საპატრულო პოლიციის მიერ გუშნ დაკავებული ჩოხატაურის საკრებულოს სოციალურ საკითხთა კომისიის თავმჯდომარის ვლადიმერ სიხარულიძის სასამართლო პროცესი 13 აგვისტომდე გადაიდო.
როგორც საკრებულოს დეპუტატმა გვითხრა, ამის მიზეზი საპატრულო პოლიცია იყო:
_ მათ ვერ წარმოადგინეს მტკიცებულებები და აღნიშნეს, რომ აქვთ სამსაათიანი ჩანაწერი, რომლის დამონტაჟებას დროს უნდა. ამის გათვალისწინებით მოსამართლემ პროცესი გადადო, _ გვითხრა სიხარულიძემ.
შეგახსენებთ, რომ სიხარულიძე საპატრულო პოლიციის თანამშრომლებმა ადმინისტრაციული შენობის წინ, იმ დროს გააჩერეს, როცა ავტომობილი სამსახურეობრივ სადგომზე დააყენა.
სიხარულიძის თქმით, საპატრულო პოლიციის თანამშრომლებმა მას ღვედის გამოუყენებლობის გამო ჯარიმა დაუწერეს:
_ ავტომობილი რომ გავაჩერე მერე მოვიდნენ და მითხრეს, რომ ღვედი არ მეკეთა და უნდა დავეჯარიმებინე. სიმართლე გითხრათ გავღიზიანდი, რადგან პატრული კვირაში ხუთჯერ მაინც მაჩერებს სხვადასხვა მიზეზით. სავარაუდოდ, ვიღაცის დავალებას ასრულებენ, რადგან ცემს ავტომობილს აჩერებენ მაშინაც კი, როცა სხვა მართავს.
ეს ვუთხარი კიდეც პატრულის თანამშრომლებს და კონფლიქტის თავიდან აცილების მიზნით დავუტოვე საბუთები, ვუთხარი რომ დაეწერათ ჯარიმა და ღია ავტომობილში დაეტოვებინათ დოკუმენტაცია. ამის შემდეგ სამსახურში, ჩემს ოთახში ავედი, _ აღნიშნავს სიხარულიძე.
მისივე მონათხრობის თანახმად, ამ ინციდენტიდან დაახლოებით 15 წუთში ეზოში ხმაური გაიგონა და პმის ავტომობილთან თავმოყრილი ხალხი დაინახა:
_ ჩავედი იმ დროს, როცა პატრულს ევაკუატორი ყავდა გამოძახებული და ჩემი ავტომობილი მიყავდათ. რომ ვკითხე რატომ აკეთებდნენ ამას პასუხი არ გამცეს. ამ დროს მოგვივიდა შელაპარაკება. ვუთხარი, რომ ამ დავალების გამცემი ადამიანი უსინდისოა და რომ ეს ერთხელ და სამუდამოდ უნდა დასრულებულიყო. ამის შემდეგ კი დამაკავეს, _ გვითხრა სიხარულიძემ.
დაკავებული საკრებულოს მაღალჩინოსანი პატრულმა ოზურგეთში წაიყვანა, თუმცა სოფელ გორაბერეჟოულის გადასახვევიდან ის უკან მოაბრუნეს _ მიზეზი ამ დრომდე დაუდგენელია. მიუხედავად მრავალგზის მცდელობისას საპატრულო პოლიციის თანამშრომლებმა „გურია ნიუსს“ არ უთხრეს თუ რატომ მოაბრუნეს დაკავებული ადამიანი უკან. საპატრულო პოლიციის თანამშრომელმა იაზონ ვერულიძემ მხოლოდ ის გვითხრა, რომ სიხარულიძემ მას სიტყვიერი შეურაცხყოფა მიაყენა და სწორედ ამის გამო დააკავეს ადმინისტრაციული წესით.
დაკავებული სიხარულიძე საპატრულო პოლიციის თანამშრომლებს ჩოხატაურის ადმინისტრაციული შენობის წინ 2 საათზე მეტი ჰყავდათ გაჩერებული. პატრულის თანამშრომლებმა განმარტეს, რომ ამის მიზეზი სიხარულიძის ავტომობილი იყო, რომელიც ევაკუატორს უნდა წაეყვანა. თუმცა, ევაკუატორის მოსვლის შემდეგ, ერთ საათზე მეტი, ვლადიმერ სიხარულიძე მაინც საპატრულო პოლიციის ავტომობილში ჰყავდათ:
_ წამიყვანეთ. ხომ დამაკავეთ. ცირკს აყურებინებთ ამ ხალხს თუ რა ხდება?_ აღელვება არ დაუმალავს საკრებულოს წევრს.
ამ ინციდენტს ათობით თვითმხილველი ჰყავს, რომლებიც სიხარულიძის მსგავსად პატრულის თანამშრომლებს მოუწოდებდნენ, რომ დაკავებულის ჯანმრთელობას გაფრთხილებოდნენ და ადამიანი, რომელიც მთელს ჩოხატაურში გამოირჩევა პატიოსნებით, სასაცილოდ არ აეგდოთ.
_ ასე როგორ შეიძლება? არ გრცხვენიათ? თუ დააკავეთ წაიყვანეთ. რა წესია 3 საათი მანქანაში გამოკეტვა ადმინისტრაციულ შენობასთან. აქ ხალხი დადის და სეირობს, _ მიმართავდნენ თვითმხილველები პატრულის თანამშრომლებს.
ამ ხმაურის და ბევრი მოწოდების შემდეგ, 11 საათზე დაკავებული ვლადიმერ სიხარულიძე 2 საათისთვის ოზურგეთში გადაიყვანეს.
ამ დროისთვის, შინაგან საქმეთა სამინისტროს პრესსამსახურმა განგვიმარტა, ვლადიმერ სიხარულიძე დაკავებული იყო ადმინისტრაციულ სამართალდარღვევათა კოდექსის 173-ე მუხლით, რაც სამართალდამცავის კანონიერი განკარგულებისადმი ან მოთხოვნისამდი დაუმროჩილებლბას, ან აპირის სიტყვიერ შეურაცხყოფას გულისხმობს, რომელიც ისჯება ჯარიმით 1000 ლარიდან 4000 ლარამდე, ან ითვალისწინებს ადმინისტრაციულ პატიმრობას 15 დღემდე.
ამის შემდეგ მოვლენები ასე განვითარდა _ ოზურგეთში, საპატრულო პოლიციის შენობასთან მიყვანილი სიხარულიძე ცუდად გახდა და სასწრაფო დახმარების ავტომობილით „მედალფას“ კლინიკაში გადაიყვანეს.
კლინიკის დირექტორის დავით მდინარაძის თქმით, პაციენტი, რომელსაც შულტირება აქვს გაკეთებული, საავადმყოფოში მაღალი არტერიული წნევით შეიყვანეს.
სიხარულიძე საავადმყოფოში გვიან ღამემდე დატოვეს. დაახლოებით 8 საათზე, საპატრულო პოლიციამ ის ხელწერილით გაათავისუფლა, რომლის თანახმადაც, ის ოთხშაბათს 11 საათზე სასამართლოში გამოცხადდებოდა.
ამის პარალელურად კი, სიხარულიძე საავადმყოფოში შინაგან საქმეთა სამინისტროს გენერალური ინსპექციის თანამშრომლებმა დაკითხეს, რომლებსაც საპატრულო პოლიციის თანამშრომლების შესაძლო გადაცდომის თაობაზე მისმა ახლობლებმა აცნობეს.
სიხარულიძემ გენინსპექციის გამომძიებელს სამშაბათს განვითარებული მოვლენები დეტალურად აღუწერა და არც იმის თქმა დავიწყებია, რომ საპატრულო პოლიციის თანამშრომლები მას დიდი ხანია სდევნიან და ავიწროებენ. გაიხსენა ისიც, რომ 2011 წელს, პატრულის თანამშრომლებმა იგივე ბრალდებით დააკავეს და მაშინ მის ახლობლებს წამალიც კი არ შეატანინეს:
_ მაშინ „ნაციონალური მოძრაობა“ იყო ხელისუფლებაში. ბრალდებაში ჩამიწერეს რომ პატრულს შეურაცხყოფა მივაყენე და თურმე ენა გამოვუყავი. შემდეგ ხელისუფლება შეიცვალა, თუმცა, პატრული ისევ აგრძელებს ჩემს შეურაცხყოფას, დევნას. უკვე მრცხვენია. პატარა ბავშვი ხომ არ ვარ ყველა ფეხის ნაბიჯზე გამაჩერონ. გასულ წელს, „გურია ნიუსის“ რედაქციის წინ გამაჩერეს _ გინდა თუ არა მთვრალი ხარო. „გურია ნიუსმა“ გამოაქვეყნა კადრები, თუ როგორ მომექცნენ. სამჯერ ჩამაბერინეს აპარატზე. ამის შემდეგაც ბევრჯერ გამაჩერეს. ბოლოსდაბოლოს ხომ უნდა დასრულდეს ეს ყველაფერი, _ უთხრა სიხარულიძემ გენერალური ინსპექციის თანამშრომლებს, რომელთა განმარტებით უწყება ყველა დეტალს მოიკვლევს.
ამავე თემაზე: ხმაური ჩოხატაურის ადმინისტრაციულ შენობასთან _ დაკავებულია საკრებულოს წევრი
