ოზურგეთის საკრებულოს სხდომაზე, წლის ბიუჯეტის განხილვის დროს, ნაციონალმა დეპუტატმა ბესო ქათამაძემ ოზურგეთის მუნიციპალიტეტის მერის, ავთანდილ თალაკვაძის მისამართით დასვა კითხვა:
_ოზურგეთის მუნიციპალიტეტის მერიის ფინანსური მომსახურება წელიწადში, თუ იცით რამდენია?
იგივე კითხვით მიმართა საფინანსო სამსახურის უფროსს, გია მამაკაიშვილს.
როცა პასუხი ვერ მიიღო, თავად დაიწყო საუბარი:
_წელიწადში მუნიციპალიტეტის მომსახურება ჯდება ერთი მილიონ 400 ათასი ლარი. ახლა ხელფასებს ზრდით ნახევარი მილიონით. ანუ წელიწადში მხოლოდ თქვენ გჭირდებათ 24 მილიონი. 80 პროცენტი ბიუჯეტიდან თქვენი ხარჯია. ამომრჩევლებს, ხმა მოგვეცითო, რომ თხოვდით, ეს უთხარით, ასე ვიზამთო?
ნაციონალმა დეპუტატებმა ბიუჯეტში ნახევარი მილიონით სახელფასო ფონდის გაზრდა, სოციალური პროგრამების დაფინანსების ფონზე, უფრო გამეტებულად მიიჩნიეს.
შალვა თავდიშვილმა სხვა მიმართულებით დასვა კითხვა:
_ინტერნეტი ჩართეთ, ბავშვებს ინტერნეტი არ აქვთ. კი, ბატონო თქვენ (ღურჯუმელიძეს მიმართა) გაასწორებინეთ… მაგრამ ვინ იყო ის ხალხი, 50 მილიონიდან რომ 30 მილიონი ჯიბეში ჩაიდეს? სამთავრობო ხალხი იყო, ქართული ოცნების ხალხი იყო. ჩვენ კი ინტერნეტი არ გვაქვს.
_როგორ დათვალე ასე, _ ჰკითხა ღურჯუმელიძემ.
_როგორ და ჭრელად, ძმაო! მაგის მეტს რას დაგითვლით…ფულების დარიგება და სიცრუე გაკლიათ თქვენ? კითხეთ ერთი ბატონ ავთოს რამდენი ათასის „ბაკი“ მოიტანა ხალხის მოსასყიდად ძიმითში, თირის უბანში, ბაბასქკურის უბანში…? სასამართლოში იუარეთ და გაგივიდათ, არა? _ ცხარობდა თავდიშვილი.
ხმაური მალე პიროვნულ შეურაცხყოფაში გადაიზარდა.
-დღეს პირველი შეხვედრაა და არ მინდოდა ასე დამეწყო, მაგრამ არ გრცხვენიათ ახლა მაქ რომ ზიხართ და მერს რომ გიწოდებენ? რომ დააშინეთ, ამდენი ფული, რომ იხადეთ ხალხის მოსასყიდად, გზაჯვარედინზე, ოთხივე მხარეს რომ ისხდნენ თქვენი კოორდინატორები, 11 წლის ბავშვები რომ გამოიყენეთ ბინძურად წინასაარჩევნოდ, ამ ყველაფრის არ გრცხვენიათ?!”– ასე მიმართა ნაციონალმა დეპუტატმა, გოჩა შარაშენიძემ ავთანდილ თალაკვაძეს.
“ოცნების” დეპუტატებმა უზრდელი და ცრუ უწოდეს შარაშენიძეს.
_შენი შვილის საკითხით რომ აპელირებ, შენს შვილს კითხე რატომ გააქციე სახლიდან. მართლა ყველანაირ ზღვარს გასული კაცი ხარ,– წინა რიგებიდან დაუძახა მარიკა ჩხიკვიშვილმა შარაშენიძეს.
_ვინ ახსენა შვილი? 700 ათასი კაცი გააქციეთ. უზრდელი დედაშენს და მამაშენს უძახე, სახლში რომ მიხვალ. მამის ტოლ კაცს მეძახი. მართლა უზრდელო ქალო… პირადულზე თუ წავიდა, ისეთები მაქვს სათქმელი, წამოსაძახებელი, _ იყვირა შარაშენიძემ
„ჩემი შვილი გამიქციეთო, ეს თქვა. ამიტომ გავეცი პასუხი, თორემ არ ვაპირებდი” – თქვა ჩხიკვიშვილმა.
შალვა თავდიშვილმა კვლავ მოითხოვა მერისგან პასუხის გაცემა, სოფელ ძიმითში საარჩევნოდ მიტანილი წყლის ავზების თანხის წარმომავლობის შესახებ.
_თავისით მოფრინდა? საიდან მოვიდა, გვითხარით, _ დაჟინებით ითხოვდა ის პასუხს.
პასუხად კი ოცნების მხარე კვლავ სასაცილოებს და მასხარებს უწოდებდა მათ.
[sexy_author_bio]
