მმართველი პარტია საპრეზიდენტო არჩეავნებში საკუთარ კანდიდატს არ დაასახელებს და დამოუკიდებელ კანდიდატს დაუჭერს მხარს. როგორც ,,ქართულ ოცნებაში“ აცხადებენ, გადაწყვეტილება მიღებულია და აღარ შეიცვლება. საკითხზე პარლამენტის თავმჯდომარე, ირაკლი კობახიძე საუბრობს.
,,მხარს აუცილებლად დავუჭერთ ერთ-ერთ კანდიდატს. ჩვენი პოზიცია არის მნიშვნელოვანი, ჩვენ ვართ პასუხისმგებელი ამომრჩევლის წინაშე ამ საპრეზიდენტო არჩევნებთან დაკავშირებითაც. აქედან გამომდინარე, ჩვენი ჩართულობა იქნება აქტიური, თუმცა ჩვენი კანდიდატი არ გვეყოლება ამ არჩევნებში“, _ განაცხადა კობახიძემ.
პოლიტოლოგი, სოსო ცინცაძე ,,გურია ნიუსთან“ აცხადებს, რომ ,,ქართული ოცნების“ პოზიცია გაუგებარია. მისი თქმით, მმართველი პარტია სალომე ზურაბიშვილის მხარდაჭერით პრობლემებს შეიქმნის.
,,ნარმანიას კანდიდატურის შემდეგ სალომე ზურაბიშვილის კანდიდატურა ყველაზე ცუდია. ზურაბიშვილის ავტორიტეტი ქვეყანაში ნულია, მისი მინისტრობის პერიოდი ქართული დიპლომატიის შავ ლაქად არის დარჩენილი, ამიტომ არ მესმის, რატომ იგდებს თავს მძიმე მდგომარეობაში ,,ქართული ოცნება“. საკადრო სელექცია, როგორც ჩანს, ყველა ხელისუფლებისთვის აქილევსის ქუსლად იქცა.
რატომ ზურაბიშვილი? უბრალოდ, სხვა არავინ ჰყავთ. ბატონმა ბიძინამ თვითონვე ბრძანა, რომ მან ოთხ მართლა დამოუკიდებელ ადამიანს შესთავაზა კანდიდატობა და ყველამ უარი უთხრა. ზურაბიშვილი არაფერზე ამბობს უარს, მან თავის დროზე საგარეო საქმეთა მინისტრობაზეც არ თქვა უარი, თუმცა თვითონ მშვენივრად იცოდა, რომ აბსოლუტურად მოუმზადებელი და შეუფერებელი იყო ამ თანამდებობისთვის.
ახლაც არ ამბობს უარს, მისთვის ეს არის ყოფილი კეთილდღეობა. კი ამბობს, ფეხით ვივლიო, მაგრამ მეეჭვება, რომ მართლა ფეხით სიარული დაიწყოს. გინდაც ფეხით იაროს, ეს არის პროვინციული პოპულიზმი. ფეხით სიარულით უცებ ავტორიტეტს აიწევს თუ ხალხის პრობლემებს გადაწყვეტს?!
შესაძლოა, პირველივე დღეს ფეხით წავიდეს სამსახურში, მაგრამ მეორე და მესამე დღეს დაცვის მანქანით ისე მივა, რომ კაციშვილი ვერ დაინახავს მის მისვლას სამსახურში“,_ გვითხრა ცინცაძემ.
მმართველ პარტიაში საპრეზიდენტო კანდიდატთან დაკავშირებით ამ დრომდე აზრთა სხვადასხვაობაა. გუნდის წევრების ნაწილს სურს, პარტიამ საკუთარი კანდიდატი წარადგინოს, ნაწილიც კი უპარტიო კანდიდატის, სალომე ზურაბიშვილის კანდიდატურას უჭერს მხარს.
