ჩოხატაურის მუნიციპალიტეტის მერია არასამეწარმეო (არაკომერციული) იურიდიული პირების _ სპორტისა და სპორტულ ღონისძიებათა ორგანიზების ცენტრის, საფეხბურთო კლუბ “ბახმაროს“, ლელოსა და რაგბის კლუბების (“ჯანი” და “ღონე“) რეორგანიზაციასა და შერწყმას გეგმავს. აღნიშნული საკითხი საკრებულოს ბიუროს სხდომაზე 23 აპრილს განიხილეს.
მერის მიერ საკრებულოსთვის გაგზავნილ განმარტებით ბარათში ვკითხულობთ:
“საქართველოს ორგანული კანონის “ადგილობრივი თვითმმართველობის კოდექსის” შესაბამისად, მუნიციპალიტეტის მერიამ შეიმუშავა განკარგულების პროექტი მუნიციპალიტეტის მიერ დაფუძნებული აღნიშნული ა(ა)იპ–ების რეორგანიზაციის (შერწყმის) გახორციელებაზე მერისთვის თანხმობის მიცემის შესახებ“.
მერიის განმარტებით, სისტემური და ეფექტიანი მმართველობის უზრუნველყოფის, სპორტული მიმართულებების ერთიანი პოლიტიკის ჩამოყალიბებისა და ღონისძიებების უკეთესი კოორდინაციის მიზნით, მიღებულ იქნა გადაწყვეტილება სპორტის მიმართულებით მოქმედი უწყებების ერთიან სტრუქტურაში გაერთიანების შესახებ.
რა სარგებელს ელოდება მერია რეფორმისგან?
ხელისუფლების განცხადებით, ა(ა)იპ-ების გაერთიანების შედეგად, პირველ რიგში, შემცირდება ადმინისტრაციული ხარჯები და მოხდება საბიუჯეტო სახსრების ოპტიმიზაცია. ფინანსური რესურსები კონცენტრირდება ერთ ორგანიზაციაში, რაც უზრუნველყოფს მათ სწორ გადანაწილებას პრიორიტეტული სპორტული მიმართულებების მიხედვით. მერიაში აცხადებენ, რომ ერთიანი მენეჯმენტის პირობებში გადაწყვეტილების მიღების პროცესი ბევრად სწრაფი და კოორდინირებული გახდება.
ამასთანავე, განმარტებით ბარათში აღნიშნულია, რომ რეორგანიზაციის პროცესში სრულად იქნება დაცული შრომითი კანონმდებლობის მოთხოვნები _ თანამშრომელთა გადანაწილება და კომპენსაციის გაცემა მოქმედი კანონმდებლობის შესაბამისად გახორციელდება.
მერიის გათვლებით, აღნიშნული შერწყმის შედეგად, მიმდინარე წლის ბიუჯეტში დაახლოებით 200 000 ლარის ეკონომია იქნება მიღწეული. _ პროექტის ავტორი და მომხსენებელი მერიის ადმინისტრაციული სამსახურის უფროსი, თეა უჯმაჯურიძეა.
ბიუროს სხდომის ოქმის მიხედვით, საკრებულოს წევრმა მარიტა მგალობლიშვილმა კოლეგებს წინადადებით მიმართა, რომ აღნიშნული საკითხი დღის წესრიგიდან მოეხსნათ:
“აღნიშნული თანხმობის გაცემა მიზანშეწონილი იქნება მხოლოდ იმ შემთხვევაში, თუ საკითხზე სრული და ამომწურავი ინფორმაცია იქნება წარმოდგენილი. ამასთანავე, დაევალოს ადმინისტრაციულ სამსახურს, სრულყოფილი და ობიექტური გარემოებების უზრუნველსაყოფად, დამატებით წარმოადგინოს საშტატო ნუსხისა და წესდების სამუშაო ვერსიები“, _ თქვა მგალობლიშვილმა.
საკრებულოს სხდომის თავმჯდომარემ საკითხი ღია კენჭისყრაზე დააყენა, რის შედეგადაც მერიისთვის თანხმობის მიცემას ბიუროს 10-მა წევრმა დაუჭირა მხარი. თუმცა, აღნიშნული რეფორმა საკრებულოს დიდ სხდომაზე კენჭისყრაზე ამ ეტაპზე არ გასულა, ვინაიდან პროექტს საკრებულოს კომისიებში შენიშვნები შეხვდა.
საკრებულოს კულუარებში განმარტავენ, რომ რეორგანიზაციის ზუსტი სტრუქტურა _ თუ კონკრეტულად რა რას უერთდება, საბოლოოდ დაზუსტებული არ არის. რეფორმის დეტალები, სავარაუდოდ, მომავალ 2-3 კვირაში გახდება ცნობილი, როდესაც მერია კომისიების შენიშვნებს გაითვალისწინებს და განახლებულ ვარიანტს წარადგენს.
მიმდინარე რეორგანიზაციასთან დაკავშირებით “გურია ნიუსი” რაგბის კლუბ “ღონეს” ხელმძღვანელობას დაუკავშირდა. კლუბში აცხადებენ, რომ ცვლილებების მიუხედავად, მათი სამუშაო პროცესი არ შეფერხდება:
“პოზიცია ერთგვაროვანია. ყველაფერი დამოკიდებულია ბიუჯეტზე და იმაზე, თუ როგორ უნდა განვითარდეს სპორტი. საკმაოდ კარგი წინადადებებით შემოდიან. ჩვენ ხელი არ გვეშლება, ცალკე სექტორად მაინც ვრჩებით და განვითარება მოხდება“, _ აცხადებენ კლუბში.
კითხვაზე, მოჰყვება თუ არა რეფორმას შტატების შემცირება, რაგბის კლუბ “ღონეში” განმარტავენ, რომ მათ ეს ცვლილება არ შეეხებათ და ყველა თანამშრომელი სამსახურში დარჩება. მეტიც, გუნდს ახალი კადრებიც კი ემატება:
“განვითარების ჯგუფი დაგვემატა თბილისიდან _ ლიცენზირების სპეციალისტები, ვინც მწვრთნელების გადამზადებას ახორციელებს. ორი ადამიანი დაგვემატა და კვირაში ორი დღე ჩვენთან იმუშავებენ. მცირებიუჯეტიანი მუნიციპალიტეტი ვართ და ვფიქრობ, რომ ამ მხრივ განვითარება ნორმალურად წავა“, _ აღნიშნეს კლუბში.
სანამ მუნიციპალიტეტის მერია სპორტული ა(ა)იპ-ების ოპტიმიზაციით 200 000 ლარის დაზოგვას აანონსებს, საფეხბურთო კლუბ “ბახმაროში” სერიოზული ფინანსური კრიზისია. კლუბმა სოციალურ ქსელში ემოციური განცხადება გაავრცელა, სადაც პირდაპირ საუბრობს იმ მწირ რესურსებზე, რის ხარჯზეც გუნდს ლიგა 4-ში ასპარეზობა უწევს.
კლუბის განცხადებით, “გაგრა 2”-თან მოპოვებულმა ბრწყინვალე გამარჯვებამ მათ მისცა ბიძგი, რომ პრობლემებზე ღიად ილაპარაკონ:
“ბევრი ახსნა არ სჭირდება იმას, თუ რა რესურსით, რა ფინანსებით და რის ხარჯზე უწევს ჩვენს გუნდს ლიგა 4-ში ასპარეზობა. გვყავს ახალგაზრდული კონტიგენტი. ჩვენ არ ვაკნინებთ ამ ბიჭების შრომას და მონდომებას, მაგრამ მათი ასაკიდან გამომდინარე, ისინი ჯერ ჩამოყალიბების პროცესში არიან და მათგან სტაბილურობა ნაკლებად მოსალოდნელია. სწორედ ამის შედეგია, რომ ერთ მატჩში ყველაფერი გამოსდით, ხოლო შესაძლოა მომდევნო 2-3 შეხვედრა ჩაუვარდეთ.
ამიტომაა საჭირო გუნდში, თუნდაც, 2-3 ძლიერი და გამოცდილი ფეხბურთელი, ვინც ძირითად ტვირთს აწევს, ახალგაზრდებს გამოცდილებას გაუზიარებს, მოედანზე ბრძოლას ასწავლის და უფრო სტაბილური იქნება. ასეთი ფეხბურთელების მოსაყვანად კი თანხებია საჭირო, რომ მათ არა მიზერულ, არამედ ცოტა სერიოზულ ანაზღაურებაზე მოუწიოთ თამაში“, _ აღნიშნულია კლუბის განცხადებაში.
“ბახმაროში” მიიჩნევენ, რომ სწორედ ახლა, ლიგა 4-ის პაუზის დროს არის საჭირო გუნდის თანადგომა და მეტი ფინანსების გამოყოფა, რათა კლუბი ნაადრევად არ ჩამოიწეროს და რეგიონულ ლიგაში არ გავარდეს, საიდანაც მისი საერთოდ გაქრობა უფრო რეალური გახდება.
“გუშინდლამდე ძალიან მცირე რესურსით “ბახმარომ” მხოლოდ 4 ქულის აღება მოახერხა, მაგრამ “გაგრა 2″-თან, რომელსაც საკმაოდ დიდი ფინანსური და ადამიანური რესურსი აქვს, გუნდმა საოცარი თამაში აჩვენა. ყველამ ბოლომდე იბრძოლა, ყველამ ცეცხლი დაანთო მოედანზე და ამ მნიშვნელოვანი გამარჯვებით ლიგაში ადგილის შენარჩუნების შანსი შევინარჩუნეთ. სწორედ ამ ბიჭების ასეთი ბრძოლაა დასაფასებელი და გვერდში დგომაა საჭირო _ პირველ რიგში, მეტი ფინანსებით, რაც გარდაუვალი და უმნიშვნელოვანესი საკითხია“, _ წერია საფეხბურთო კლუბის მიერ 15 ივნისს გავრცელებულ განცხადებაში.
ავტორი
