reuters-ის ინფორმაციით, რუსეთის პრეზიდენტმა ვლადიმერ პუტინმა სამშაბათს განაცხადა, რომ შეცდომა იყო საბჭოთა კავშირის გადაწყვეტილება უნგრეთსა და ჩეხოსლოვაკიაში ტანკების გაგზავნის შესახებ ცივი ომის დროს მასობრივი საპროტესტო აქციების ჩასახშობად.
”ეს იყო შეცდომა”, – თქვა პუტინმა, როდესაც ჰკითხეს რუსეთის, როგორც კოლონიალური ძალის აღქმის შესახებ მოსკოვის გადაწყვეტილების გამო, გაეგზავნა ტანკები ბუდაპეშტში 1956 წელს და პრაღაში 1968 წელს.
„არასწორია საგარეო პოლიტიკაში ისეთი რამის გაკეთება, რაც ზიანს აყენებს სხვა ხალხის ინტერესებს“, – თქვა პუტინმა, რომელმაც 2022 წელს ათიათასობით ჯარისკაცი გაგზავნა უკრაინაში, რამაც გამოიწვია ევროპაში ყველაზე დიდი სახმელეთო ომი მეორე მსოფლიო ომის შემდეგ.
“ამერიკის შეერთებული შტატები უშვებს იმავე შეცდომებს, რასაც საბჭოთა კავშირი. ვაშინგტონს “მეგობრები არ ჰყავს, მხოლოდ ინტერესებია”,_ განაცხადა პუტინმა.
ცნობისთვის, 1956 წლის უნგრეთის აჯანყება ჩაახშეს საბჭოთა ტანკებმა და ჯარებმა. ბრძოლებში დაიღუპა სულ მცირე 2600 უნგრელი და 600 საბჭოთა ჯარისკაცი.
1968 წლის პრაღის გაზაფხული დასრულდა, როდესაც საბჭოთა კავშირის ხელმძღვანელობით ვარშავის პაქტის ძალები შეიჭრნენ ჩეხოსლოვაკიის სოციალისტურ რესპუბლიკაში. ჩეხი ისტორიკოსების ცნობით, შემოსევის შედეგად დაიღუპა 137 ჩეხი და სლოვაკი.
