,,თუ ევროკავშირი მესამე მსოფლიო ომს დაიწყებენ, ჩვენს უფლებებს ნებისმიერი იარაღით დავიცავთ”, _ ამის შესახებ პოლონეთის პრემიერ-მინისტრმა, მატეუშ მორავეცკმა გაზეთ The Financial Times-თან მიცემულ ინტერვიუში განაცხადა.
მისი თქმით, ბრიუსელს დისკრიმინაციული და დიქტატორული ტიპის მიდგომა აქვს.
„რა მოხდება, თუ ევროკომისია მესამე მსოფლიო ომს დაიწყებს? თუ ისინი მესამე მსოფლიო ომს დაიწყებენ, ჩვენს უფლებებს ნებისმიერი იარაღით დავიცავთ. თუ ვინმე სრულიად უსამართლოდ მოგვექცევა, ჩვენ ყველანაირად დავიცავთ თავს. ჩვენ მივიჩნევთ, რომ ბრიუსელის მხრიდან ეს უკვე დისკრიმინაციული და დიქტატორული ტიპის მიდგომაა, მაგრამ თუ არსებული ვითარება კიდევ უფრო გაუარესდება, უნდა ვიფიქროთ ჩვენს სტრატეგიაზე“, _ განაცხადა პოლონეთის პრემიერ-მინისტრმა.
მატეუშ მორავეცკიმ ბრიუსელს მოუწოდა, უარი თქვას იურიდიული და ფინანსურის სანქციებით მუქარაზე, თუ პოლონეთთან უთანხმოების მოგვარება სურს.
ცნობისთვის, 7 ოქტომბერს, პოლონეთის საკონსტიტუციო სასამართლომ ქვეყნის კონსტიტუციის ევროკავშირის კანონმდებლობაზე უპირატესობა დაადასტურა. საკონსტიტუციო სასამართლომ თავის განჩინებაში, ასევე, აღნიშნა, რომ ის უფლებამოსილია არა მხოლოდ ევროკავშირის კანონის კონსტიტუციურობა, არამედ ევროკავშირის სასამართლოს გადაწყვეტილებების კონსტიტუციურობაც შეამოწმოს.
რომლის შემდგომ, ევროკომისიის პრეზიდენტმა, ურსულა ფონ დერ ლაიენმა განაცხადა, რომ ევროკომისია ყველაფერს გააკეთებს იმისათვის, რომ ევროკავშირის კანონის უზენაესობა უზრუნველყოს.
ევროკომისიის პრეზიდენტის აღნიშნული განცხადების შემდგომ, 18 ოქტომბერს, პოლონეთის პრემიერ-მინისტრმა ევროკავშირის ლიდერებისთვის გაგზავნილ წერილში განაცხადა, რომ პოლონეთი ევროკავშირის ერთგული წევრია, თუმცა ძალაუფლების ჭარბ ცენტრალიზაციას ეწინააღმდეგება.
19 ოქტომბერს კი, პოლონეთის პრემიერმა ევროკავშირი კომპეტენციის გადაჭარბებაში დაადანაშაულა.
„ევროკავშირის კომპეტენციას მკაფიო საზღვრები აქვს. ჩვენ არ უნდა ვიყოთ ჩუმად, როდესაც ეს საზღვრები ირღვევა. ჩვენ ვამბობთ: კი ევროპულ უნივერსალიზმს, მაგრამ არა ევროპულ ცენტრალიზმს“, _ აღნიშნა მატეუშ მორავეცკიმ.
[sexy_author_bio]
