ოზურგეთში ნოდარ დუმბაძის სახელობის მესამე საერთაშორისო ფესტივალი საზეიმო ვითარებაში გაიხსნა.
ოფიციალურ გახსნას არაერთი სტუმარი დაესწრო.
ოზურგეთის ალექსანდრე წუწუნავას სახელობის დრამატული თეატრის სამხატვრო ხელმძღვანელმა და ფესტივალის დამაარსებელმა ვასილ ჩიგოგიძემ გახსნის ცერემონიზე სიტყვით გამოსვლის დროს ისაუბრა ფესტივალის პროგრამაზე და ჟიურზე, რომელიც წელს პირველ კონკურსს უხელმძღვანელებს.
როგორც მან აღნიშნა ნოდარ დუმბაძის პრემია დაწესდა და ექვსს ნომინაციაში იქნება გამოვლენილი გამარჯვებულები.
“ბედნიერი ვარ უზომოდ, მადლიერი ვარ უფლის და იმ ადამიანების, ვინც 2016 წელს დამიდგნენ გვერდში, რომ ნოდარ დუმბაძის სახელობის საერთაშორისო ფესტივალი დაარსებულიყო გურიაში.
ძალიან გავიზარდეთ 2016 წლიდან და დღეს ნოდარ დუმბაძის მესამე საერთაშორისო ფესტივალზე 8 ქვეყნიდან 9 თეატრი და საქართველოდან 16 თეატრის დასი მიიღებს მონაწილეობას“, – აღნიშნა ვასილ ჩიგოგიძემ.
მისივე თქმით, მომავალ წელს ნოდარ დუმბაძის 95 წლის და ოზურგეთის თეატრის 155 წლის საიბულეო მეოთხე ფესტივალი ჩატარდება.
საქართველოს კულტურის, სპორტისა და ახალგაზრდობის მინისტრმა თეა წულუკიანმა შემდეგი სიტყვით მიმართა საზოგადოებას:
“ალბათ, არავინ დამძრახავს თუ კი პირველ რიგში მივესალმები იმ სტუმრებს, ვინც მიუხედავად ომისა, მიუხედავად ტყვიებისა, მიუხედავად ოკუპაციისა, ხერსონიდან ჩამობრძანდა. აქ იმყოფება თეატრალური დასი და ვიხილავთ მათ სპექტაკლს.
ეს ის ხალხია, რომლებმაც სამწუხაროდ გაიზიარა ის, რაც ჩვენ მანამდე ვნახეთ. ვნახეთ 90-იანი წლების მრავალნაირი და სხვადასხვა ომი რუსეთთან, ვნახეთ რუსეთის შემოჭრა 2008 წელს და ეს არის ის, რაც ჩვენი ოჯახების თავზე და ტყავზე ბევრჯერ გამოვცადეთ. მაგრამ ყველანაირი უბედურება დროებითია და ამას გვასწავლის ის დიდებული კაცი, ნოდარ დუმბაძე, რომლის სახელსაც ატარებს ეს ფესტივალი. ვინაიდან, მისი შემოქმედება სწორედ იმის შესახებ ჩემი აზრით, რომ უბედურობაში უნდა იყო მხნედ, უნდა იყო ხალისიანად და უნდა გჯეროდეს უკეთესი მომავლის“ ,- აღნიშნა საუბრის დროს თეა წულუკიანმა.
ვასილ ჩიგოგიძემ და თეა წულიკიანმა სიტყვით გამოსვლის დროს მადლობა გადაუხადეს ყველა იმ ადამიანს, რომლებიც არაფერს იშურებენ ფესტივალის ჩასატარებლად. ასევე მადლობა გადაუხადეს ფონდ “ქართუს“, ბიძინა ივანიშვილს და მის ოჯახს.
“თეატრალური ფესტივალი გაიხსნა რობერტ სტურუას სპექტაკლით და ძალიან მნიშვნელოვანია, რომ რუსთაველის თეატრის სპექტაკლი ხსნის ამ ფესტივალს და ადასტურებს უპრეცედენტოდ დიდ მასშტაბს ამ ფესტივალისა წელს, განსაკუთრებით პანდემიის შემდეგ. მე კულტურის სამინისტროს სახელით გპირდებით, რომ იმდენად წარმატებული იქნება ეს ფესტივალი, რომ მომავალ წლიდანაც ჩვენ გავაგრძელებთ სწორედ ამ ხარისხის, ამ დონისა და საერთაშორისო მასშტაბის შენარჩუნებას ოზურგეთის თეატრალურ სცენაზე“, – თქვა თეა წულუკიანმა.
ოფიციალური გამოსვლების შემდეგ სცენაზე რობერტ სტურუას “ვანო და ნიკოს“ ჩვენება შედგა. ეს სპექტაკლი ერლომ ახვლედიანის მოთხრობების მიხედვით დაიდგა.
„ემოციები არის ძალიან ამაღლებული, საღამო დაიწყო ცრემლით, რადგან არაჩვეულებრივი თოჯინური სპექტაკლი ვნახე, სადაც მამას ბიოგრაფია იყო. ბევრი ტკივილი და განცდაა მამას ბიოგრაფიაში. მე კიდევ ერთხელ დავრწმუნდი, რომ სიკეთე, რომელსაც ატარებს ნოდარ დუმბაძის შემოქმედება, არის მთავარი“, – თქვა ჟურნალისტებთან სპექტაკლის დასასრულების შემდეგ ნოდარ დუმბაძის ქალიშვილმა, ქეთი დუმბაძემ.
ნოდარ დუმბაძის სახელობის მესამე საერთაშორისო ფესტივალი 5 ივლისს გაიხსნა და 15 ივლისს დასრულდება.
ავტორი
