ფოთის საკრებულოს ,,ერთიანი ნაციონალური მოძრაობის“ 4 ახლად არჩეული დეპუტატი საქართველოს მესამე პრეზიდენტის მიხეილ სააკაშვილის სამოქალაქო სამედიცინო დაწესებულებაში გადაყვანის მოთხოვნით შიმშილობას იწყებს.
“საქართველოს შეექმნა ძალიან მძიმე მდგომარეობა. ხალხი დასტრესილი დადის, ტირის, მოთქვამს, რომ ამ ე.წ. ხელისუფლების სიკვდილის ქრონიკაში მონაწილეობის მიღება არავის არ უნდა. თუკი ვინმეს კიდევ შერჩენია რაღაც და ფიქრობს, რომ რა ნაბიჯი გადადგას, მათ მივმართავთ, რომ ყველა ჩაერთეთ ამ პროცესში, 21-ე საუკუნეში სიცოცხლის შენარჩუნება არის სათხოვარი ამ უნიათო ხელისუფლებისთვის. უნდა დავიცვათ ჩვენი პრეზიდენტი, ყველა ძალა უნდა მოვიკრიბოთ ამისთვის. შიმშილობას ესენი არ შეწყვეტენ მანამ, სანამ გადაყვანილი არ იქნება მე-3 პრეზიდენტი კლინიკაში, სადაც სათანადო მკურნალობას გაუწევენ”, _ აცხადებს დარეჯან ცხვიტარია.
ცნობისთვის, მიხეილ სააკაშვილის სამოქალაქო კლინიკაში გადაყვანის მოთხოვნით 14 ნოემბერს შიმშილობა დაიწყო ნაციონალური მოძრაობის 9 დეპუტატმა. ამავე მიზეზით შიმშილობა გამოაცხადა პარტიის კიდევ ერთმა წევრმა, გიორგი ბარამიძემაც.
შიმშილობას აგრძელებს რუსთავის საკრებულოს ნაციონალური მოძრაობის 6, ხოლო ზუგდიდის საკრებულოს 5 წევრიც. ასევე შიმშილობს ,,დროას“ დამფუძნებელი, ელენე ხოშტარია, რომელიც საკანონმდებლო ორგანოში მე-15 დღეა შიმშილობს.
შეგახსენებთ, რომ ექსპრეზიდენტი უკვე 48 დღეა შიმშილობს. მიხეილ სააკაშვილი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — ამის ნაცვლად ის გლდანის ციხის სამკურნალო დაწესებულებაში იძულებით შეიყვანეს.
სტრასბურგის სასამართლომ, მხარეთა ინტერესების შესაბამისად და სასამართლო პროცედურების სწორად წარმართვისთვის, სააკაშვილს შიმშილობის შეწყვეტისკენ მოუწოდა. ამის შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.
ცნობისთვის, საქართველოს მესამე პრეზიდენტი, მიხეილ სააკაშვილი ციხეში უკვე 48 დღეა შიმშილობს.
ომბუდსმენის მიერ შექმნილმა ექსპერტთა ჯგუფმა მესამე პრეზიდენტი ციხეში 16 ნოემბერს საღამოს მოინახულა, ისინი წერილობით დასკვნას დღეს გაასაჯაროებენ.
