„გურია ნიუსის“ ინფორმაციას, მეორე მსოფლიო ომში დაღუპული სილოვან მაქსიმეს ძე ტრაპაიძის ნეშტის აღმოჩენის შესახებ კარელიაში, ძმისშვილი თამუნა ტრაპაიძე გამოეხმაურა. მანამდე რდაქციაში შეტყობინება შემოვიდა ოზურგეთელი ქალბატონის, ნანა ტრაპაიძის მიერ, რომელიც ამჟამად რუსთავში ცხოვრობს:
„მოგესალმებით. „გურია ნიუსის“ პოსტი გავაზიარე და გამომეხმაურა მამაჩემის ბიძაშვილისშვილი თამუნა ტრაპაიძე. მისი ბიძა ყოფილა, ფინეთის ომში დაღუპული. ჩემი სისხლი და ხორცი. მარი, დამირეკე. დაკავშირება უნდა შენთან ჩემს ბიძაშვილს-თამუნა ტრაპაიძეს. გადმოვასვენებ აუცილებლადო და თავის მშობლებთან დავკრძალავო. მეორე ძმაც ჰყოლია სილოვანს ომში დაღუპული. ბაბუას ბიძაშვილის შვილი იყო და მე ზუსტად არ ვიცოდი. როგორ გვიხარია, ძალიან დიდი მადლობა… მე წუხელ არ მიძინია ემოციისგან. თამუნას მამა 1930-იან წლებში იყო დაბადებული, თვითონ თამუნა 1973 წელსაა დაბადებული, კოტე ბიძია მამას ბიძათაშვილი იყო. ბაბუაჩემის -აკაკის ბიძაშვილის შვილი. ერთი განაყოფი ვართ. სილოვანი კოტეს უფროსი ძმა იყო-1916 წელს დაბადებული და ფინეთის ომში გაიწვიესო, ასევე დღუპული ჰყოლია კოტე ბიძიას მეორე უფროსი ძმა-ალფესი, ომში. ყველაფერი ზუსტია, გვიხარია…_ გვწერს ქალბატონი ნანა.
შემდეგ კი შეტყობინება მივიღეთ სილოვან მაქსიმეს ძე ტრაპაიძის ძმისშვილისგან, თამუნა ტრაპაიძისგან:
„გამარჯობა! პოსტი გედოთ ჯარისკაცის ნეშტი იპოვეს… ის ჩემი ბიძაა, მამაცემის ძმა! დიდება უფალს…ფინეთის ომში დაკარგულად ითვლებოდა…დამირეკა ახლა ჩოხატაურის მერის წარმომადგენელმა. მკითხა ყველაფერი და რა იქნება საჭირო, მე აქ ვარ…სასწაული ამბავია…ძალიან ემოციებში ვარ! 85 წელია გასული…დიდება უფალს!“
როგორც ვწერდით, „გურია ნიუსის“ რედაქციას მოაწოდეს, რუსეთში მოქმედი ფონდ „მემორიალის“ ჯგუფის ინფორმაცია. მასში ნათქვამია, რომ კარელიაში აღმოაჩინეს მეორე მსოფლიო ომის დროს დაღუპული 48 ქართველი ჯარისკაცის , მებრძოლების სამარხები და ნეშტი. მათ შორის კი არის ჩოხატაურელი ჯარისკაცის სილოვან მაქსიმეს ძე ტრაპაიძის ნეშტი, რომელიც აქ 24 წლის ასაკში დაღუპულა. ის ყოფილა 204-ე საჰაერო-სადესანტო ბრიგადის ჯარისკაცი.
სასიხარულოა, რომ დაკარგული ჯარისკაცის ძმისშვილი გამოგვეხმაურა. ვიმედოვნებთ, უცხო მიწაზე 85 წლის წინ დაღუპული ქართველი ჯარისკაცის , ჩოხატაურელი 24 წლის ასაკში დაღუპული სილოვან მაქსიმეს ძე ტრაპაიძის ნეშტს, როგორც ახლობლებმა თქვეს, გადმოასვენებენ და სურებში, მშობლების გვერდით დაკრძალავენ.
