პუტინმა ციხეში მოკლა ალექსეი ნავალნი – ასე ეხმაურება საქართველოს მესამე პრეზიდენტი რუსი ოპოზიციონერის სიკვდილს:
პუტინმა ციხეში მოკლა ალექსეი ნავალნი. შარშან ნავალნიმ ციხიდან ჩემს მხარდასაჭერად წერილი გამოაგზავნა. პუტინი ნავალნის მე ხშირად მადარებდა და, რა თქმა უნდა, ერთიანად ვეზიზღებოდით.
შარშან პუტინის დავალებით ოლიგარქის პრორუსულმა რეჟიმმა მომწამლა ციხეში და მაშინ ღმერთმა გადამარჩინა. რა თქმა უნდა, ივანიშვილს ხელი არ აუღია პუტინის დავალების შესრულებაზე და მეც ნავალნის მსგავსად ბოლომდე ვიბრძოლებ პუტინიზმის დამარცხებისთვის საქართველოში.” წერს მიხეილ სააკაშვილი
შეგეხსენებთ, რომ რუსი ოპოზიციონერი, ალექსეი ნავალნი მაშინ დააკავეს, როცა ბერლინიდან რუსეთში ბრუნდებოდა. ბერლინში ის ნოვიჩოკით მოწამვლის შემდეგ მკურნალობდა.
საქართველოში ნავალნის მიმართ განწყობები სხვადასხვანაირია; მის ბრძოლას პუტინის მკვლელი რეჟიმის წინააღმდეგ პატივის ცემენ, მაგრამ მას ვერ პატიობენ აფხაზეთისა და სამაჩაბლოს რეგიონების საქართველოდან ჩამოშორების მიმართ რუსულ-შოვინისტურ პოზიციას. თუმცა, მისი თანამებრძოლები ამბობდნენ, რომ ნავალნიმ პოზიცია შეიცვალა და პოსტ საბჭოთა საზღვრების დაცვას უჭერდა მხარს.
2021 წლის იანვარში, “ამერიკის ხმასთან“ ინტერვიუში, მისმა თანაგუნდელმა ვლადიმერ მილოვმა სწორედ ამაზე ისაუბრა. ჟურნალისტმა კითხვა საქართველოს მიმართ ნავალნის დამოკიდებულების შესახებაც დაუსვა. მილოვმა თქვა, რომ ალექსეი ნავალნიმ პოზიციები შეიცვალა:
“საქართველოში, 2008 წლის ომის დროს, ღიად ვჩხუბობდით ინტერნეტში ამ საკითხზე. ჩვენ ეს თემა ხშირად განგვიხილავს მოგვიანებითაც. მისი პოზიცია შემდეგ ძალიან შეიცვალა. ის, რა თქმა უნდა, მიიჩნევს, და მე ამას ხშირად ვამბობ, რომ პოსტ-საბჭოთა სივრცის საზღვრების გადახედვა მიუღებელია. ეს მისი პრინციპული პოზიციაა. მაშინდელი კონტექსტიც უნდა გავითვალისწინოთ; 2012 წელს მიხეილ სააკაშვილმა შემთხვევით არ წააგო არჩევნები. საქართველოში ვხედავდით ავტორიტარულ ტენდენციებს.
“ფრიდომ ჰაუსის” კვლევით, 2008 წელს, საქართველოს რეიტინგები გაუარესდა, იმიტომ, რომ ზღუდავდნენ ოპოზიციას. ნავალნიმ ამაზეც გააკეთა კომენტარი. სააკაშვილს ბევრი აღიქვამს, როგორც თავისუფლებისთვის მებრძოლს, მაგრამ მაშინ ეს ასე არ გამოიყურებოდა. გვახსოვს, თავდაცვის მინისტრმა, ირაკლი ოქრუაშვილმა განაცხადა, რომ ცხინვალში შეხვდებოდა ახალ წელს. 2006 წელს თბილისში ვიყავი, სააკაშვილსაც შევხვდი. მაშინ, ძალადობრივი სცენარებიც განიხილებოდა ტერიტორიული პრობლემების გადასაჭრელად. მე და ნავალნის ეს არ მოგვწონდა, ჩვენ ვეწინააღმდეგებით ძალადობრივ სცენარებს. ამიტომ, აქ სიტუაცია უნდა განვიხილოთ ისე, როგორც იყო 2008 წლის აგვისტოში. თუმცა, ნათელია, რომ თავად რუსულ აგრესიას ნავალნი მაშინაც და დღესაც გმობს. საეჭვო არავისთვისაა საზღვრების უცვლელობის პრინციპი; ჩვენი პრინციპული პოზიციაა, რომ აფხაზეთი და სამხრეთ ოსეთი უნდა იყოს განხილული, როგორც საქართველოს ნაწილი. იყო განსხვავებები, პოზიციები შეიცვალა, თუმცა, საჭიროა, არ დაგვავიწყდეს მნიშვნელოვანი ასპექტები”, _ განაცხადა მაშინ ვლადიმირ მილოვმა “ამერიკის ხმასთან“.
იმის მიუხედავად, რომ წინა დღეს, სასამართლოს სხდომაზე სრულიად ჯანმრთელად და მხიარულად გამოიყურებოდა, მეორე დღეს, ოფიციალური ინფორმაციით, მოულოდნელად გარდაიცვალა.
