,,ვიდრე სასამართლო ნიკა მელიას მიმართ გამოყენებულ აღკვეთის ღონისძიებას არ შეცვლის, ის გირაოს რეჟიმში რჩება“, – ამის შესახებ გენერალური პროკურატურის საგამოძიებო ნაწილის საპროკურორო ზედამხედველობის სამმართველოს უფროსმა, ამირან გულუაშვილმა პარლამენტის პლენარულ სხდომაზე განაცხადა, სადაც ნიკა მელიასათვის სადეპუტატო იმუნიტეტის მოხსნის საკითხის განხილვა მიმდინარეობს.
მისვე თქმით, ნიკა მელიას სახელით, მის სასარგებლოდ სხვა პირს შეულია თანხა აღსრულების ეროვნული ბიუროს შესაბამისს ანგარიშზე შეიტანოს.
ასევე პროკურორმა აღნიშნა, რომ გირაოს მოცემულობა მხოლოდ სასამართლოს გადაწყვეტილების შემდეგ ანულირდება და გადახდა აზრს დაკარგავს.
„ვადის გასვლის მიუხედავად, ჩვენი მხრიდან ნიკა მელიას დამატებით ერთკვირიანი ვადა შეეთავაზა იმისთვის, რომ მან სასამართლოს მიერ დაკისრებული ვალდებულება შეასრულოს. ის ვალდებულების შესრულებაზე უარს აცხადებს. გააკეთა სახასიათო განცხადება, რომ სასამართლოში არ გამოცხადდება, რაც მიუთითებს, რომ გარაო, რომელიც ამ ეტაპზე არის გამოყენებული, აღკვეთის ღონისძიების მიზნებს ვერ უზრუნველყოფს. მას არც გირაოს გადახდა უნდა და არც სასამართლოში გამოცხადება.
ვიდრე სასამართლო ნიკა მელიას მიმართ გამოყენებულ აღკვეთის ღონისძიებას არ შეცვლის, ის გირაოს რეჟიმში რჩება – შესაბამისად, სასამართლოს გადაწყვეტილებამდე მას, ან მისი სახელით მის სასარგებლოდ სხვა პირს, შეუძლია გირაოს თანხა აღსრულების ეროვნული ბიუროს შესაბამისს ანგარიშზე შეიტანოს“, – განაცხადა გულიაშვილმა.
პარლამენტი, პლენარული სხდომის ფორმატში, გენერალური პროკურორის მომართვის საფუძველზე, დეპუტატ ნიკა მელიას სადეპუტატო იმუნიტეტის შეჩერების საკითხს იხილავს.
