დღეს 9 აპრილია. დღე, როდესაც კიდევ ერთხელ დავინახოთ და გვახსოვდეს რუსეთის დაუნდობელი აგრესია. 9 აპრილის ღამეს რუსი სამხედროების მიერ 21 ახალგაზრდა იქნა მოკლული. დღევანდელ დღეს ოზურგეთის მუნიციპალიტეტის სოფელ ლიხაურში დილიდანვე მიდიოდა ხალხი 9 აპრილის ღამეს გმირულად დაღუპული ნინო თოიძის საფლავზე.
დილიდანვე ნინო თოიძის საფლავზე მივიდნენ ადგილობრივი ხელისუფლების წარმომადგენლები. ასევე ის ადამიანები, რომლებიც ყოველ წელს, არ ივიწყებენ ნინო თოიძეს და მის მეგობრებს.
ირმა სალუქვაძე, ნინო თოიძის დისშვილი: ჩემთვის თან საამაყოა ეს დღე და თან ძალიან მძიმეა. როდესაც ნინო მოკლეს რუსებმა მაშინ მეშვიდე კლასში ვიყავი. ძალიან განვიცადეთ. მე ყოველთვის ვამბობ და ახლაც ვიტყვი ამაყი ვარ, რომ გმირი დეიდა მყავდა.
ჩემი აზრით უფრო მეტი გახსენება უნდა იყოს 9 აპრილის გმირების. ყველას აქვს წმ. გიორგის ორდენი მინიჭებული და ჩემი სურვილია ქართულმა ეკლესიამ წმიდანებმა შერაცხოს ისინი.
ქეთევან თოიძე, ნინო თოიძის და: თითქმის დავიწყებულია 9 აპრილი. ნაკლებად მოდიან ადამიანები დღევანდელ დღეს ნინოს საფლავზე. თბილისში ან სხვა ქალაქებში, რა ხდება, არ ვიცი. სხვადასხვა სახის ღონისძიებებით უნდა იყოს ეს დღე დატვირთული. უფრო მეტი ყურადღებაა საჭირო, რომ გმირი ახალგაზრდების სახელი და გვარები, არ დაივიწყოს არცერთმა თაობამ. ერთიანობა გვჭირდება და არა ერთმანეთის გადაკიდება. ხანდახან ვფიქრობ, რომ ამ დღის მნიშვნელობა ხშირად გვავიწყდება. ღმერთმა ქნას გაკეთდეს და აღსრულდეს ის საქმე, რისთვისაც შეეწირა 21 ახალგაზრდა. ნინო ეს პატარა გოგო სამშობლოზე შეყვარებული იყო.”
ქეთევან თოიძის თქმით, 1989 წელს გადმოვიდა სასწავლებლად მოსკოვიდან თბილისში.
ქეთევან თოიძე: 8 აპრილს მითხრა, რომ შენ და შენი შვილები, რომ იყოს კარგად და თავისუფალ საქართველოში იცხოვროთ ამისთვის მივდივარ პარლამენტის შენობასთანო. ასე მითხრა სახლიდან წასვლის დროს: საქართველოს ბედი წყდება დღეს რუსთაველზეო. ღმერთმა ქნას საქართველო ვნახო გამთლიანებული და ბედნიერი სახით ვხვდებოდეთ ერთმანეთს.
9 აპრილის ტრაგედიიდან 34 წელი გავიდა.
ავტორი
