დათბა თუ არა, გურიაში, ფაროსანა ძალზე დიდი რაოდენობით გამოჩნდა, რასაც მოსახლეობა შეშფოთებით ადევნებს თვალს.
_ აზიური მავნებლის, ფაროსანას წინააღმდეგ ბრძოლა, წელს, განსაკუთრებით აუცილებელი იქნება და არნახული მობილიზება დაგვჭირდება. იმდენია გამოსული, ვერც წარმოვიდგენდით. გვეგონა, კლებისკენ იყო საქმე წასული და უარესობაა, მავნებლი უარესი ჯარი მოგვადგა, ვიდრე აქამდე გვახსოვს,_ ასეთ საუბარს ყოვედღიურად მოისმენთ, ოზურგეთში, როგორც სოფლებში, ისე სხვადასხვა თავშეყრის ადგილებში თუ ტრანსპორტში.
მართლაც, მავნებელი უკვე აქტიურად და დიდი რაოდენობით გამოჩნდა. სად არ ნახავთ მას , სახლის ფანჯრებზე, სათავსოებიდან გამოსვლისას, თხილის პლანტაციებში…
_გადავირიე, ქინძსაც ფაროსანას სუნი აქვს, _ გვეუბნებიან ოჯახის დიასახლისები, რაც მართლაც აშკარად დასტურდება.
სეს-ის გურიის რეგიონული სამსახურის ხელმძღვანელი, მანანა ერქომაიშვილი, „გურია ნიუსის“ თხოვნით, ასეთ კომენტარს აკეთებს:
_ დიახ, დათბა და მავნებელი გამოჩნდა. ჩვენ აქტიურად ვმოქმედებთ. მუშაობს ფაროსანას წინააღმდეგ ბრძოლის, გურია-აჭარის შტაბი, რომლის მითითებები ყველგან სრულდება. კერძოდ, თხილის პლანტაციებში, ეზოებში დამონტაჟებულია ე.წ. მიმზიდველები, ფერომონები. 5-5 ფირფიტა განთავსებულია ყველა ადმინისტრაციულ ერთეულში, რომელზეც მეშვიდე დღეს თუ დაფიქსირდა რაოდენობით 15 მავნებელი, უკვე ცივი შესხურებით შეწამვლა მოხდება. ხოლო როცა აკაციის ყვავილობა დასრულდება, ცხელი ნისლით თერმული დამუშავება აუცილებლად დაიწყება ,- გვითხრა ერქომაიშვილმა.
„გურია ნიუსი“ აქტიურად ერთვება აღნიშნულ პროცესში და სისტემატიურად შევთავაზებთ ჩვენსს მკითხველბს არსებული მდგომარეობის შესახებ.
ავტორი
