აშშ-ში ელჩის კანდიდატურა შერჩეული გვყავს, ჩვენ მზად ვართ დღესვე კომუნიკაციისთვის და ველოდებით შემხვედრ ნაბიჯებს, – ამის შესახებ პრემიერ-მინისტრმა ირაკლი კობახიძემ განაცხადა. ამასთან, ხელისუფლებას იმედი აქვს, ურთიერთობა არა მარტო დაუბრუნდება სტრატეგიული ურთიერთობის ჩარჩოს, არამედ „კონკრეტული დღის წესრიგით გამდიდრდება”. აშშ-საქართველოს ურთიერთობების აღგენასა და გაჯანსაღების შესახებ ანალიტიკოსების მოსაზრებები სხვადასხვგვარია.
„ოცნების” მოლოდინი, რომ ტრამპის ადმინისტრაციის პირობებში აშშ-საქართველოს ურთიერთობები აღდგება, არარელისტურია. ამ თემის კვლავ შემობრუნებას კი თავისი მიზანი აქვს”, – განაცხადა შავი ზღვის საერთაშორისო უნივერსიტეტის პროფესორმა ნიკა ჩიტაძემ „რეზონანსთან”.
ანალიტიკოს რამაზ საყვარელიძის აზრით კი, პირიქით, ეს სავსებით რეალურია: „ღმერთმა დაგვიფაროს, რომ არ გვქონდეს საქართველო-ამერიკის ურთიერთობის აღდგენის იმედი. ელჩის დანიშვნის შემდეგ ეს კავშირები უფრო გააქტიურდება”.
„შეგვიძლია გითხრათ, რომ აშშ-ში ელჩის კანდიდატურა შერჩეული გვყავს. უფრო მეტიც, პროცესებიც არის დაწყებული და იმედი გვაქვს, რომ ეს პროცესები მალე მივა ბოლომდე. ამ ინფორმაციას საჯაროდ გავუზიარებთ საზოგადოებას მოგვიანებით, როდესაც გვექნება შემდგომი ნაბიჯები ამ პროცედურებში. ჩვენ მზად ვართ დღესვე კომუნიკაციისთვის და ველოდებით შემხვედრ ნაბიჯებს”, – განაცხადა პრემიერ-მინისტრმა.
მისივე თქმით, „ოცნებისთვის” ამერიკასთან სტრატეგიული პარტნიორობის აღდგენა მნიშვნელოვანია.
„ამერიკის შეერთებულ შტატებთან სტრატეგიული პარტნიორობის დაწყება სუფთა ფურცლიდან არის ჩვენი ერთ-ერთი უმთავრესი საგარეო პოლიტიკური პრიორიტეტი, ამ კუთხით, რა თქმა უნდა, მნიშვნელოვანია ის შეხვედრა, რომელიც შედგა ჩვენს საგარეო საქმეთა მინისტრსა და ქალბატონ ელჩს შორის.
„ჩვენ მანამდე გავაკეთეთ არაერთი საჯარო განცხადება იმასთან დაკავშირებით, რომ ჩვენი სურვილია, სრულებით გადაიტვირთოს ურთიერთობები, სუფთა ფურცლიდან დავიწყოთ სტრატეგიული პარტნიორობა და არა მარტო დავიწყოთ, არამედ ეს გავაკეთოთ კონკრეტული გზამკვლევით, სადაც ასახული იქნება კონკრეტული ამოცანები და ორივე ქვეყნისთვის მნიშვნელოვანი პრიორიტეტები. ასე გვესახება ჩვენ სტრატეგიული პარტნიორობის აღდგენა საქართველოსა და აშშ-ს შორის. ვფიქრობ, რომ არის ღირებულებითი თანხვედრა. გახსოვთ, რას ვლაპარაკობდით გასული სამი წლის განმავლობაში და ახლა ზუსტად იგივე გზავნილებით საუბრობს აშშ-ის ახალი ადმინისტრაცია პრაქტიკულად ყველა თემაზე არის თანხვედრა ხედვებს შორის, ეს არის საჯარო მოცემულობა, რასაც ყველა ხედავს. დანარჩენი, ვფიქრობ, დამოკიდებულია იმაზე, როგორი ნაბიჯები გადაიდგმება ორივე მხრიდან. ჩვენი მხრიდან არის სრული მზაობა”, – განაცხადა კობახიძემ.
კობახიძემ აღნიშნა, რომ აშშ-ის ელჩთან შეხვედრა საგარეო საქმეთა მინისტრის ინიციატივა იყო და ის მალევე შედგა.
„რაც შეეხება ქართულ-ამერიკულ ურთიერთობებს, თანხვედრა არსებობს, მთავარია, კონკრეტული ნაბიჯები გადაიდგას. ეს ყველაფერი დიდწილად დამოკიდებული იქნება იმაზე, თუ რამდენად დამარცხდება საბოლოოდ „დიფ სტეიტი” აშშ-ში. კვლავაც არის პრობლემები და „დიფ სთეითის” სერიოზული გავლენა. თუ მოხერხდება მისი დამარცხება სრულად თუ თვისებრივად, ვფიქრობ, ამ შემთხვევაში ვერაფერი დაუდგება წინ ქართულ-ამერიკული ურთიერთობების გადატვირთვას”, – აღნიშნა პრემიერმა.
ასევე, კობახიძის თქმით, ნებისმიერ შემთხვევაში ურთიერთობების გადატვირთვა უნდა დაეფუძნოს ორმხრივ ინტერესებს.
„ვინმეს თუ აინტერესებს, მაკა ბოჭორიშვილისა და რობინ დანიგანის შეხვედრაზე საუბარი იყო თუ არა რიგგარეშე არჩევნებზე და ასეთ თემებზე, არავითარი ასეთი საუბარი არ ყოფილა. საქმე ეხებოდა არსებითად ზოგად სახელმწიფოებრივ საკითხებს. ბუნებრივია, აშშ არის სუპერ სახელმწიფო, ყველაზე ძლიერი მსოფლიოში და რა თქმა უნდა, ის ურთიერთობებს ნებისმიერ ქვეყანასთან უყურებს საკუთარი ინტერესების პრიზმიდან. ეს აბსოლუტურად ნორმალურია და ამას ჩვენ ანგარიში უნდა გავუწიოთ. ჩვენც გვაქვს ჩვენი ინტერესები და ამას მკაფიოდ გავაცნობთ აშშ-ის ახალ ადმინისტრაციას, მით უმეტეს იმ ფონზე, რაც გამოვიარეთ გასული სამი წლის განმავლობაში. თქვენ ხედავდით, როგორ გვემტერებოდა კონკრეტული ადმინისტრაცია. ისინი, სამწუხაროდ, მოქმედებდნენ სახელმწიფოს სახელით, მაგრამ იყო კონკრეტული ადმინისტრაცია, რომელიც გამოირჩეოდა პირდაპირ მტრული საქმიანობით ჩვენი ქვეყნის მიმართ. ეს აისახა კონკრეტულ მტრულ გადაწყვეტილებებში, როგორიც იყო უმაღლესი თანამდებობის პირების სანქცირება და ა.შ. არაფერს ვამბობ იმ ქმედებებზე, რაც დაკავშირებული იყო საქართველოში ვითარების არევის მცდელობასთან, რაც უკავშირდება ომის იდეას, მეორე ფრონტის გახსნას და ა.შ. უამრავი პრობლემა იყო. ამ ფონზე ჩვენ გვექნება ჩვენი გზავნილები პრეზიდენტ ტრამპის და მისი ადმინისტრაციის მიმართ. მთავარი არის ის, რომ ნებისმიერ შემთხვევაში ურთიერთობების გადატვირთვა უნდა დაეფუძნოს ორმხრივ ინტერესებს. თუ იქნება სამართლიანობა, ამ შემთხვევაში ვერაფერი დაუდგება წინ ურთიერთობების თვისებრივად განახლებას, სტრატეგიული პარტნიორობის აღდგენას,” – განაცხადა პრემიერ-მინისტრმა.
მისივე თქმით, საქართველო არის პატარა სახელმწიფო და ასეთ ვითარებაში აშშ-ს აქვს უფრო ძლიერი პოზიციები, მაგრამ ამასთან ერთად, ყველას უნდა ახსოვდეს, რომ საქართველო არის დამოუკიდებელი, სუვერენული სახელმწიფო და სწორედ ასეთი სუვერენული მიდგომით შევა ნებისმიერ ურთიერთობებში.
„ვფიქრობ, შესაძლებელია ინტერესების თანხვედრა, ასეთ შემთხვევაში სტრატეგიული პარტნიორობა, ვფიქრობ, რომ აღდგება. კიდევ ერთხელ მინდა, ხაზი გავუსვა იმას, რომ „დიფ სტეიტის” დამარცხებაზე იქნება არსებითად დამოკიდებული ურთიერთობების გადატვირთვა,” – განაცხადა პრემიერ-მინისტრმა.
ამასთან, პარლამენტის რეგიონული პოლიტიკისა და თვითმმართველობის კომიტეტის თავმჯდომარის, ირაკლი ქადაგიშვილის განცხადებით, არსებობს მყარი მოლოდინი, რომ საქართველო-აშშ-ის ურთიერთობა არა მარტო დაუბრუნდება სტრატეგიული ურთიერთობის ჩარჩოს, არამედ ეს ჩარჩო იქნება კონკრეტული დღის წესრიგით გამდიდრებული.
„თქვენ იცით, ხელისუფლების გაცხადებული პოლიტიკა, რომ ამერიკის შეერთებული შტატები, როგორც ჩვენი ქვეყნის მთავარი სტრატეგიული პარტნიორი, არის უმნიშვნელოვანესი ჩვენი ქვეყნისათვის. იმ ნეგატიურ ფონს, რომელიც წინა ადმინისტრაციის დროს იყო შექმნილი, თავისი კონკრეტული მიზეზი ჰქონდა. დღეს ეს კონკრეტული მიზეზები მოხსნილია. ახალი ადმინისტრაცია ბევრ საკითხში, როგორც იდეოლოგიური კუთხით, ასევე, მსოფლიოში მიმდინარე გეოპოლიტიკურ პროცესებთან დაკავშირებით, ხშირ შემთხვევაში, იდენტურ პოზიციებს გამოხატავს, ამიტომ ჩვენ გვაქვს მყარი მოლოდინი იმისა, რომ ახალი ადმინისტრაციის პირობებში, საქართველო-ამერიკის შეერთებული შტატების ურთიერთობა არა მარტო დაუბრუნდება სტრატეგიული ურთიერთობის ჩარჩოს, არამედ ეს ჩარჩო იქნება კონკრეტული დღის წესრიგით გამდიდრებული. ჩვენ სწორედ ეს შეთავაზება გვაქვს ამერიკელ პარტნიორებთან, რომ გვქონდეს კონკრეტული დღის წესრიგი, რა დროში რა მიზანი უნდა იქნას მიღწეული. ვფიქრობ, ეს დღეს უფრო რეალურია. ვფიქრობ, სახელმწიფოთაშორისი ურთიერთობა უფრო მეტი პასუხისმგებლობით იქნება აღქმული ყველა მხრიდან და ამას წინ არაფერი დაუდგება”, – განაცხადა ქადაგიშვილმა.
რატომ შემოაბრუნა „ოცნებამ” ეს საკითხი
ნიკა ჩიტაძის აზრით, არსებობს რამდენიმე ვერსია, რატომაც გადაწყვიტა „ქართულმა ოცნებამ” ამ საკითხის კვლავ შემობრუნება.
„ჯერჯერობით „ოცნების” მხრიდან გამოთქმული ვარაუდები რეალისტური არაა. შეიძლება კობახიძემ სპეციალურად გააკეთა განცხადება იმისათვის, რომ თითქოს ამერიკის ელჩისა და საქართველოს დე ფაქტო საგარეო საქმეთა მინისტრის შეხვედრაზე ურთიერთობების აღდგენის პერსპექტივები განიხილეს. კობახიძე ამ გზით ცდილობს საზოგადოება შეცდომაში შეიყვანოს. მეორე საკითხია ის, რომ, რა თქმა უნდა, „ოცნებას” აწუხებს, თუ როგორი იქნება ურთიერთობები ამერიკასთან და დაუწესებს თუ არა შემდგომ სანქციებს, რადგან როგორც ვიცით, „მეგობარი აქტის” განხილვა იგეგმება და რასაკვირველია, დე ფაქტო ხელისუფლებას ეს ახსოვს. ამიტომ ცდილობენ ამერიკელების გულის მოგებას.
„მესამე ვარიანტი არის ის, რომ „ოცნებას” ჰგონია, რადგან ტრამპის ადმინისტრაცია ცდილობს ვითომ რუსეთთან ურთიერთობის დალაგებას და უკრაინაზე ზეწოლას ახდენს, საქართველოსთან სხვა დამოკიდებულება ექნება.
„ამ განცხადებების მიზანი შეიძლება იყოს ის, რომ მერე თქვან – აი, ჩვენ გვინდა ურთიერთობების დალაგება და ამერიკას არ სურს. ან შეიძლება საზოგადოებას ამზადებენ, რომ ვცადეთ დასავლეთთან ურთიერთობა, მაგრამ არ გამოვიდა და შემდეგ რაღაცნაირად ჩინეთთან და რუსეთთან დაიწყონ ურთიერთობების დალაგება. ეს კი იმით ახსნან, რომ ყველამ ხელი გვკრა და სხვა გამოსავალი არ იყოო. ან კიდევ ერთი მომენტი, რომ ამერიკაზე გადაბრალებას ცდილობენ, რომ თითქოს მათი ბრალი ყოფილა ურთიერთობების გაფუჭება, როგორც ევროპაზე იძახიან”, – აღნიშნავს ჩიტაძე.
„მართვის სტრატეგიული ინსტიტუტის” ხელმძღვანელის, პეტრე მამრაძის თქმით, ახლა არის სწორედ ის პერიოდი, რომ „ქართულ ოცნებას” ეს საკითხი უნდა გაექტიურებინა, რადგან საქართველოს ამერიკასთან ურთიერთობების ნორმალიზება სჭირდება.
„თავიდანვე, როცა ტრამპი პრეზიდენტად დაინიშნა, მე საჯაროდ განვაცხადე, რომ მას პირადი ურთიერთობების სჯერა და კარგი იქნება თუ „ოცნება” ეცდება დაამყაროს თუნდაც პირადი ურთიერთობის დონეზე. საქართველოს ნამდვილად სჭირდება ამერიკის შეერთებულ შტატებთან ურთიერთობების ნორმალიზება. თანაც იმ კონტექსტში, რომ რუსეთი არ მიიღებს ამას მტრულ ნაბიჯად და ახლა ამის საშუალება არის. ანტიეროვნულად განწყობილი პოლიტიკური ძალა უნდა იყო, რომ არ გესმოდეს, როდესაც სააკაშვილის და ბიძამისის მიერ მოყვანილი ტანკები დგას რამდენიმე კილომეტრში, ნებისმიერი ისეთი ნაბიჯი, რომელიც კრემლში შეიძლება ჩაითვალოს, როგორც მტრული, შესაძლოა საქართველოს ძვირად დაუჯდეს. რუსეთს არავითარი სანქციების აღარ ეშინია მას შემდეგ, რაც ყირიმის ანექსია მოხდა და უკრაინაში ომი დაიწყო”, – თქვა მამარაძემ.
აღგება თუ არა საქართველო-ამერიკის ურთიერთობა
