სოფლის მეურნეობის ანტიკრიზისულ გეგმაზე საუბრისას, საქართველოს პრემიერ მინისტრმა გიორგი გახარიამ ფერმერებისთვის გარანტირებულ ერთლარიან შეღავათზე ისაუბრა. ამ შეღავათის შესახებ პრემიერის საუბარი ახლაცაა განთავსებული საქართველოს მთავრობის ოფიციალურ ვებ გვერდზე.
თუმცა, საქართველოს გარემოს დაცვისა და სოფლის მეურნეობის სამინისტროს ოფიციალურ ვებ გვერდზე გამოქვეყნებულ ინფორმაციაში, რომელიც აგროდიზელით ხელშეწყობის პროგრამას ეხება, ვკითხულობთ, რომ ფერმერებს 16, მაქსიმუმ, 20 თეთრის შეღავათი ექნებათ.
სამინისტროს ოფიციალურ ვებგვერდზე ვკითხულობთ, რომ საჯარო რეესტრის ეროვნულ სააგენტოში რეგისტრირებული სასოფლო-სამეურნეო დანიშნულების 0,25-დან 100 ჰექტარი ფართობის მიწის ნაკვეთის მფლობელი ფიზიკური და იურიდიული პირები, ახალი სახელმწიფო პროექტის ფარგლებში, დიზელის საწვავს შეღავათიან ფასად იყიდიან. ამ პროექტის ფარგლებში, საწვავის ლიმიტი 1 ჰექტარზე 150 ლიტრის ოდენობით განისაზღვრა.
აქვე ირკვევა, რომ ამ შეღავათით, სასოფლო-სამეურნეო დანიშნულების 0.25 და მეტი ჰექტარი მიწის ნაკვეთის მფლობელ ყველა ფიზიკურ და იურიდიული პირს შეუძლია არსებობა, თუმცა აქაც არაა გარკვევით განმარტებული, ეს შეღავათი მიწის მფლობელებს ეხებათ თუ მოიჯარეებსაც.
რაც შეეხება შეღავათს თითოეულ ლიტრ აგროდიზელზე, სქემა ასეთია: ფერმერი, საბითუმო ბაზებიდან სახელმწიფო კონსოლიდირებულ ტენდერში დაფიქსირებულ ფასზე _ 20 თეთრით, ხოლო ავტოგასამართი სადგურებიდან 16 თეთრით იაფად შეისყიდის საწვავს. ამ საწვავის შეძენა, მხოლოდ სახელმწიფო ტენდერში გამარჯვებული კომპანიის მიერ მითითებულ გასამართ სადგურებზე იქნება შესაძლებელი.
მსოფლიოში საწვავის ნებისმიერ სახეზე ფასების უპრეცენდენტო ვარდნის მიუხედავად, საქართველოში მსხვილი კომპანიები საწვავზე კვლავ არაბუნებრივად მაღალ ფასებს ინარჩუნებენ; საინტერესოა, როგორი იქნება კონსოლიდირებულ ტენდერში დაფიქსირებული ფასი და თუ ეს ამ ეტაპზე ცნობილი არაა, მაშინ, სრულიად გაურკვეველია, როგორ და საიდან ითვლის სამინისტრო, რომ ამ პროგრამით, ფერმერები 40 მილიონი ლარის შეღავათს მიიღებენ! რთული გამოსათვლელი არაა, თუ რამდენი მილიონი ტონა საწვავი უნდა გაიცეს ამ სქემით, რომ დანაზოგმა 40 მილიონი ლარი შეადგინოს!
რაც შეეხება ტექნიკურ დეტალებს; ბენეფიციარებს სოფლისა და სოფლის მეურნეობის განვითარების სააგენტოს რეგიონალურ სამსახურებში დაურიგდებათ ავტოგასამართი კომპანიის ფასდაკლების ტალონები, რითიც შესძლებენ დიზელის შესყიდვას.
ამავე თემაზე: პრეზენტაციიდან – რეალობამდე: მიწის მესაკუთრეთა სტიმულირების გაურკვეველი დეტალები
