ლანჩხუთის მუნიციპალიტეტის 2019 წლის მთავარ საფინანსო დოკუმენტში, რომელიც ადგილობრივმა საკანონმდებლო ორგანომ გასული წლის მიწურულს დაამტკიცა, ერთ-ერთი პრიორიტეტი სოციალური პროგრამების დაფინანსებაა. საკრებულოს მიერ დამტკიცებული წლის ბიუჯეტის მიხედვით ირკვევა, რომ თუ შარშან ბიუჯეტმა ჯანმრთელობის დაცვისა და სოციალური უზრუნველყოფის კუთხით 751 ათასი ლარი გაიღო, წელს ეს თანხა შედარებით შემცირებულია და მთლიანობაში 692,9 ათას ლარს მოიცავს.
რაც შეეხება უშუალოდ სოციალურ დაცვას, წლევანდელი ბიუჯეტის მიხედვით, ამ მხრივ შარშანდელთან შედარებით მცირედი მატებაა და თუ შარშან სხვადასხვა სოციალური პროგრამის დაფინანსებას 547,1 ათასი ლარი მოხმარდა, წელს 550,1 ათასი ლარის გახარჯვაა გათვალისწინებულ.
აღმოჩნდა, რომ სოციალური პროექტის თანახმად, შარშანდელთან შედარებით შემცირდა უკიდურესად შეჭირვებული ხანდაზმულებისა და შეზღუდული შესაძლებლობების მქონე პირთა უფასო კვების დაფინანსება. წლევანდელ ბიუჯეტში 20 ათასი ლარით ნაკლები თანხაა გათვალისწინებული მზრუნველობამოკლებულთა უფასო კვებით უზრუნველსაყოფად და საამისოდ მუნიციპალიტეტი წლის განმავლობაში 90 ათას ლარის გახარჯვას გეგმავს.
შედარებით გაზრდილია მრავალშვილიანი ოჯახების დახმარების პროგრამის დაფინანსება, რომელიც მიზნად ისახავს მრავალშვილიანი ოჯახებისთვის ყოველთვიურად ფინანსური დახმარებას _ თუ 2018 წელს, პროგრამის დასაფინანსებლად 32,8 ათასი ლარი გამოიყო, წელს ბიუჯეტი 34,5 ათას ლარს გაიღებს პროგრამის დასაფინანსებლად. ამ პროგრამის მიხედვით, ლანჩხუთის მუნიციპალიტეტში რეგისტრირებული მრავალშვილიანი ოჯახები, რომელთაც ჰყავთ ოთხი და მეტი 18-წლამდე ასაკის შვილი, ყოველთვიურად თითოეულ ბავშვზე მიიღებენ 25 ლარს. პროგრამით ისარგებლებენ ის ოჯახები, რომლებიც არ არიან სოციალური შემწეობის მიმღები. პროგრამის მიზანია მრავალშვილიანი ოჯახების ფინანსური ხელშეწყობა. როგორც ირკვევა, ლანჩხუთში გასულ წელს ამ პროგრამით 30-მა მრავალშვილიანმა ოჯახმა ისარგებლა.
შარშანდელთან შედარებით შემცირებულია მძიმე საცხოვრებელ პირობებში მყოფი ოჯახებისთვის დროებითი თავშესაფრით უზრუნველყოფის პროგრამის დაფინანსება _ თუ 2018 წელს ბიუჯეტმა ამ კუთხით 190 ათასი ლარი გაიღო, წლევანდელ ბიუჯეტში საამისოდ 67 ათასი ლარია გათვალისწინებული.
აღმოჩნდა, რომ წლევანდელ ბიუჯეტში მუნიციპალიტეტმა თანხები “უპატრონო მიცვალებულთა” სარიტუალო მომსახურებისთვისაც გაითვალისწინა და იგი 2 500 ლარითაა განსაზღვრული.
სხვადასხვა ომსა და კონფლიქტებში მონაწილე ვეტერანთა დასახმარებლად, შესაბამისი პროგრამის მიხედვით, თუ შარშან წლის გეგმა ამ მხრივ 51 ათასი ლარით განისაზღვრა, წელს ბიუჯეტი ამ პროგრამის დასაფინანსებლად 53 ათას ლარს გაიღებს.
შედარებით გაზრდილია სოფლებიდან მოსწავლეთა ტრანსპორტირების პროგრამის დაფინანსება, თუ შარშან 5 500 ლარით დაფინანსდა ეს პროგრამა, ამ მხრივ წლევანდელ ბიუჯეტში 7 100 ლარია ჩადებული.
ცენტრ “იავნანას” თანადაფინანსებისთვის, რომლის მიზანია, სოციალურად დაუცველი ბავშვების ფსიქო-სოციალური რეაბილიტაციის ხელშეწყობა, სოციალური პროგრამიდან წელს 12 ათასი ლარი გაიხარჯება.
თირკმლის ქრონიკული უკმარისობით დაავადებულთა სამედიცინო დაწესებულებაში ტრანსპორტირების პროგრამის დასაფინანსებლად წლევანდელ ბიუჯეტშიც 39 800 ლარია დაგეგმილი.
წინა წლებისგან განსხვავებით, მცირედით გაზრდილია იძულებით გადაადგილებულ პირთა დახმარების პროგრამის დაფინანსება და 10 ათასი ლარის ნაცვლად წელს 12,2 ათასი ლარია გამოყოფილი.
სამკურნალო და საოპერაციო ხარჯებით დახმარების პროგრამისთვის, თუ გასულ წელს ლანჩხუთის ბიუჯეტს 65,7 ათასი ლარის გაღება მოუწია, წელს 70 ათასი ლარის გახარჯვაა ამ მხრივ გათვალისწინებული.
“გამარჯვებულ ქალთა კლუბის” სარეაბილიტაციო პროგრამის დაფინანსებისთვის თუ გასული წლის გეგმა 30 ათასი ლარი იყო, წლევანდელი სოციალური პროგრამის პროექტის მიხედვით, დაფინანსება 36 ათას ლარამდეა გაზრდილი. ამ პროგრამის მიზანია ნაადრევ ეტაპზე კიბოს დიაგნოზით ნაოპერაციები ქალების მხარდაჭერა მათი შემდგომი რეაბილიტაციის მიზნით. პროგრამა ითვალისწინებს სამედიცინო კვლევებს, სარეაბილიტაციო ვარჯიშების ტრენინგს, ფსიქოლოგიურ ტრენინგს, მონაწილეობას სხვადასხვა კულტურული ღონისძიებებში.
ხანდაზმულთათვის ერთჯერადი დახმარების გაწევის მიზნით, სოციალური პროგრამის პროექტის შესაბამისად, ლანჩხუთის ბიუჯეტი 2019 წელს ორი ათასი ლარის გახარჯვას გეგმავს.
მძიმე საცხოვრებელ პირობებში, უბედური შემთხვევისა და სტიქიური მოვლენების შედეგად დაზარალებული ოჯახებისთვის ერთჯერადი ფულადი დახმარების გაწევის მიზნით, მუნიციპალიტეტი წლის განმავლობაში 40 ათასი ლარის გახარჯვას გეგმავს.
რაც შეეხება შშმ პირის სტატუსის მქონე ბენეფიციართა სარეაბილიტაციო კურსის დაფინანსებას, ამ კუთხით წლევანდელ ბიუჯეტში 10 ათასი ლარია გათვალისწინებული.
პროგრამა ერთჯერადი ფულადი დახმარების გაწევასაც ითვალისწინებს, ამ მხრივ წლევანდელ ბიუჯეტში 13,5 ათასი ლარია ჩადებული.
წლის მთავარი საფინანსო დოკუმენტის მიხედვით, სოციალური პროგრამა ბენეფიციარებისთვის მედიკამენტების შესაძენად დახმარებასაც ითვალისწინებს და საამისოდ, ჯამში, 60 ათასი ლარია გაწერილი. პროგრამის მიხედვით, წლის განმავლობაში ერთჯერადად მედიკამენტების შესაძენად, 150 ლარის ფარგლებში, დახმარებას ის ადამიანები მიიღებენ, რომელთა ოჯახების სარეიტინგო ქულა 65001-დან 150 000-მდეა, ასევე, შშმ პირები და მეორე მსოფლიო ომის ვეტერანები. რაც შეეხება ონკოდაავადებულებსა და ლეიკემიით დაავადებულებს, მათთვის პროგრამა მედიკამენტების შესაძენად ერთჯერად დახმარებას სამასი ლარის ფარგლებში ითვალისწინებს.
