“პირველად ვარ სასოწარკვეთილი, ხალხო, ეს ბავშვებს ჭირთ” _ ნარკოლოგი

ნარკოლოგი ზურა სიხარულიძე სოციალურ ქსელში მორიგ პოსტს ავრცელებს. ნარკოლოგი არასრულწლოვნებში ნარკოდამოკიდებულებაზე საუბრობს და გამოსავალს ეძებს.

“დავწერე, წავშალე ბევრჯერ. არ ვიცი, რა ხდება ჩვენს თავს ასეთი უბედურება. ერთი კვირა დასტრესილი დავდივარ და არ ვიცი, რა გავაკეთო, რა მოვიმოქმედო, ვის ვუთხრა, რა გამოსავალი არის ამ სიტუაციიდან?

მე თუ კიდე რამე გამაკვირვებდა, არ ვიცოდი, იმდენი რამე მაქვს ნანახი, მაგრამ ეს ორი კვირაა ისე დაემთხვა, რომ რამდენიმე პაციენტი ვნახე, ძაან პატარები ასაკით. ნარკოტიკზე დამოკიდებული, უმძიმესი დამოკიდებულების ფორმის, ქცევის და პიროვნული აშლილობებით,

ზოგის ისტორია მოვისმინე და მივხვდი, რომ ძალიან სერიოზულ უბედურებაში ვართ, ხვალ კიდე უარესი გველის, ეს არ გაჩერდება, მე მგონი და არც ვიცი რა უნდა გავაკეთოთ. რის ბრალია მკითხავთ _ კი აი იმის რაც ხდება, სრული ქაოსი ქუჩაში, სახლებში, დანგრეული ოჯახები, გაურკვეველი ქცევა, რომელიც რას ჰგავს არ ვიცი. რა სახელი დავარქვა, ბულინგი, აგრესია, ვითომ მოჩვენებითი თავისუფლება.

ხალხო, ეს ბავშვებს ჭირს 15,18, 19 წლის ბავშვებს!!!

არ ვიცი, რა უნდა გავაკეთოთ. მე ცოტა შევიშალე, მგონია, ამის მოსმენით და ყურებით და არც ვიცი, როგორ უნდა დავეხმარო, ოღონდ მართლა.

ერთი ვიცი ზუსტად, რომ თუ ქვეყანაში ცოტა არ დალაგდა სიტუაცია, არ დამთავრდა ეს გაურკვევლობა და არ მიეხედა საზოგადოების მენტალურ ჯანმრთელობას, ეს ძალიან მძიმე შედეგებს მოგვიტანს შემდეგ 5 წელიწადში.

აღარაფერს ვამბობ პანდემიის შედეგებზე, რომელსაც კიდე წინ აქვს პოსტკოვიდურ პერიოდში -ალკოჰოლიზმი, ნარკომანია, ქცევითი და ფსიქიკური აშლილობები. ეს კიდევ წინ გვაქვს.

პირველად სასოწარკვეთილი ვარ და მართლა, არ ვიცი, რა უნდა ვუშველოთ ამას ყველაფერს. ბეწვის ხიდზე დავდივართ და ჩვენი შვილების და შვილიშვილების ჯანმრთელობაზეა საუბარი _ მენტალურ ჯანმრთელობაზე“, _ წერს ნარკოლოგი.