პრემიერმა თანამდებობა დატოვა _ “პარტიის თავმჯდომარეს უნდა მიეცეს საშუალება გუნდი დააკომპლექტოს”

საქართველოს პრემიერ-მინისტრმა გიორგი კვირიკაშვილმა თანამდებობა დატოვა. ამის შესახებ მან რამდენიმე წუთის წინ, საგანგებო ბრიფინგზე განაცხადა.

კვირიკაშვილის თქმით, გუშინ, გაიმართა მმართველი პოლიტიკური ძალის შეხვედრა, რომლის შემდეგ გაკეთდა საჯარო განცხადებები, სადაც გამოიკვეთა მასსა და მმართველ გუნდში აზრთა სხვადასხვაობა.

“დღეს არის ის მომენტი, როცა პარტიის თავმჯდომარეს უნდა მეიცეს საშუალება გუნდი დააკომპლექტოს“, _ განაცხადა კვირიკაშვილმა და საკუთარ მოღვაწეობაზე ვრცლად ისაუბრა.

“ჩემთვის ეს თანამდებობა ყოველთვის იყო უდიდესი პასუხიმგბელობა, მე ვეცადე ვყოფილიყავი თითეული მოქალაქის პრემიერ-მინისტრი, _ აღნიშნა კვირიკაშვილმა, რომლის თქმით ის გუნდური მოთამაშეა და მიიღო ის გადაწყვეტილება, რომელიც ნებისმიერს უნდა მიეღო.

 შეგახსენებთ, რომ „გურია ნიუსმა“ გუშინ დილით გაავრცელა ინფორმაცია, რომლის თანახმადაც საქართველოს პრემიერ-მინისტრი გიორგი კვირიკაშვილი თანამდებობის დატოვებას გეგმავდა.

 ჩვენი წყაროს თქმით, კვირიკაშვილი გადადგომის მიზეზებზე ორშაბათს, საგანგებო პრესკონფერენციაზე ისაუბრებდა, თუმცა, წყარო იმასაც ამბობდა, რომ შესაძლოა სიტუაცია შეცვლილიყო.

სიტუაციის შეცვლა კი ბიძინა ივანიშვილის და გიორგი კვირიკაშვილის შეხვედრაზე იყო დამოკიდებული, რომელიც ორშაბათშს, დღის 12 საათისთვის, ავლაბარში, ივანიშვილის რეზიდენციაში შედგა.

გუშინ, ჩვენ ისიც გავარკვიეთ და ვებგვერდის მკითხველს ვამცნეთ, რომ  სამთავრობო გუნდი კვირიკაშვილის  გადადგომის წინააღმდეგი იყო _ ამის მიზეზად  კი, ბოლო დროს ქვეყანაში განვითარებული მოვლენებს ასახელებდნენ.

პრემიერს გარემოცვა უმტკიცებდა, რომ ოპოზიცია მის წასვლას გამარჯვებად ჩაითვლიდა და ამ ფონზე ამ ნაბიჯის გადადგმა არასწორი იქნება.

_ გიორგი კვირიკაშვილს დიდი ხანია წასვლა უნდა. მან ვერ მოახერხა გუნდის შეკვრა. შიდა ომებმა შეასუსტა და ჯერ კიდევ აპრილში ფიქრობდა თანამდებობის დატოვებას, თუმცა, მაშინ შეაჩერეს. მისთვის, ბოლო წერტილი რუსთაველის გამზირზე მომხდარი მოვლენები იყო _ ბოთლების სროლამ და  საზოგადოების რეაქციამ მიაღებინა გადაწყვეტილება რომ წავიდოდა. ამას ისიც დაემატა, რომ გიორგი გახარიამ პოზიციები გაიმყარა და კვირიკაშვილმა თავი დაუცველად იგრძნო. სწორედ ეს არგუმენტები ჰქონდა მას ბიძინა ივანიშვილთანაც, _ ყვება ჩვენი წყარო, რომელიც ხელისუფლების მაღალი თანამდებობის პირია.

მისივე ინფორმაციით, ივანიშვილთან შეხვედრის შემდეგ გადაწყდა, რომ საპარლამენტო უმრავლესობის სხდომა გამართულიყო, რომელზეც ყველა საკითხს ერთად განიხილავდნენ და სწორედ ამის შემდეგ მიიღებდა კვირიკაშვილი საბოლოო გადაწყვეტილებას.

სხდომა იმავე დღეს, სამ საათზე ჩაინიშნა, რომელსაც დეპუტატებთან ერთად მინისტრთა კაბინეტის სრული შემადგენლობა და ბიძია ივანიშვილიც დაესწრო.

„გურია ნიუსის“ წყაროს თქმით, 3 საათიან შეხვედრაზე დიდი ნაწილი სწორედ ამ თემაზე საუბარს დაეთმო. ითქვა, რომ ახლა პრემიერის გადადგომა სააკაშვილის გააძლიერებდა. მით უმეტეს იმ ფონზე, რომ სანამ უმრავლესობის სხდომა გაიმართებოდა, სააკაშვილმა განცხადება გაავრცელა.

„პითონი კა ცდილობს კანი შეიცვალოს. ივანიშვილის სისტემა შეტორტმანდა სახალხო ზეწოლის ქვეშ და ის ემზადება მთავრობის შესაცვლელად. საქართველოს “მთავრობა” აუცილებლად უნდა შეიცვალოს, მაგრამ არა ოლიგარქის მორიგი (მოსკოვთან შეთანხმებული) თოჯინებით. ჩვენ სასწრაფოდ გვჭირდება სახალხო ნდობის მქონე მთავრობა, უცხოელი, სასურველია ამერიკელი და ბრიტანელი მოსამართლეები უზენაეს სასამართლოში, სახალხო ნდობით აღჭურვილი პროკურორი (შესაძლებელია უცხოელი იურისტის მოწვევა) და ახალი საპარლამენტო არჩევნები, ჩატარებული საერთაშორისო საარჩევნო ადმინისტრაციის და არა ოლიგარქის მიერ”, _ წერდა სააკაშვილი.

წყაროს თქმით, უმრავლესობის სხდომაზე ეს განცხადებაც ხსენდა და ითქვა ისიც, რომ ოპოზიციას სალაპარაკო არ უნდა მისცემოდა.

ამ ყველაფრის პარალელურად კი ხაზი გაესვა სამთავრობო ცვლილებების აუცილებლობასაც.

_ გეთანხმებით, რომ ეს აუცილებელია, მაგრამ დღეს არა, _ უთქვამს ბიძინა ივანიშვილს, რომელმაც სამთავრობო გუნდს მუშაობა დაუწუნა და არც უმრავლესობის დეპუტატების მიმართ ყოფილა კეთილგანწყობილი.

საბოლოოდ, შეხვედრა იმ მესიჯით დასრულდა, რომ ცვლილებები იქნება, ოღონდ ზაფხულის ბოლოს _ ქვეყანას ახალი მთავრობა უმრავლესობის საპრეზიდენტო კანდიდატის შერჩევის შემდეგ ეყოლებოდა.

აღსანიშნავია, რომ ამავე სხდომაზე მყოფი პირები კატეგორიულად გააფრთხილეს, შეხვედრის დეტალებზე მედიასთან არ ესაუბრათ, რაც უმრავლესობამ შეასრულა კიდეც.

საპარლამენტო უმრავლესობის ლიდერის, არჩილ თალაკვაძის თქმის, შეხვედრაზე სამთავრობო ცვლილებებზე საუბარი საერთოდ არ ყოფილა.

„უმრავლესობის სხდომაზე ჩვენ განვიხილეთ ყველა მიმდინარე საკითხი და მოვლენები, რომელიც ბოლო პერიოდში ვითარდებოდა ქვეყანაში, განვიხილეთ გაერო–ს ეგიდით ჩატარებული კვლევის შედეგები მოსახლეობის კეთილდღეობის შესახებ. ბევრი ადამიანი კვლავ ელოდება ხელისუფლებისგან ქმედით დახმარებას და ჩვენ ველოდებით მთავრობისგან კონკრეტულ სამოქმედო გეგმას. რაც შეეხება სამთავრობო ცვლილებების საკითხს, ეს არ ყოფილა უმრავლესობის სხდომის დღის წესრიგში განხილვის საგანი. ეს საკითხი არ ყოფილა განხილვის საგანი უმრავლესობის სხდომაზე.

შესაძლოა, ზოგიერთ დეპუტატს აქვს მოსაზრება ცვლილებებთან დაკავშირებით, თუმცა, მე გეუბნებით, უმრავლესობის სხდომის საკითხებთან დაკავშირებით, რომ სამთავრობო ცვლილებები განხილული არ ყოფილა“, – განაცხადა არჩილ თალაკვაძემ.

თითქმის იდენტური კომენტარი გააკეთა ლევან კობერიძემაც, რომელსაც მხარი სხვა დეპუტატებმაც აუბეს, თუმცა იყვნენ გამონაკლისებიც.

დეპუტატ დავით ჭიჭინაძის თქმით,  ცვლილებებზე საუბარი ნამდვილად შედგა. უფრო მეტიც, ჭიჭინაძე მიიჩნევს, რომ მთავრობა დროულად უნდა გადადგეს:

„ცვლილებები საჭიროა, განსაკუთრებით, როდესაც Unicef-ის კვლევები გამოქვეყნდა, იქ არის ძალიან გაუარესებული ეკონომიკური მდგომარეობა, შესაბამისად, ვფიქრობ, რომ როდესაც შევქმენით კომისია, არ ვენდეთ უმრავლესობას, ვენდეთ ოპოზიციას, რომ თურმე ის დაადგენს სიმართლეს ქვეყანაში და ჩვენ ამის უნარი არ შეგვწევს. როდესაც ჩვენ ეკონომიკას ვერ ვზრდით, ბანკებს არანორმალური მოგებები მივეცით, ბანკები კარნახობენ ხელისუფლებას, როგორ უნდა მოვიქცეთ, ყველა კანონს არღვევენ და ხელისუფლება ამაზე არ რეაგირებს, ხალხში გროვდება უკმაყოფილება. გამოსავალი არის, რომ მთავრობა უნდა გადადგეს. კრიზის გახსნის და დაძაბულობის მოხსნის საშუალება არის, როდესაც მთავრობა გადადგება, იქნება ახალი პროგრამა წარმოდგენილი, თუ ამანც არ უშველა პოლიტიკური ცხოვრების სხვა ეტაპები არსებობს,“- განაცხადა დავით ჭიჭინაძემ, რომელმაც კონკრეტული დეტალების დასახელებისგან თავი შეიკავა.

უმრავლესობის სხდომა და მიმდინარე მოვლენები შეფასებების გარეშე არ დარჩენიათ პოლიტიკურ პარტიებს.

საპარლამენტო უმცირესობის წევრის სერგო რატიანის მოსაზრებით, ქვეყანაში მძიმე პოლიტიკური კრიზისია.

„ეს ორშაბათმაც დაადასტურა. საზოგადოებრივი უკმაყოფილების ფონზე ხელისუფლების მაღალჩინოსნები ხვდებიან, რომ მინისტრთა კაბინეტს ვეღარ შეინარჩუნებენ და მთავრობა უნდა შეიცვალოს, მაგრამ ამასაც ვერ ახერხებენ, რაც იმას ნიშნავს, რომ მძიმე პოლიტიკური კრიზისია. სიტუაციას ხელისუფლებაშიც კი ვერ ფლობენ“, – განაცხადა რატიანმა.

„ევროპული საქართველოს“ ერთ-ერთი ლიდერის, ირმა ნადირაშვილის თქმით, არჩილ თალაკვაძე კომიკურ მდგომარეობაში ჩააყენეს.

ნადირაშვილის განცხადებით, შეხვედრის დაწყებამდე თავად „ოცნების“ წევრებიც საუბრობდნენ მოსალოდნელ სამთავრობო ცვლილებებზე. მათი შემდგომი კომენტარები კი ზუსტად ადასტურებს იმას, რომ „ქართულ ოცნებაში“ არავინ  არაფერს არ წყვეტს, გარდა ბიძინა ივანიშვილისა.

ირმა ნადირაშვილის თქმით, ამ შემთხვევაში შეიძლება იმის თქმაც, რომ თავად ივანიშვილიც ვეღარ იღებს თამამ გადაწყვეტილებებს, რადგან მას წინა პრემიერ ღარიბაშვილის გადასაყენებლად ნახევარი საათიც კი არ დასჭირდა.

მისივე თქმით, მას ამ შეხვედრის შემდეგ დარჩა შთაბეჭდილება, რომ გიორგი კვირიკაშვილი ნამდვილად გადადგება, თუმცა, ახლა მმართველი გუნდი ფიქრობს, როგორ შეფუთოს ეს ფაქტი.

„მე არ ვთვლი, რომ კვირიკაშვილის გადადგომა რამეს შეცვლის იმიტომ, რომ ის არის მარიონეტი,“ – განაცხადა ირმა ნადირაშვილმა.

„ერთიანი ნაციონალური მოძრაობის“ წევრის, ზალიკო უდუმაშვილის თქმით, ორშაბათს „მორიგი ტრაგიკომიკური სპექტაკლი გათამაშდა“

„ ფაქტია, რომ ხელისუფლება არის ძალიან მძიმე კრიზისში შესული იმიტომ, რომ  ჩვენ რაც ვნახეთ, ეს უკვე არანაირ ჩარჩოებში არ ჯდება,“ _ განაცხადა უდუმაშვილმა.

 სწორედ ამ ყველაფრის ფონზე, უმრავლესობის შეხვედრიდან მეორე დღეს პრემიერმა თანამდებობა დატოვა.