უკვე ცნობილია, რომ საქართველოს ჩემპიონატის პროლიგა-2-ის გათამაშება ორი მარტიდან აიღებს სტარტს. როგორც გავარკვიეთ, ამ ლიგაში მოასპარეზე ლანჩხუთის „გურია“ 20 იანვრიდან გეგმავს შეკრებას გრიგოლეთის ბაზაზე. კლუბში ცვლილებები რომ იქნება, ეს ცხადია, თუმცა, ჯერჯერობით, უცნობია, ვინ დატოვებს კლუბს. როგორც ჩანს, გუნდის მთავარი მწვრთნელი თენგიზ პატარაია სწორედ საწვრთნელ შეკრებაზე შეარჩევს სასურველ ფეხბურთელებს.
ამ ეტაპისთვის ცხადი ხდება, რომ „გურიაში“ დაბრუნების გადაწყვეტილება მიიღეს ადგილობრივებმა _ გიგა ჭეიშვილმა და რატი იმერლიშვილმა. გიგა წინა სეზონში ფოთში ირჯებოდა, რატი კი _ბორჯომში. ასევე გადაწყვეტილი საქმეა, რომ კლუბში დაბრუნდება თორნიკე მოსიაშვილი, რომელიც შარშან ერთი ხანი „ჩიბათში“ წარმატებით თამაშობდა. ცნობილია, რომ „გურიას“ რიგებს შეემატება მცველი ნიკა ყურშავიშვილი „ცხინვალიდან“ და ნახევარმცველი გოგი გოგიჩაიშვილი სამგურალიდან.
პირველ სპარინგ-შეხვედრაში კი ლანჩხუთურ კლუბს მეტოქეობას ქუთაისის „ტორპედო“ გაუწევს და ეს შეხვედრა 25-26 იანვრისთვის უნდა შედგეს. ჩემპიონატის სატურნირო კალენდრის მიხედვით კი ჩვენებურებს პირველი შეხვედრა სამ მარტს თელავში ექნებათ გასამართი, შემდეგ კი რვა მარტს ლანჩხუთში ეროვნული ლიგიდან დაქვეითებულ „სამტრედია“ უმასპინძლებენ. 14-ში კი ასევე გასულ სეზონში ზედა ლიგაში მოტამაშე მეზობელ ფოთს ესტუმრებიან, 29 მარტს კი „გაგრას“ დაუხვდებიან შინაურ კედლებში.
ძალიან ცუდი ამბავია, რომ „გურია“ გათამაშებას მინუს სამი ქულით დაიწყებს. საქმე ისაა, რომ კლუბმა ვერ შეასრულა ის ვალდებულება, რაც მომჩივანი ბრაზილიური კლუბის წინაშე აიღო და არსებული დავალიანება დროულად ვერ დაფარა. ბრაზილიელებმა ფიფაში იჩივლეს, ფიფამ კი ქართულ მხარეს „გურიას“ ამ ფორმით დასჯის რეკომენდაცია გამოუგზავნა.
რაც შეეხება გაურკვევლობითა და ბუნდოვანებით აღსავსე ამ ვალს, როგორც კლუბში გვითხრეს, ბრაზილიური კლუბისთვის გადასარიცხი პირველი ტრანში-10 ათასი ევრო, საბანკო ანგარიში უზუსტობის გამო, უკან დაბრუნდა და მას შემდეგ, რაც ბრაზილიელთა მხრიდან მოხდა დაზუსტებული ინფორმაციის გადმოგზავნა, თანხა ხელახლა გაიგზავნა და უახლოეს ხანში ნარჩენი ვალიც გაიგზავნება. რაც შეეხება ფიფას მიმართ ხუთი ატაი შვეიცარული ფრანკის ოდენობის დავალიანებას, კლუბის ხელმძღვანელობის ინფორმაციით ეს თანხა სრულად დაფარულია.
