ადვოკატ თორნიკე მიგინეიშვილის ინფორმაციით, ფოთში დეკემბრის თვეში მთელი ქალაქის მასშტაბით ერთ-ერთი პედაგოგის პირადი ცხოვრების ამსახველი ვიდეოკადრები გავრცელდა.
უფლებადამცველის თქმით, ვიდეო-კადრების ავთენტურობა და გავრცელების წყარო, პროკურატურას დღემდე არ დაუდგენია.
ამასთან, მიგინეიშვილის თქმით, სისხლის სამართლის საქმეზე არანაკლებ მძიმე მოვლენები განვითარდა იმ საჯარო სკოლაში, სადაც მასწავლებელი ასწავლიდა.
დავიცავ დაზარალებული მასწავლებლის ინტერესებს.
ვიდეოკადრების გავრცელებამ პედაგოგს მიაყენა მძიმე მორალური ზიანი, დააზიანა მისი რეპუტაცია, პროფესიული ავტორიტეტი და პირადი ცხოვრება”- წერს მიგინეიშვილი.
პედაგოგის ინტერესების დამცველი წერს, რომ “პრობლემის მოგვარება” სკოლამ ცნობილი მასწავლებლის გათავისუფლებით გადაწყვიტა, ისე რომ პედაგოგს არ მიეცა საკუთარი პოზიციის დაფიქსირების შესაძლებლობა.
მიგინეიშვილის განცხადებით, სკოლამ მასწავლებელი კანონდარღვევით გაათავისუფლა:
არსებული ფაქტებიდან იკვეთება, რომ სკოლამ აირჩია უმარტივესი, მაგრამ უკანონო გზა – პრობლემის მოგვარება დაზარალებულის სამსახურიდან გათავისუფლებით. ნაცვლად მისი დაცვისა, სკოლამ დაიწყო პროცესები, რომლებიც მიზნად ისახავდა პედაგოგის სკოლიდან გაშვებას.
მოულოდნელად სკოლაში გაჩნდა სხვადასხვა საჩივარი მასწავლებლის წინააღმდეგ. ეს საჩივრები სკოლის დისციპლინურმა კომიტეტმა განიხილა უკიდურესად მოკლე ვადებსა და დარღვეული პროცედურებით:
პედაგოგს არ მიეწოდა საჩივრების შინაარსი;
არ მიეცა საკუთარი პოზიციის დაფიქსირების შესაძლებლობა;
კომისია ჩატარდა კვირა დღეს, სხდომის ოქმი კი სხვა დღით დათარიღდა.
30 დეკემბერს ჩემი დაცვის ქვეშ მყოფი გაათავისუფლეს სამსახურიდან.
ეს იყო ფორმალურად გაფორმებული გადაწყვეტილება, მიღებული წინასწარ განსაზღვრული შედეგით.
აღნიშნული გადაწყვეტილება უკვე გავასაჩივრეთ სკოლის სააპელაციო საბჭოში. მიუხედავად ამისა, სკოლა დღემდე უარს ამბობს მოგვაწოდოს ელემენტარული ინფორმაცია:
რის საფუძველზე დაიწყო დისციპლინური წარმოება?
რატომ წარიმართა ყველაფერი უმოკლეს ვადებში?
ვინ მიიღო გადაწყვეტილება?
რა არგუმენტებს დაეყრდნო კომიტეტი?
პოსტს თან ვურთავ იმ მინიმალურ დოკუმენტებს, რაც სკოლის ადმინისტრაციამ მოგვაწოდა.
სკოლამ უკანონო გადაწყვეტილების წაკითხვის საშუალებაც არ მოგვცა, გადაწყვეტილების მიმღებ პირთა და პროცესში მონაწილე ხალხის სახელები და გვარები კი სრულიად დაფარა.
ამ ეტაპზე საბოლოო გადაწყვეტილება უნდა მიიღოს სკოლის სააპელაციო საბჭომ. საჩივრის დაკმაყოფილებაზე უარის შემთხვევაში დავიწყებთ სასამართლო დავას ქ. ფოთის საქალაქო სასამართლოში.
ეს საქმე არ არის მხოლოდ ერთი ადამიანის ბედი – ეს არის ტესტი იმისთვის, თუ რამდენად შეუძლია საზოგადოებას დაიცვას მსხვერპლი და არ დასაჯოს ის. უსამართლობისგან ჩაგრული ყველა ადამიანი იმსახურებს გვერდში დგომას”- წერს იურისტი.
