საქართველოს პრეზიდენტი გიორგი მარგველაშვილი ბოლო დღეების განმავლობაში პატიმრების შეწყალებასთან დაკავშირებით მოვლენებს გამოეხმაურა. მარგველაშვილის თქმით, შავი პიარის ტალღა “ამაზრზენად დაიწყო და საცოდავად დამთავრდა“. ამის შესახებ პრეზიდენტმა შრომის უსაფრთხოების საკითხებთან დაკავშირებით, პროფკავშირების წარმომადგენლებსა და საერთაშორისო ექსპერტებთან შეხვედრაზე ჟურნალისტებს უპასუხა. მის კომენტარს 1tv ავრცელებს.
„ამ რამდენიმე დღის განმავლობაში საზოგადოებამ იხილა და ნათლად დაინახა კიდევ ერთი უბინძურესი შავი პიარის ტალღა, რომელიც ამაზრზენად დაიწყო და საცოდავად დამთავრდა. ამ მიმართულებით რა უნდა დაიხვეწოს, ჩვენ დავიწყეთ კონსულტაციები და დავხვეწავთ კიდევ. კიდევ ერთხელ ნათლად დაინახა საზოგადოებამ შავი პიარის ტალღის ამაზრზენი დასაწყისი და საცოდავი დასასრული. ალბათ ამგვარი რამ კიდევ იქნება. სამწუხაროდ, ამ რეალობაში ვცხოვრობთ”, – განაცხადა გიორგი მარგველაშვილმა.
დღეს პრეზიდენტის ადმინისტრაციის ხელმძღვანელმა გიორგი აბაშიშვილმა სახელმწიფო უწყებები და მათთან ერთად ქართული ოცნება და ევროპული საქართველო, პრეზიდენტის წინააღმდეგ შავი პიარის წარმოებაში დაადანაშაულა. აბაშიშვილს დეპუტატებმა უპასუხეს.
პრეზიდენტის მიერ პატიმრების შეწყალების საკითხი ბარნოვის ქუჩაზე ახალგაზრდა ქალის მკლელობის შემდეგ მორიგი განხილვის საგანი გახდა. გაირკვა, რომ მკვლელობაში ბრალდებული ვეფხია ბაქრაძე წარსულში ნასამართლევი და პრეზიდენტის მიერ შეწყალებული პატიმარია. მისი შეწყალების მიზეზები გიორგი მარგველაშვილმა 16 აპრილს ბრიფინგზე განმარტა და ძალადობაში ბრალდებულთა შეწყალების პროცესი დროებით შეწყვიტა, თუმცა ოპოზიცია და უმრავლესობა პრეზიდენტს მომხდარზე პასუხისმგებლობისთვის თავის არიდებში ადანაშაულებს.
პრეზიდენტმა გიორგი მარგველაშვილმა, 2013 წლის დეკემბრიდან დღემდე, 3655 მსჯავრდებული შეიწყალა.
პრეზიდენტმა მარგველაშვილმა ძალადობრივ დანაშაულზე შეწყალებასთან დაკავშირებით მორატორიუმი გამოაცხადა.
