“ქართული განძი არ იყიდება” _ ოზურგეთში “ექვთიმეს” პრემიერა გაიმართა

ოზურგეთში ალექსანდრე წუწუნავას სახელობის დრამატულ თეატრში გოჩა კაპანაძის სპექტაკლის „ექვთიმეს“ პრემიერა გაიმართა.

სპექტაკლის დაწყებამდე მაყურებლის წინაშე სიტყვით თეატრის სამხატვრო ხელმძღვანელი გამოვიდა.

ვასილ ჩიგოგიძე: პირველ რიგში, გილოცავთ ექვთიმეობას. რაც შეეხება დღევანდელ სპექტაკლს,  „ექვთიმე“ _ ეს არის ჩვენი თეატრის ტრილოგიის მესამე ნაწილი. ,

ამ ტრილოგიის პირველი სპექტაკლი იყო „გურიის უკანასკნელი დედოფალი სოფიო“, მეორე _ „გურიის რესპუბლიკა“ და დღევანდელი სპექტაკლი „ექვთიმე“ დღევანდელ დღეს, ექვთიმეობას ეძღვნება.“ – თქვა ვასილ ჩიგოგიძემ.

2 საათის განმავლობაში მაყურებელმა ოზურგეთელი მსახიობების პროფესიონალიზმი რამდენჯერმე აპლოდისმენტებით შეაფასეს.

სპექტაკლის დასასრულს ექვთიმე თაყაიშვილის შთამომავალმა, რეზო თაყაიშვილმა თავისი შთაბეჭდილება გაგვიზიარა: დიდი შთაბეჭდილების ქვეშ ვარ. ვიცოდი, რომ მზადებოდა ეს სპექტაკლი და ერთგვარი შიშით ველოდებოდი. რატომ შიში? _ სამწუხაროდ, ექვთიმეზე შექმნილ დოკუმენტურ, მხატვრულ თუ პუბლიცისტურ ნაწარმოებებში არ იყო და არ ჩანდა ის სულიერება, რაც ექვთიმე ღვთისკაცთან არის დაკავშირებული. დღეს  ეს სულიერება მე აქ ვნახე და მივიღე საოცარი მუხტი, რაც ზოგადად თეატრის დანიშნულებაა. აღრფთოვანებული ვარ და ყველას მადლობას ვუხდი.

რეჟისორ გოჩა კაპანაძისთვის ეს მეორე სპექტაკლი იყო, რომელიც ტრილოგიის ფარგლებში დადგა. მისი რეჟისორობით უკვე ვიხილეთ „გურიის უკანასკნელი დედოფალი სოფიო“.

როგორც „გურია ნიუსისთვის“ გახდა ცნობილი, ექვთიმე ღვთისკაცის როლზე ოზურგეთელი მსახიობის გიორგი დოლიძის დამტკიცება გოჩა კაპანაძის იდეა იყო. ვასილ ჩიგოგიძემ მედიის წარმომადგენლებთან შეხვედრის დროს თქვა, რომ არაერთი მსახიობის თაობაზე იყო საუბარი.

გოჩა კაპანაძე: მინდა გითხრათ, რომ ამ გადაწყვეტილებამ 200%-ით გაამართლა. მაყურებელმა კარგად შეაფასა სპექტაკლი და ამის მომსწრე ვიყავით ყველანი ერთად. გიორგიმ და ოზურგეთის თეატრის მსახიობებმა ყველაფერი გააკეთეს, რომ საუკეთესო ყოფილიყვნენ. მე მათ მადლობას ვუხდი. ძალიან დიდხანს ვიმუშავეთ ამ სპექტაკლზე და ეს ამათ ღირდა, რადგან ვფიქრობ, მაყურებელი კმაყოფილი დარჩა.

მისივე თქმით, მისთვის, როგორც რეჟისორისთვის, დიდი პატივი იყო, რომ გურიის ისტორიულ თემაზე მეორე სპექტაკლი დადგა.

„გურიას იმდენი საინტერესო ისტორია აქვს, იმდენი საინტერესო ადამიანი ცხოვრობდა აქ, იმდენად საინტერესო მხარეა, ამ სამი სპექტაკლით ეს ყველაფერი არ ამოიწურა. როგორც ცნობილია, ახლა ჩვენი მეგობარი, რეჟისორი ლევან კოღუაშვილი გურიაზე იღებს ფილმს და კიდევ  საინტერესო ამბები გველოდება წინ“, _ გვითხრა გოჩა კაპანაძემ.

ორ საათიან სპექტაკლში კარგად არის ასახული ექვთიმე თაყაიშვილის ცხოვრების ის წლები, თუ რის ფასად უხდებოდა საქართველოს განძის პატრონობა და შენახვა საფრანგეთში. მას ხშირად სთავაზობდნენ სარფიან წინადადებას და მდიდრულ ცხოვრებას, მაგრამ ის შეუპოვარი იყო მის გადაწყვეტილებაში. სპექტაკლში ხშირად ამბობს ექვთიმეს როლის შემსრულებელი გიორგი დოლიძე “ქართული განძი არ იყიდება”.

ვინც პრემიერას ვერ დაესწრო და სპექტაკლის ნახვის სურვილი აქვს, მათთვის შემდეგი ჩვენება 24 ოქტომბერს გაიმართება.