ზაფხული დასვენებასთან და გართობასთან ასოცირდება. თუმცა, ჩოხატაურში ამ საზაფხულოდ ჩასულ დამსვენებლებსა თუ ადგილობრივ მცხოვრებლებს ისევ გადათხრილი ქუჩების ცქერა უწევთ.
ჩოხატაურში მასშტაბური რეაბილიტაციის პროცესი მიმდინარეობს და სამუშაოებს თავისებური დისკომფორტი ახლავს თან, რაც ქვეითად მოსიარულეებს და ნაწილობრივ, მძღოლებსაც აწუხებთ.
როცა დასვენებასა და გართობაზე ვსაუბრობთ, აუცილებელია ვახსენოთ ბავშვები, რომელთაც გასართობი სივრცე ჩოხატაურში, პრაქტიკულად, არ აქვთ.
“გურია ნიუსი” 9 აპრილის მემორიალთან მდებარე სკვერის და იქ არსებული პრობლემების შესახებ არაერთხელ წერდა, რადგან აღნიშნული სკვერი დაბაში ერთადერთი ადგილია, სადაც მშობლებს ბავშვების გაყვანა და თავისუფალ დროს თავშეყრა შეუძლიათ.
შარშან მუნიციპალიტეტის მერმა, დავით შარაშიძემ “გურია ნიუსთან” აღნიშნა, რომ 9 აპრილის სკვერის განახლება და ახალი ატრაქციონების დამონტაჟება იგეგმებოდა, თუმცა, გასული წლიდან დღემდე პარკში არაფერი შეცვლილა.
სკვერში არსებული პრობლემების შესახებ ჩვენთან კვლავ საუბრობენ მშობლები.
“ბავშვებისთვის განკუთვნილ ატრაქციონებს ზოგს საღებავი გადადის, ზოგს _ ჟანგი აქვს უკვე მოკიდებული, საქანელაზე ვერ დასვამ ბავშვს, ცალი ჯაჭვითაა ჩამოკონწიალებული. აქეთ სკამები დამტვრეული. ცალკე დისკომფორტს და საფრთხეს გვიქმნის მიუსაფარი ძაღლები თუ შინაური პირუტყვი. ირგვლივ ყველაფერი ცხოველების ფეკალიებითაა დასვრილი. ზოგი ძაღლი აგრესიულია. იღრინება და ბავშვებს აშინებს. არ ეღირსა ჩოხატაურელ ბავშვებს ერთი ნორმალური ადგილი გასართობად”, _ ამბობენ ჩვენთან საუბრისას სკვერის მოუწყობლობით შეწუხებული ადამიანები.
როდის დაიწყება სკვერის რეაბილიტაცია და დამონტაჟდება ახალი ატრაქციონები, ამის შესახებ მერს, დავით შარაშიძეს კიდევ ერთხელ ვესაუბრეთ.
შარაშიძის თქმით, სკვერის რეაბილიტაციისთვის პროექტი წელს გამზადდება, ხოლო სამუშაოები მომავალი წლიდან დაიწყება:
“ჩოხატაურის მუნიციპალიტეტში მიმდინარეობს მასშტაბური პროექტი, რომელიც ხორციელდება პრემიერ-მინისტრის მიერ ინიცირებული პროექტის _ “განახლებული რეგიონების” ფარგლებში. მთლიანად უტარდება რეაბილიტაცია მუნიციპალიტეტის ცენტრს. გასული წლის ივნისში ვსაუბრობდით ნოდარ დუმბაძის და ანა კალანდაძის სკვერების რეაბილიტაციაზე და სამუშაოები უკვე დაწყებულია. ამ პროექტის ფარგლებშივე, ვფიქრობთ, ფასადურ რეაბილიტაციას 9 აპრილის სკვერის, რაც შეეხება ატრაქციონებს, ჩვენი თანხებით არის გასაკეთებელი. ატრაქციონების შემოტანა მოხდება რეაბილიტაციის დასრულების შემდეგ. პროექტი წელს გამზადდება, მომავალ წელს კი რეაბილიტაციას დავიწყებთ”, _ გვითხრა შარაშიძემ.
ცნობისთვის, პროექტი “განახლებული რეგიონები” პრემიერ-მინისტრის მიერ ინიცირებული სახელმწიფო პროგრამაა და ხელსაყრელი და დაბალანსებული მდგრადი სოციალურ-ეკონომიკური გარემოს შექმნის, ტურისტულად მიმზიდველი და ადგილობრივი მოსახლეობისთვის სოციალური გარემოს გაუმჯობესების მიზნით, ითვალისწინებს საქართველოს 63 მუნიციპალიტეტში, გარდა თბილისის, ახალგორის, ერედვის, ქურთის, თიღვისა და აჟარის მუნიციპალიტეტებისა, განსაკუთრებული სახელმწიფოებრივი და საზოგადოებრივი მნიშვნელობის ინფრასტრუქტურული პროექტების გახორციელებას, რომელიც, მათ შორის, შესაძლებელია მოიცავდეს ურბანული განახლების დოკუმენტების შემუშავებასაც.
პროგრამის ფარგლებში, სამუშაოების დაწყების შედეგად ჩოხატაურმა სახე მართლაც შეიცვალა. საზოგადოებას არც დუმბაძის ქუჩაზე უკვე დაგებული ფილების არაერთხელ აყრა-დაგება დავიწყებია. უხარისხოდ შესრულებულ სამუშაოებს კი, საბოლოოდ, კომპანია “აღმაშენებელი-ქუთაისთან” გასული წლის დეკემბერში კონტრაქტის გაწყვეტა მოჰყვა, რამაც სამუშაოების შეჩერება გამოიწვია.
აღსანიშნავია ისიც, რომ პრემიერმა მთელი ამ დროის განმავლობაში, მის მიერვე ინიცირებული პროგრამის ფარგლებში, რეგიონში მიმდინარე სამუშაოები მხოლოდ ერთხელ მოინახულა.
ამ დროისთვის, ჩოხატაურში, “განახლებული რეგიონის” ფარგლებში მიმდინარე სამუშაოებს შპს “საბა კონსტრაქშენი” ახორციელებს. კომპანია მუნიციპალური განვითარების ფონდის მიერ გამოცხადებული ტენდერის გამარჯვებული გახდა.
როგორც ამ დროისთვის ჩვენთვის ცნობილია, კომპანიას სამუშაოების შესასრულებლად ვადა წლის ბოლომდე აქვს. ჩოხატაურის მუნიციპალიტეტში კი, გასაკეთებელი რჩება ბაზრის ტერიტორია, მთლიანად ცენტრი, დუმბაძისა და კალანდაძის პარკები, ასევე, 9 აპრილის სკვერის ფასადი.
ავტორი
