„პრომეთეს მღვიმე“ წყალტუბოს მუნიციპალიტეტის სოფელ ყუმისთავში, მდინარე ყუმის აუზში მდებარეობს.
მღვიმეში აღმოჩენილია 22 დარბაზი, საიდანაც ტურისტებისთვის, ჯერჯერობით, 6 დარბაზია გახსნილი.
მღვიმეში შესაძლებელია 1 420 მეტრის სიგრძის ბილიკის გავლა, დარბაზების დათვალიერება და სანაოსნო ტურით გასეირნება მდინარის გამდინარე ნაკადზე.
“პრომეთეს მღვიმის” აღმოჩენას საინტერესო ისტორია აქვს. 1982 წელს ამიერკავკასიაში საბჭოთა კავშირის სარდლობამ დაიწყო ისეთი მღვიმეების ძიება, სადაც შესაძლებელი იქნებოდა ატომური ომის დროს მოსახლეობის დაცვა.
ამ მიზნით გეოგრაფიის ინსტიტუტში შედგა ჯგუფი ჯუმბერ ჯიშკარიანის ხელმძღვანელობით.
1983 წლის 15 ივლისს ვახუშტი ბატონიშვილის სახელობის გეოგრაფიის ინსტიტუტის სპელეოლოგიური ექსპედიცის წევრებმა: ჯუმბერ ჯიშკარიანმა, ამირან ჯამრიშვილმა, ვახტანგ კაპანაძემ და თამაზ ქობულაშვილმა სოფელ ყუმისთავთან ახალი მღვიმე აღმოაჩინეს.
1984 წელს დაიწყო მღვიმის ტურისტულად განვითარების გეგმაზე მუშაობა. მოგვიანებით გეოგრაფიის ინსტიტუტის აკადემიკოს ზურაბ ტატაშიძის ხელმძღვანელობით მღვიმის მრავალწლიანი, დეტალური კვლევა დაიწყო.
1986-1990 წლებში მღვიმეში პირველი ბილიკები გაკეთდა, რომელთა სიგრძე 1050 მეტრი იყო.
1992-2007 წლებში ქვეყანაში შექმნილი მძიმე ეკონომიკური ვითარების გამო შეწყვეტილი იყო ყველანაირი სამუშაოები.
ამ პერიოდში მღვიმეს არასასურველი ვიზიტორებისგან დარაჯი, გიორგი ტყაბლაძე იცავდა.
2010 წელს მღვიმის ეზოში მისი ძეგლი გაიხსნა.
2007 წელს მღვიმეში „ქართუ ჯგუფმა“ სარეაბილიტაციო სამუშაოები დაიწყო. მრავალი წლის შემდეგ განახლდა მღვიმის კომპლექსური შესწავლა და ახალი ინფრასტრუქტურის დანერგვა.
2011 წელს მღვიმე ოფიციალურად გაიხსნა და მას „პრომეთეს მღვიმე“ ეწოდა.
მღვიმის კვლევა დღესაც გრძელდება.
„გურია ნიუსი“ „პრომეთეს მღვიმეში“ მედიატურით იმყოფებოდა, რომელიც დაცული ტერიტორიების სააგენტოს ინიციატივით ჩატარდა.
„პრომეთეს მღვიმეში“ გადაღებულ კადრებს გთავაზობთ.
