ანალიტიკოსი არჩილ გამზარდია:
“სალომე ზურაბიშვილი ბიძინა ივანიშვილს, არა იმდენად გადაეფარა, არამედ, ჯერ კიდევ სივრცე მისცა პოლიტიკური ლავირებისთვის, გამიჯნა რა ფორმალურად ივანიშვილის პერსონალური ფაქტორი და ხელისუფლების ქცევა.
რამდენად გულწრფელი იყო ამ მიდგომაში, ვერ ვიტყვი, მაგრამ ეს არის პოლიტიკური კონტენტი და არა აქტივისტური ლექსიკა.
ოპოზიციურ ჯგუფებს უფრო ის აღელვებს, რამდენად “ოპოზიციურია” პრეზიდენტი, ხელისუფლებას აღელვებს ის, რამდენად “სახელისუფლებოა”, თუმცა, პრეზიდენტის არსი კონკრეტული პოლიტიკური ჯგუფების დოქტრინების გავრცელებას არ გულისხმობს, ეს არის მთავარი კონცეფცია, რაც ამ კონსტიტუციის პირობებში ავალია პრეზიდენტს.
შესაბამისად, პრეზიდენტის მოცემული შეტყობინება ჯდება პოლიტიკური მოდიფიკაციის კონტექსტში და არა პოპულისტური აქტის კონტექსტში.
პრეზიდენტის ეს ქცევა, უფრო ჰგავდა ივანიშვილისთვის კიდევ დამატებითი დროის მიცემას, რომ პოლიტიკური ლავირების მიზნით, ივანიშვილი გაემიჯნოს მმართველ პარტიას და თუნდაც, თავისივე თავის დაცვის მიზნით, სახელმწიფოს დინამიკა განცხადებულ კურსს დაუბრუნოს.
ასევე უმნიშვნელოვანესია, რომ პრეზიდენტი, როგორც სახელისუფლებო შტო, გამოდის იმ რანგში, რა რანგშიც ოპოზიციურ შეტყობინებებს მნიშვნელოვან ლეგიტიმაციას აძლევს და ხელისუფლების დისკრედიტაციულ ძალისხმევას ოპოზიციის წინააღმდეგ მინიმუმამდე წევს, განსაკუთრებულად, საერთაშორისო საზოგადოების თვალში, ასევე ნაწილობრივ ჩვენი მოსახლეობისათვისაც.
ზოგადად, პოლიტიკური ქცევის გააზრებას შესაბამისი კომპეტენცია სჭირდება და ჩვენი პოლიტიკური ჯგუფები, როგორც სახელისუფლებო, ისე, ოპოზიციური, როგორც წესი, ითხოვენ პოლიტიკურ რიტორიკაში სამოყვარულო პოლიტიკური აქტივიზმის შინაარს, რაც ცხადია, არასწორია და არაპოლიტიკურიც.
ჩვენს პოლიტიკოსებს მეტ პოლიტიკურ განათლებას ვურჩევდი, რომ პროცესის პოლიტიკურ-იდეოლოგიური ანალიზი შეძლონ, ასევე ვუსურვებდი პოლიტიკური კლასი მეტად განავითარონ და პოლიტიკური ნებისყოფაც გამოიმუშავონ.”
წყარო: alia.ge
