“გურია ნიუსი” შეეცადა, გაერკვია, როგორია პროდუქტებზე ფასების ზრდის თუ პირიქით, კლების ტენდენცია გურიაში, კონკრეტულად, ოზურგეთში და რა არის ამის მიზეზი ორივე შემთხვევაში. ასევე, შესაძლებელია თუ არა იმავე ფასად იყიდო ესა თუ ის პროდუქტი, რასაც ვთქვათ, ერთი წლის წინ ან თუნდაც, წლის დასაწყისში ვიყიდდით.
ოზურგეთის აგრარულ ბაზარში, სადაც ბლომადაა განლაგებული პატარა სასურსათო მაღაზიები, პირველივე შემხვედრს ვეკითხებით, რა გადაიხადა თითოეული სახის პროდუქტში.
ნინო ორაგველიძე: _ რა გადავიხადე, რას მეკითხებით?! ჯობს, ფული მაქვს თუ არა, იმით დაინტერესდეთ. ხალხი ჯიბეცარიელია. სიძვირეს რაც შეეხება, არაფერი გაძვირებულა, მგონი. კარტოფილში 80 თეთრი გადავიხადე, კვერცხში _ 30 თეთრი… ძალიან იაფია ბოსტნეული, ფული სადაა თორემ… არც ყველია ძვირი _ 6.5-7 ლარი ღირს. ვისაც ფული საერთოდ არ აქვს, იმისთვის 20 თეთრად რომ იშოვოს ერთი კილო შაქარი, მაინც ძვირია. ყოველ შემთხვევაში, სასურსათო პროდუქტის ფასი კი არ იზრდება, ფული არ არის ხალხში, ესაა მიზეზი, რომ ყველაფერი ძვირი გვეჩვენება.
_ კვერცხის ფასზე რას გვეტყვით? სახლის ქათმის კვერცხი 35-40 თეთრი ღირს…
_ როდის ღირდა სოფლის კვერცხი ნაკლები? 30 თეთრად ყველა მაღაზიაშია. სახლის კვერცხი სააღდგომოდ 50 თეთრი ღირს და ერთ ლარადაც კი მინახავს. ვიმეორებ, ფული არ არის ხალხში. სამი წელია, თხილის სიდამპლემ გურიაში ხალხს საარსებო საშუალება წაართვა. მთავრობა რას აკეთებს, არ ვიცი _ ხალხს ხელისუფლება უნდა უმსუბუქებდეს ყოფას.
ოზურგეთის ბაზრის ტერიტორიაზე განთავსებული მარკეტების მფლობელები ფოტოს გადაღებაზე უარს ამბობენ, თუმცა, საკუთარი აზრის გამოთქმას არ ერიდებიან; ცენტრალურ ადგილზე მდებარე მარკეტში მომუშავე ქალბატონი ასე ფიქრობს:
_ მე არც ამ მთავრობის მაქებარი ვარ და წინას ხომ საერთოდ ნუ მიხსენებთ! 20 წელია, ვაჭრობის საქმეში ვარ, მაქვს მცირე ბიზნესი. დოლარის ფასი თუ აიწია, ეს დიდად არ ასახულა ჩვენს პროდუქციაზე. მაგალითად, იმ დროს წიწიბურა კილოგრამი 4 ლარი ღირდა, ახლა ლარნახევრად მაქვს აგერ. შაქრის ფასი ნახეთ _ 1,35 თეთრია. კვერცხის ფასი სად გაიზარდა, რომ ყვირიან?! ერთი წლის წინ რა ღირდა?! აგერ გვაქვს 30 თეთრად, ვისაც სურს მოვიდეს აქ, ჩვენთან. ჩემი მარკეტი ყველამ იცის. ასეა სხვაგანაც. ზოგან 2 ან 5 თეთრით მეტი ღირს. ასეც უნდა იყოს _ თავისუფალი საბაზრო ეკონომიკააო, ხომ ამბობენ? საქმე ის არის, რომ ხალხს არ აქვს ფული. ქვეყანაში უამრავი ადამიანია დაუსაქმებელი. ყველა რომ მუშაობდეს, ალბათ, ფასები უფრო მაღალი იქნება, _ გვეუბნება ქალბატონი.
ჩვენ ვიკითხეთ თითქმის ყველანაირი ბოსტნეულის, ხილის თუ სასურსათო პროდუქტის ფასი: ერთი კილოგრამი ბულგარული წიწაკა, საშუალოდ, 80 თეთრი ან 1,30 ლარი ღირს, როცა გასულ წელს ერთი კილოგრამი 3 ლარი ღირდა. ერთი კგ. ხახვი ხილ-ბოსტნეულის მაღაზიაში 70 თეთრი ღირს, ბევრგან კი _ 1 ლარი. კარტოფილი _ 0,80-1,0 ლარი. ნივრის ფასი სხვა წლებთან შედარებით ყველაზე დაბალია _ ერთი კილოგრამი 1,50 თეთრი ღირს. სტაფილო _1 ლარი. ასევე, იაფია მწვანილეული. ხილს რაც შეეხება, საშუალო ხარისხის ვაშლი 50 თეთრი ღირს, ძალიან კარგ ვაშლს კი ერთ კილოგრამს 1,50 ლარად იყიდით. ერთი ლარი ღირს მანდარინი, საუკეთესო ხარისხის კომში _ 1,30 ლარი.
ახლა რძის ნაწარმი ვნახოთ: ერთი კილოგრამი ყველი 6,50-7 ლარი ღირს. ნადუღი _ 3 ლარი, ერთი ლიტრი რძე _ 1,30 ლარი. ნახევარი ლიტრი მაწონი _ 1,20 ლარი.
ერთი კილოგრამი შაქარი 1.30-1,40 ლარი ღირს.
ხორცს რაც შეეხება, ერთი კილოგრამი საქონლის ხორცი 14 ლარი ღირს.
_ თუ ადამიანს ოთხი ან ხუთი კილოგრამი მიაქვს, კილოგრამზე ლარს ვუკლებთ, _ გვეუბნება გამყიდველი და განმარტავს, რომ იანვრიდან ხორცის ღირებულებაში არაფერი შეცვლილა.
თუ ერთი წლის წინანდელ ფასებს შევადარებთ, შაქრის ფასი ყურძნის სეზონზე 1,70 ლარამდეც კი ავიდა.
ამ წლის ზაფხულსა და შემოდგომის დასაწყისში, როცა გურიაში ბაღ-ბოსტნებსა და ხეხილოვანთა პლანტაციებს მავნებელმა აზიურმა ფაროსანამ შეუტია, თითქმის ვერ მიიღეს ლობიოს თუ სხვა ბოსტნეული კულტურების მოსავალი, თითქმის ყველა ამბობდა, რომ დამდეგ ზამთარში გლეხს ძალიან გაუჭირდებოდა.
_ ღმერთმა მარჯვენა უხაროს აღმოსავლეთ საქართველოს გამრჯე ხალხს _ იმდენი ხილ-ბოსტნეული შემოვიდა ამ შემოდგომაზე, ხარისხიანი და თან შედარებით იაფად, ხალხმა ცოტა ამოისუნთქა, ყველა ოჯახმა მოიმარაგა და გააკეთა ზამთრისთვის სხვადასხვა კონსერვები თუ საწებლები. კიდევ კარგი, ფაროსანას ჯერ აღმოსავლეთში არ შეუღწევია, _ ასე ასრულებენ ჩვენთან საუბარს კობა და ბეჟან ლომჯარიები, მარინა მჟავანაძე, ხათუნა კინწურაშვილი.
