“დანაგვიანება არის ძალიან მძიმე პრობლემა, რომელიც არა მხოლოდ საინფორმაციო კამპანიით, არამედ კომბინირებულად, სანქციებით უნდა მოვაგვაროთ, ისე, როგორც ცივილიზებულ ქვეყნებშია გათვალისწინებული; ეს ჩვენი ღირსების საქმეა,” _ ეს განცხადება საქართველოს პრემიერ-მინისტრმა გიორგი კვირიკაშვილმა მთავრობის სხდომაზე გააკეთა.
პრემიერის თქმით, დანაგვიანების მხრივ კატასტროფული ვითარებაა, როგორც ავტობანის მიმდებარე, ისე სხვა ტერიტორიებზე:
“სამწუხაროდ, ჩვენ მხოლოდ საინფორმაციო კამპანიით ვერ ვაღწევთ იმ შედეგს, რომ პოლიეთილენის პარკები თუ სხვა ტიპის ნაგავი არ იყოს მიმოფენილი ჩვენი ქვეყნის ულამაზეს ლანდშაფტზე. ამის თაობაზე წერენ ჩვენი მოქალაქეები, ჩამოსული ტურისტები და ეს არის ძალიან მძიმე პრობლემა, რომელიც არა მხოლოდ საინფორმაციო კამპანიით, არამედ კომბინირებულად, სანქციებით უნდა მოვაგვაროთ, ისე, როგორც ცივილიზებულ ქვეყნებშია გათვალისწინებული. ეს ჩვენი ღირსების საქმეა”, _ განაცხადა გიორგი კვირიკაშვილმა.
მთავრობის მეთაურმა გარემოსა და ბუნებრივი რესურსების დაცვის მინისტრისგან მოისმინა ინფორმაცია, პრობლემის კომპლექსურად გადაჭრის მიზნით გახორციელებული ღონისძიებების შესახებ.
გიგლა აგულაშვილის განმარტებით, შინაგან საქმეთა და რეგიონული განვითარებისა და ინფრასტრუქტურის სამინისტროების წარმომადგენელთა ჩართულობით ჩამოყალიბებული სამუშაო ჯგუფი უახლოეს დღეებში დაასრულებს მუშაობას ერთიან მოდელზე, რომელიც საკანონმდებლო ცვლილებებს, ადმინისტრირების გაუმჯობესებას, საინფორმაციო კამპანიის გააქტიურებას, მოსახლეობის ფართო ფენების, განსაკუთრებით ახალგაზრდების ჩართულობას და ყველა მუნიციპალიტეტს შორის ჯანსაღი კონკურენციის ჩამოყალიბებას გულისხმობს.
მინისტრის თქმით, ასევე, გახორციელდება ყოველდღიური მონიტორინგი და პროცესის მიმდინარეობის შესახებ მოსახლეობა ინფორმაციას მუდმივად მიიღებს.
პრემიერმა აღნიშნა, რომ პრობლემის დროული აღმოფხვრა მნიშვნელოვანია, განსაკუთრებით, ტურისტული სეზონის მოახლოების გათვალისწინებით:
“მე ბევრს ვმოგზაურობ საქართველოს ფარგლებში და მინდა, გავაფრთხილო ადგილობრივი ხელისუფლების წარმომადგენლები, ძალიან მწვავე რეაქცია მექნება, თუ არ გვექნება შედეგი რამდენიმე თვეში, რადგან ეს არის ჩვენი ქვეყნის სახე და საქართველოს მოსახლეობის კულტურის მაჩვენებელი. ამიტომ, ვერ შევეგუებით იმას, რომ ასეთ მდგომარეობაში იყოს ჩვენი ქვეყნის ბუნება, რომელსაც ყველა უნდა გავუფრთხილდეთ.
მინდა, ყველა უწყებას ვთხოვო, მაქსიმალური ყურადღებით მოეკიდონ ამ საკითხს,” _ განაცხადა გიორგი კვირიკაშვილმა 6 აპრილს გამართულ სხდომაზე.
მთავრობის მეთაურის ამ განცხადების მეორე დღეს ჩოხატაურის მუნიციპალიტეტის ფეისბუქის ოფიციალურ გვერდზე გაჩნდა ინფორმაცია, რომლის თანახმადაც “ჩოხატაურის მუნიციპალიტეტის გამგებელი ირაკლი კუჭავა, გამგეობის სამსახურებთან ერთად, ქვენობნისა და ხიდისთავის ტერიტორიულ ერთეულში იმყოფებოდა”:
“გამგებელმა მკაცრი შეფასება მისცა სოფლებში სანიტარულ-ჰიგიენურ მდგომარეობას და გამგებლის წარმომადგენლებს უმოკლეს ვადაში ვითარების გამოსწორება დაავალა. ანალოგიური ინსპექტირება მუნიციპალიტეტის სხვა ტერიტორიულ ერთეულებშიც პერმანენტულად გახორციელდება,” _ აღნიშნულია გავრცელებულ ინფორმაციაში.
მიუხედავად იმისა, რომ სანიტარული-ჰიგიენური მდგომარეობის შემოწმება სულ სხვა ასფეროს მოიცავს და ხდება სკოლებში, ბაღებში, კვების ობიექტებში და ა. შ. გამგებლის პიარს თუ დავეყრდნობით, ჩოხატაურში ეს ქუჩაშიც და ნაგავსაყრელებზეც შეიძლება მოხდეს. აღსანიშნავია, რომ გამგეობის ოფიციალური გვერდის ეს პოსტი სოციალურ ქსელში ირაკლი კუჭავამ პრემიერის განცხადების თითქმის იდენტური კომენტარით გააზიარა: “გვაქვს ახალი მანქანები, ახალი კონტეინერები, სამწუხაროდ, არ გვაქვს მოქალაქეობრივი შეგნება. მხოლოდ ადმინისტრირება შედეგს არ მოიტანს. ერთად დავიწყოთ და გამოვიმუშაოთ ჩვევა _ მოთხოვნილება სუფთა გარემოში ცხოვრებისა,” _ წერს ჩოხატაურის გამგებელი.
არადა, აქ მოქალაქეობრივ შეგნებაზე მეტი პასუხისმგებლობა სწორედ ადგილობრივ თვითმმართველობას ეკისრება, რადგან “ქუჩებში არსებულ სანიტარულ-ჰიგიენურ მდგომარეობას”, რასაც სინამდვილეში სტიქიური ნაგავსაყრელი ჰქვია, ახალშეძენილი მანქანები ვერ უშველის. ამის დასტური “გურია ნიუსის” მიერ ცოტა ხნის წინ მომზადებული სპეციალური გადაცემაცაა, რომელშიც არსებულ მდგომარეობაზე საკმაოდ მწვავე სიუჟეტი გავიდა.
ჩოხატაურში მომზადებული სიუჟეტიდან გაირკვა, რომ უმეტეს სოფლებში ნაგვის ურნები არ დგას. შესაბამისად, დასუფთავების სამსახურიც მხოლოდ დაბასთან ახლომდებარე სოფლებს სტუმრობს. ამიტომ, დაბინძურებულია საუბნო და ცენტრალური გზები, მდინარეები, სადაც ინერტული მასალაც კი იყრება.
ამავე გადაცემიდან იმის გაგებაცაა შესაძლებელი, რომ ურნების დადგმას და დამატებას ადგილობრივი ხელისუფლება მოსახლეობას დიდი ხანია პირდება, თუმცა, ჯერჯერობით, უშედეგოდ.
უფრო მეტიც, ამ საკითხზე სახელმწიფო აუდიტის სამსახურმა დასკვნაც კი გამოაქვეყნა და მუნიციპალიტეტებს რეკომენდაციებიც მისცა, რომელთა ნაწილი ამ დრომდე შეუსრულებელია.
არადა, მყარი ნარჩენების საერთაშორისო სტანდარტებით მართვა საქართველოს მიერ ევროკავშირთან დადებული ხელშეკრულებით ნაკისრი ერთ-ერთი მნიშვნელოვანი ვალდებულებაა, რომელსაც, როგორც უკვე აღვნიშნეთ, სხვა პასუხისმგებელ უწყებებთან ერთად, ვერც ადგილობრივი თვითმმართველობა უმკლავდება და როგორც გამგებლის პოსტიდან ირკვევა, ხელს მხოლოდ მოსახლეობისკენ იშვერს.
ამ “გაშვერილი ხელის” საპასუხოდ, მოსახლეობას შეუძლია გამგებელს წერილობით მიმართოს, აცნობოს, სად მდებარეობს სტიქიური ნაგავსაყრელები და პრემიერის განცხადების შესაბამისად, პრობლემის დაუყოვნებლივ მოგვარება დაავალდებულოს.
