრაობის” ოფისი გახსნეს. მათ საოფისედ სახლი ციცო ხუჭუამ მიაქირავა. ოჯახის შვილიშვილმა, ილია თაყაიშვილმა ბებიას გადადგმულ ნაბიჯს პროტესტი გამოუცხადა _ “კონსერვატიული პარტიის ” ბანერი ჩამოხსნა და საქართველო-უკრაინის დროშა გადმოფინა. მალე ხუჭუამ ეს დროშები ფანჯრიდან გადმოყარა. შვილიშვილი კი პოლიციაში დაიბარეს. ვაი, სირცხვილო! _ ამბობდნენ აქციის მონაწილეები.

_ აი, ასეთი ხალხია ესენი. პროგრესულმა ახალგაზრდამ გააპროტესტა მის ოჯახში “ალტ-ინფოს” ოფისის გახსნა. მისსავე სახლში შესულმა, ამ ორგანიზაციის წევრებმა კი უჩივლეს. ჩვენ მას მხარდაჭერას ვუცხადებთ, _ ხმამაღლა, მეგაფონებით ხელში, არაერთხელ იმეორებდნენ სამოქალაქო მოძრაობის წევრები: საბა ვასაძე, კახა კეჭაყმაძე, ირმა გორდელაძე, კუკა ბარამიძე და სხვები.

მათ გამოსვლაში გამუდმებით ისმოდა, რომ არ დაუშვებდნენ “ალტ-ინფოს” ოფისის გახსნას და ამისთვის ყოველდღე ივლიდნენ აქ პროტესტის გამოსახატავად.

თავის მხრივ, “ალტ-ინფოს” ოფისიდან ისმოდა საწინააღმდეგო აზრი:

_ ვინ არიან პუტინის ხელის ბიჭები? თქვენ თავად ხართ გლობალისტების და ვიღაცის ხელის ბიჭები და მოღალატეები. ფულს გიხდიან ამ ყვირილისთვის. ჩვენ საქართველოს შვილები ვართ. ვიცავთ ჩვენს ტრადიციებს, ჩვენს კულტურას და არ გვინდა აქ კაცის კაცზე ქორწინება, მამათმავლები და მსგავსი ხალხი, _ საპასუხოდ ყვიროდნენ “ალტ-ინფოს” ოფისიდან.

_ ახლა ამათ გამოვყრი აქედან, მაგრამ დამიჭერს პოლიცია. მომცენ ნება, რომ შევიდე. ეს ტვინარეული ხალხია, ატყუებენ ამათ, რუსეთთან დავალაგებთ ურთიერთობასო. მორგოშია და სხვა ფაშისტები ასე იძახიან, ხელისუფლება კი მწვანეს უნთებს…_ არ ცხრებოდა გორდელაძე.

მალე მხარეებს შორის გინება, სხვადასხვა სიტყვიერი შეურაცხყოფა დაიწყო, იყო გაწევ-გამოწევაც. რომ არა პოლიციის აქტიური მცდელობა, ფიზიკური დაპირისპირება გარდაუვალი იყო.

აქცია მოგვიანებით დაიშალა, თუმცა ორგანიზატორებმა განაცხადეს, რომ მუხტი არ დაიწევს და აქ ყოველდღე მოვლენ პროტესტის გამოსახატავად.