ქალაქ ოზურგეთში ბენიამინ ჩხიკვიშვილის ბიუსტის დადგმა იგეგმება, _ ამასთან დაკავშირებით ოზურგეთის მუნიციპალიტეტის საკრებულოს მორიგ სხდომაზე იმსჯელებენ.
როგორც „გურია ნიუსისთვის“ გახდა ცნობილი, კომპანია ,,სანპეტროლიუმ ჯორჯიამ” მიმდინარე წლის აპრილში მუნიციპალიტეტის მერიას მიმართა ინიციატივით, ქ. ოზურგეთში ზვიად გამსახურდიას მოედნის მიმდებარედ არსებულ ე.წ. ,,ჭადრების” ბაღში ბენიამინ ჩხიკვიშვილის ბიუსტის განთავსების შესახებ.
ოზურგეთის მუნიციპალიტეტის საკრებულოს პრესსამსახურის მიერ მოწოდებული ინფორმაციით, მუნიციპალიტეტის მერიამ მოქმედი კანონმდებლობის შესაბამისად, კომპანიის ინიციატივა გადმოაგზავნა საკრებულოში, შემდგომი სამართლებრივი პროცედურების გახორციელების მიზნით.
საკრებულოს დარგობრივმა კომისიებმა განიხილეს აღნიშნული ინიციატივა და კანონის შესაბამისად, აღნიშნული საკითხი გადააგზავნეს შეთანხმების მიზნით კულტურის, სპორტისა და ახალგაზრდობის სამინისტროში.
საკრებულომ მიიღო სამინისტროდან დადებითი რეკომენდაცია ბენიამინ ჩხიკვიშვილის ბიუსტის განთავსების თაობაზე.
ბიუსტის განთავსების შემდგომი პროცედურა ითვალისწინებს ინიციატივის განხილვას საკრებულოს სხდომაზე და შესაბამისი განკარგულების დამტკიცებას.
ბენიამინ ჩხიკვიშვილი იყო ქართველი პოლიტიკოსი, სოციალ-დემოკრატი, ეკავა სხვადასხვა მაღალი თანამდებობა საქართველოს დემოკრატიული რესპუბლიკის დროს.
ავტორი
