“მმართველობის მონიტორინგის ცენტრი”, რომლის ძირითად მიზანსაც საბიუჯეტო ორგანიზაციების ხარჯების მონიტორინგი და მიზნობრიობის დადგენა წარმოადგენს, ოზურგეთის მუნიციპალიტეტის მერს კორუფციაში ადანაშაულებს. ამის შესახებ ორგანიზაციის ფეისბუქგვერდზე წერია.
“2019-2020 წლებში, მას შემდეგ, რაც კონსტანტინე შარაშენიძე ოზურგეთის მერი გახდა, მისი ბიძაშვილის კომპანიამ 187 ათასი ლარი ტენდერის გარეშე, პირდაპირი შესყიდვით მიიღო, ხოლო 2013 წლიდან კომპანიას 658 ათასი ლარი აქვს მიღებული.
ოზურგეთის მერი ფაქტს არ უარყოფს: “გოგუაძეს უნდა გაეკეთებინა ეგ სამუშაოები შე შტერო, აბა, სხვა ხო არ გააკეთებდა… დათოიე გოგუაძე ყველას უყვარს, აქანე ვინც არის”, – ასე უპასუხა საკრებულოში დასმულ შეკითხვას.
ოზურგეთში ყოველი მე-6 ადამიანი უკიდურეს სიღარიბეში ცხოვრობს”, _ წერს “ფლანგვის დეტექტორი.
“გურია ნიუსი” კომენტარისთვის ოზურგეთის მუნიციპალიტეტის მერს დაუკავშირდა.
მერმა პასუხის გასაცემად კაბინეტში დაგვიბარა.
“ვინ იცის, მე რა შემოსავალი მაქვს. მობრძანდით ჩემთან კაბინეტში და გაგარკვევთ. ტელეფონით რა გელაპარაკოთ”, _ გვითხრა კონსტანტინე შარაშენიძემ.
