ლანჩხუთში, სოფელ შუხუთში კოსმოდრომ „კოლხიდას” გამშვები პუნქტის მშენებლობაა დაგეგმილი. ამის შესახებ ინფორმაცია „აი ფაქტის“ ჟურნალისტურმა გამოძიებამ გაასაჯაროვა.
„ნამეტანი ჩახლართული ამბავია. გასაკვირი არაფერია, მაგრამ ამ შემთხვევაში უფრო აფერასთან გვაქვს საქმე. “-ასეთია ლანჩხუთელ ოპოზიციონერთა პოზიცია შუხუთში „კოსმოდრომის“ მშენებლობის თემასთან დაკავშირებით.
„ეგ აკლდა ლანჩხუთს სრული ბედნიერებისთვის. არ ვიცი სერიოზული კომენტარი გავაკეთო ამაზე, ნახევრად სერიოზული თუ არასერიოზული. წესით ნორმალურ სახელმწიფოში მსგავსი ჟურნალისტური გამოძიების შემდეგ შესაბამისი სამსახურები უნდა ინტერსდებოდნენ, როცა მტრულად გამწყობილ და ოკუპანტი სახელმწიფოს მოქალაქეებზეა საუბარი და საბრძოლო წარმოებაცაა ნახსენები.
ჯერჯერობით, მე არარეალურად და არასერიოზულად ვუყურებ ამ თემას, დანარჩენს დავაკვირდებით. ისე, მოქმედი ე.წ. ხელისუფლების პირობებში, რომელიც ღიად თანამშრომლობს აგრესორთან, საერთოდ არაფერი აღარაა გასაკვირი“- ამბობს ენმ-ის ლანჩხუთელი ლიდერი კახა ასკურავა.
„ლელო-ძლიერი საქართველოს“ ლანჩხუთის ორგანიზაციის ხელმძღვანელი კი მიიჩნევს, რომ რუსი მოქალაქეების მხრიდან ფულის გათეთრებასთან გვაქს საქმე.
„ჰო, რა, ბაიკანურის კოსმოდრომის ალტერნატივაა შუხუთი, რუსებს ყაზახეთმა პრობლემები შეუქმნა და „გრუზია“ აგერ არაა? ეს ვიხუმრე რა თქმა უნდა, მართალია რუსეთთან ფლირტში ჩვენი ხელისუფლებისგან გასაკვირი არაფერია, მაგრამ ამ შემთხვევაში უფრო აფერასთან გვაქვს საქმე. ვიღაც რუსი მოქალაქეები ეტყობა ცდილობენ ფულის გათეთრებას და სამიზნედ ლანჩხუთის მუნიციპალიტეტში, კერძოდ შუხუთის ადმინისტრაციულ ერთეულში მდებარე მიწის ნაკვეთი აიღეს, სადაც მიტოვებული საწარმოს მხცოვან მეპაიეებს, წილის 51 პროცენტი ააცალეს. რა და როგორ, ეს საინტერესოა და ისიც, რა როლი აქვს ამ ყველაფერში მუნიციპალიტეტის მერიას. ასე უპრაგონოდ რომ სხვისდება მიწები უცხოელებზე, ეს მართლაც საგანგაშო ფაქტია და დროა, ხელისუფლებას მკაცრად მოვთხოვოთ, შეწყვიტოს ის მარაზმი, რაც ახლა ხდება“ – ამბობს გოჩა ჯანაშია.
საქმე ისაა, რომ „კოსმოდრომის“ მშენებლობის იდეის ავტორები რუსეთის მოქალაქეები იულია და მარია არხიპოვები არიან, რომლებიც საქართველოში უკრაინაში რუსეთის შეჭრის შემდეგ ჩამოვიდნენ, აქ ორი კომპანია დააფუძნეს, მიწები იყიდეს, ნაწილი კი, როგორც ირკვევა, მიითვისეს.
„აი ფაქტის“ ცნობით, იულიაც და მარიაც კოსმოსური ტექნოლოგიების სფეროდან მოდიან. მარიას მაგისტრის ხარისხი აქვს კოსმოსური ინდუსტრიის საჯარო ადმინისტრირებაში. სწავლობდა მოსკოვის სახელმწიფო უნივერსიტეტის კოსმოსური კვლევების ფაკულტეტზე. შემდეგ მუშაობდა ორბიტალური სადგურის “მირ-2” მშენებლობის კოორდინატორად და კოსმოსური ტექნოლოგიების კონსორციუმის იურისტად.
ჟურნალისტური გამოძიების მიხედვით, არხიპოვებმა ლანჩხუთში, შემოღობილ ტერიტორიაზე კოსმოსური ხომალდების ასაფრენი ადგილის, დრონებისა და თანამგზავრების საწარმოს მოწყობა სურთ. გეგმავენ კოსმოსში ხალხის გაშვებასაც
საამისოდ კი არხიპოვების კუთვნილმა კომპანიამ “სერვიუკ აგრომ” ლანჩხუთში სამი ნაკვეთი შეიძინა – ჯამში, 14 000 კვადრატულ მეტრამდე ტერიტორია. არხიპოვების გეგმის მიხედვით, სწორედ ამ ნაკვეთებიდან უნდა მოხდეს ხომალდები ორბიტაზე გაშვება.
“მარია 46 წლისაა, იულია 45 წლის. გურიაში მათ დებად იცნობენ, მაგრამ მარიას მამის სახელი სერგეია, იულიასი კი – ალი. სინამდვილეში, ისინი პარტნიორები არიან და ცოლ-ქმარი იყვნენ მაშინაც, როცა მარიას ჯერ კიდევ ევგენი ერქვა და კაცად იდენტიფიცირდებოდა.
წლების წინ, მარია არხიპოვას ევგენი არხიპოვი იყო. შემდეგ კი ის ტრანსგენდერი ქალი გახდა და ამაზე მედიაში ღიად დაიწყო საუბარი“- წერს „აი ფაქტი“.
როგორც ირკვევა, არხიპოვებმა შუხუთში საბაზისო ინფრასტრუქტურის მოწყობა დაიწყეს. დაამონტაჟეს ელექტროგაყვანილობა, დააყენეს მრიცხველები, გაარემონტეს შენობის კარ-ფანჯარა, გაიყვანეს კანალიზაცია, წყალი და ტერიტორია გაწმინდეს.
„აი ფაქტის“ ცნობით, რუსი ქალები ინფორმაციას და ანგარიშებს რუსეთის სახელმწიფო უწყებებს აწვდიან – “ჩვენ ხელში ჩაგვივარდა ე.წ. პრავფონდთან მათი წერილობითი კომუნიკაცია და ასობით მეილი 2014 წლიდან მოყოლებული. ამ მიმოწერებმა “პრავფონდიდან” გამოჟონა და OCCRP-ს ჩაუვარდა ხელში. “აი, ფაქტი”, როგორც OCCRP-ს ქსელის წევრი ორგანიზაცია, ამ გზით ჩაერთო გამოძიებაში” – წერს გამოცემა.
ერთ-ერთ ასეთ წერილში, იულია არხიპოვა წერს, რომ “საქართველოს ნაციონალისტურად განწყობილი მოქალაქეების მხრიდან მუდმივ მუქარას” აწყდება. ის ითხოვს “რუსეთის ფედერაციამ დაიცვას თავისი მოქალაქე”
“პრავფონდი” [თანამემამულეების დაცვისა და მხარდაჭერის ფონდი] 2012 წელს რუსეთის იმდროინდელი პრეზიდენტის, დიმიტრი მედვედევის, დადგენილებით შეიქმნა. ფონდის მიზანი, ოფიციალურად, საზღვარგარეთ მყოფი რუსების სამართლებრივი დახმარებაა. არაოფიციალურად კი გეოპოლიტიკური ინსტრუმენტია და რუსულ რბილ ძალას წარმოაგდენს ევროპაში, საქართველოში, მოლდოვაში, უკრაინსა და ცენტრალური აზიის ქვეყნებში. ფონდი 2023 წლიდან სანქცირებულია აშშ-სა და ევროკავშირის მიერ.
ირკვევა, რომ ამ ეტაპისთვის, შუხუთში კოსმოდრომის მშენებლობის პროცესი შეჩერებულია.
“კოსმოდრომის მშენებლობის საკითხი ამჟამად გაჩერებულია პროექტის შეთანხმების ეტაპზე. როგორც კი მივიღებთ თანხმობას, მზად ვართ მშენებლობისთვის. თქვენი მთავრობა გასცემს ნებართვას, ჩვენ ვიწყებთ მშენებლობას. ჩვენ გვჭირდება ერთი წელი, მშენებლობის დაწყებიდან სრულად გამართული მუშაობის დაწყებამდე” -ამ თემაზე ასეთია პასუხი მიიღო არხიპოვებისგან გამოცემამ.
რუსეთის მოქალაქეებმა მიწის ნაკვეთი შუხუთში თამაზ იმნაიშვილისა და დარეჯან კალაჯიშვილისგან შეუძენიათ, რომელიც მათ გელა ზოიძემ გააცნო და დააკავშირა. იგი ახლა სავაჭრო-სამრეწველო პალატის რეგიონული ოფისის ხელმძღვანელია, მანამდე კი ა(ა)იპ “ლანჩხუთის მუნიციპალიტეტის ეკონომიკური განვითარებისა და ინოვაციების ცენტრის” დირექტორი იყო.
ირკვევა, რომ თამაზ იმნაიშვილისა და დარეჯან კალაჯალაშვილის საკუთრებას წარმოადგენდა შპს “ლიმონი“, რომელიც ნახევარ ჰექტარზე მეტ ტერიტორიას ფლობს და წლების წინ აქ საკონსერვო ქარხანა ფუნქციონირებდა. სწორედ ამ ქონებით დაინტერესდნენ არხიპოვები და „ლიმონის“ მფლობელებს დაპირდნემ, რომ ინვესტიციას ჩადებდნენ და ძველ საწარმო აამუშავებდნენ.
საბოლოოდ კი ქონების მფლობელებსა და არხიპოვებს შორის გაფორმდა ხელშეკრულება, რომლის მიხედვითაც, არხიპოვების ანგარიშიდან, რომელზეც 3.5 მილიონი ქონდათ, შპს „ლიმონში“ უნდა ჩარიცხულიყო დაახლოებით 2.5 მილიონი, რომელიც უნდა მოხმარებოდა წარმოების გაფართოებას, გარემონტებას და ამუშავებას.
სანაცვლოდ კი ძველმა მფლობელებმა წილების 51.55 პროცენტი უსასყიდლოდ დათმეს: 49 პროცენტი არხიპოვების სახელზე გადააფორმეს, 2.55 პროცენტი კი გელა ზოიძის სახელზე, როგორც შუამავალისა და მომლაპარაკებლის. შესაბამისად, არხიპოვებს უფლება მიეცათ განეკარგათ შპს “ლიმონის” საკუთრებაში არსებული ნახევარ ჰა-ზე მეტი მიწა და მასზე არსებული შენობა-ნაგებობები.
თუმცა, „ლიმონის“ ძველი მფლობელები რამდენიმე თვეში მიხვდნენ, რომ არხიპოვები ძველი საწარმოს აღდგენას არ აპირებდნენ და ამის შემდეგ მათ შორის ურთიერთობა დაიძაბა. ახალმა მესაკუთრეებმა ძველებს ტერიტორიაზე შესვლა აუკრძალეს. შპს „ლიმონის” ძველ მფლობელებს პროკურატურისა და სასამართლოსთვის მიმართული აქვთ და ქონების დაბრუნებას ითხოვენ.
„ჩემთან მოვიდნენ ლანჩხუთის სანოტარო კანტორიდან. წესდების შემუშავებაში და საწარმოს დარეგისტრირებაში სჭირდებოდათ დახმარება, რომ რაღაც საქმინობა ეწარმოებინათ რეგიონში. ასე ვეხმარებოდით ჩვენ საწარმოებს, კოოპერატივებს, მცირე მეწარმეებს, რომ მოემზადებინათ დოკუმენტაცია სარეგისტრაციოდ… მერე შევთავაზეთ, რომ თვითონ “ლიმონის” ხელმძღვანელს, თამაზ იმნაიშვილს ეჩვენებინა თავისი საწარმო. მივედით, ვნახეთ, წარმოება დიდი ხნის გაჩერებული იყო და არხიპოვებმა გამოთქვეს სურვილი, რომ საწარმოში შევიდოდნენ და გარკვეულ ინვესტიციას განახორციელებდნენ, ასე მოხდა ამ შპს-ში ამ ადამიანების გაწევრიანება.”- ასეთია გელა ზოიძის მიერ გაკეთებული კომენტარი.
თემასთან დაკავშირებით „გურია ნიუსი“ ლანჩხუთის მერიის პრესსამსახურსაც დაუკავშირდა და მათგან პასუხის მოლოდინში ვართ.
ავტორი
