ფედერალისტების პარტიის დაფუძნებაში (რომელიც ჟენევაში 1904 წელს მოხდა) დიდი როლი შეასრულეს არჩილ ჯორჯაძემ, კომანდო გოგელიამ, ვარლამ ჩერქეზიშვილმა, მიხაკო წერეთელმა და სხვებმა. ახალი პარტია ევროპული ყაიდის სოციალისტური (არამარქსისტული) პარტია იყო, რომლის მიზანი ეროვნულ-პოლიტიკური ძალებისა და მიმდინარეობების შეერთება-კონსოლიდაცია გახლდათ ბლოკისტური პარტიის წიაღში, საქართველოს ავტონომიის მოსაპოვებლად. მათ პარტიაში მოღვაწეობდნენ ანარქისტები, სოციალისტ-რევოლუციონერები, ეროვნულ-დემოკრატები… გასაგები მიზეზების გამო ერთადერთი პოლიტიკური ძალა, რომელიც ფედერალისტებს არ შეუერთდა, სოციალ-დემოკრატიული პარტია იყო. ისევე, როგორც სხვა პარტიები, ფედერალისტებიც არ თაკილობდნენ ტერორისტულ საქმიანობას და ფულის სხვადასხვა მეთოდებით შოვნას. პოლიციის დეპარტამენტი ფედერალისტთა სამხედრო ორგანიზაციის შესახებ იტყობინებოდა, რომ მან მოახდინა ,,წვრილი ხულიგნური თავდასხმების მთელი რიგი”. სერიოზული ტერორისტული აქტებიდან გამოყოფილი იყო 1907 წლის 15 მარტს გორის მაზრის უფროსის გუგუშვილის მკვლელობა.
ასევე ცნობილია ფედერალისტების უშედეგო ტერაქტი თბილისის პოლიცმეისტერ გიორგი კოვალიოვზე, რომელიც 1905 წლის 12 ივლისს დილით მოხდა. კოვალიოვის მოკვლის სურვილი ფედერალისტების სამხედრო ჯგუფის უკლებლივ ყველა წევრმა გამოთქვა, ამიტომ კენჭისყრა მოუწიათ. ქუდში ჩაყრილი ფურცლებიდან ერთი, ლევან ხერხეულიძის სახელით, ამოიღო შალვა ამირეჯიბმა. ჯგუფის მეთაურმა (სხვა წყაროებით, მეთაურის თანაშემწემ) იოსებ დავრიშევმა, მონაწილეობა მიიღო ტერაქტის დაგეგმვაში და თავდასხმას შორიდან ადევნებდა თვალს. ხერხეულიძის მიერ ნასროლი ყუმბარის ნატეხებით პოლიცმეისტერმა რამდენიმე ჭრილობა მიიღო, მეეტლე და რამდენიმე გამვლელი მსუბუქად დაიჭრა. გაზეთი “Русское слово” (1905, 12 ივლისი) წერდა:
…როდესაც ტფილისის პოლიცმეისტერი კოვალევი მიემგზავრებოდა მეფის ნაცვალთან ჩვეულებრივი პატაკით, ოლღას ქუჩაზე (დღევანდელი კოსტავას ქუჩა) მის ეტლს ესროლეს ყუმბარა, რომლის ნამსხვრევით იგი ფეხებში დაიჭრა. ბოროტმოქმედს სურდა მიმალულიყო, მაგრამ იგი მალე შეიპყრეს ბაღ `ბელ-ვიუს~ მახლობლად, სადაც მას სურდა თავი შეეფარებინა. პოლიციელებმა და მზვერავებმა მას სასტიკად სცემეს, რის შემდეგაც იგი მიხეილის საავადმყოფოში გაიგზავნა~. მეორე დღეს იგივე გაზეთი ამცნობდა მკითხველს, რომ პოლიცმეისტერზე თავდასხმისათვის შეპყრობილი თავადი ხერხეულიძე ხმლებით მიყენებული ჭრილობებისაგან საავადმყოფოში გარდაიცვალა. როცა კოვალიოვი მომჯობინდა, მეფისნაცვალმა ის დააწინაურა და განჯის გუბერნატორად გადაიყვანა.
