საქართველოს საპატრიარქოს ოფიციალურ გვერდზე სრულიად საქართველოს კათოლიკოს-პატრიარქ ილია მეორეს სამძიმრის წერილი ვრცელდება.
“ბატონ რისმაგ გორდეზიანის გარდაცვალების გამო
როგორც საქართველოს, ისე საერთაშორისო ჰუმანიტარულ მკვლევართა რიცხვს გამოაკლდა დიდი მეცნიერი, დიდი პედაგოგი, დიდი განმანათლებელი, გამორჩეული ორგანიზატორული ნიჭით დაჯილდოებული დიდი პიროვნება, ბატონი რისმაგ გორდეზიანი. კლასიკური ფილოლოგიის ასეთი მასშტაბის წარმომადგენელი დღეს აღარ ჰყავს საქართველოს.
ფრიად ვწუხვართ მისი გარდაცვალების გამო და ვუსამძიმრებთ ოჯახს, მის მიერ დაარსებულ კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტს, სახელმწიფო უნივერსიტეტს, ეროვნულ აკადემიას და მის მრავალრიცხოვან მოწაფეებსა და აღზრდილებს, ყველას, ვისთანაც იგი თანამშრომლობდა და ვისთვისაც ძვირფასია ამ შესანიშნავი ადამიანის ღვაწლი და შრომა.
მოხარული ვართ, რომ მას ბოლო წლებში ურთიერთობა ჰქონდა საქართველოს საპატრიარქოსთანაც.
აღვავლენთ ლოცვებს ბატონი რისმაგის სულისათვის, რათა უფალმან სავანესა თვისსა დააწესოს მისი უკვდავი სული, ხოლო თქვენ მოგმადლოთ მშვიდობა და ძალა მარადისობაში დასამკვიდრებლად ბატონი რისმაგისთვის ლოცვითი შეწევნისა”,_ წერია პატრიარქის სახელით გავრცელებულ სამძიმრის წერილში.
