“ოცნების” ხმოსნების არჩეული პრეზიდენტი მიხეილ ყაველაშვილი პატიმრობაში მყოფ პოლიტიკური პარტიების ლიდერებს შეწყალებას სთავაზობს. თუმცა, ამისთვის, მათ წერილობითი თანხმობა უნდა განაცხადონ არჩევნებში მონაწილეობაზე.
მიხეილ ყაველაშვილმა “ღამის კურიერის” ეთერში იმ მიზეზებზე ისაუბრა, რაც გახდა შეწყალების შეთავაზების საფუძველი.
“იქიდან გამომდინარე, რომ, ჩვენდა სამწუხაროდ, ჩემმა წინამორბედმა ეს ინსტიტუტი გამოიყენა დისკრედიტაციისთვის, პოლარიზაციისთვის და დაარღვია კონსტიტუცია, დღიდან ჩემი არჩევისა, ჩემი პირველი განაცხადი იყო, რომ დავაბრუნებდი პრეზიდენტის ინსტიტუტს კონსტიტუციურ ჩარჩოებში. პრინციპში, ამ ეტაპისთვის, ეს გამომივიდა. მთავარი არის სახელმწიფოებრივი მიდგომა სახელმწიფოსთან მიმართებაში, პატივისცემა და როცა სახელმწიფო მეთაური ხარ, მაგალითი უნდა იყო უბრალო მოქალაქის, რომ შენ თავად იქნები გარანტი კონსტიტუციის და არ დაარღვევ ამ კანონს.
იქიდან გამომდინარე, რომ გველოდება თვითმმართველობის არჩევნები და პოლიტიკურ პარტიებს, რომლებსაც განსაზღვრული აქვთ, რომ სრულყოფილად მიიღონ მონაწილეობა არჩევნებში, ყველა პასუხისმგებლობის მქონე ინსტიტუციების მოვალეობაა, რომ შევქმნათ შესაბამისი გარემო იმისთვის, რომ ჩატარდეს სრულყოფილი არჩევნები. იმ ძალების პოლიტიკური ლიდერები, რომლებზეც საზოგადოებამ იცის, რომ აპირებენ მიიღონ მონაწილეობა არჩევნებში, ამ ეტაპისთვის, სამართლიანად არიან გისოსებს მიღმა _ მათ დაარღვიეს კანონი და მოუწიათ პატიმრობა, მაგრამ მე ვიყენებ ჩემს კონსტიტუციურ უფლებას _ ვთავაზობ მათ, რომ გამოიყენონ ეს შესაძლებლობა და თავიანთ ამომრჩეველს, საზოგადოებას დაუმტკიცონ, რომ ისინი ღირსნი არიან, გაიმარჯვონ არჩევნებში და არ ჰქონდეთ შეფერხება საარჩევნო პროცესში“, _ განაცხადა მიხეილ ყაველაშვილმა.
ყაველაშვილის შეთავაზებას გამოეხმაურა საქართველოს მეხუთე პრეზიდენტი სალომე ზურაბიშვილი:
“ერთმა თქვა, მაღიარეთო თუ არა … რას გიზამთო, და კიდევ თქვა, მაღიარეთო და თან ყველაფერი, რაც გაგაჩნიათ _ ღირსება, რეპუტაცია და სინდისი _ მე ჩამაბარეთო და გაგათავისუფლებთ… მონობისათვის!
ეს იგივე ლოგიკაა, რაც პუტინის ლოგიკა ზელენსკისთან მიმართებაში, ჩამბარდითო და თან ყირიმს წაგართმევთ სამუდამოდ, თან დონეცკსა და ლუჰანსკს, და ამის გარდა იცოდეთ, არც შემიცვლია ჩემი პირველადი სამხედრო მიზანი: თქვენი განადგურებაო!
ცოტა რუსული “კგბ–შნიკური” სცენარებიდან რომ გამოხვიდეთ და თქვენით იფიქროთ, და ქართული ხასიათიც გაითვალისწინოთ, ურიგო არ იქნება და შეიძლება, რამე მაინც უკეთ გამოგივიდეთ!
მაგრამ ამას თავისუფალი ფიქრისა და აზროვნების უნარი სჭირდება“, _ წერს სალომე ზურაბიშვილი “ფეისბუქზე”.
“ლელო – ძლიერი საქართველოს” გენერალური მდივანი ირაკლი კუპრაძე ყაველაშვილის განცხადებას ასე გამოეხმაურა:
“გამეორება ცოდნის დედაა! არანაირი შეწყალების მიმართვა არალეგიტიმური პრეზიდენტისთვის არ იქნება. ჩვენ მას მივუთითებთ გზას რუსული ხომალდის მიმართულებით!”
“გამორიცხულია, რომ ზურაბ ჯაფარიძემ, ნიკა მელიამ და ნიკა გვარამიამ მიხეილ ყაველაშვილს რაიმე ფორმით შეწყალების თხოვნით მიმართონ. მით უფრო გამორიცხულია, რომ ჩვენმა კოალიციამ არჩევნებში მიიღოს მონაწილეობა. ყაველაშვილის პირობაა: – წერილი დამიწერეთ, მომეცით პირობა, რომ არჩევნებში მიიღებთ მონაწილეობას, მთხოვეთ და შეგიწყალებთ. ეს გამორიცხულია! ეს სამი ლიდერი ყაველაშვილს შეწყალების თხოვნით ორი მიზეზის გამო არ მიმართავს: მათ არანაირი დანაშაული არ ჩაუდენიათ და შესაწყალებელი არაფერი სჭირთ. მეორე _ მიხეილ ყაველაშვილი ის ადამიანი არ არის, ვისაც შეწყალების უფლება აქვს. ყაველაშვილი არის ამ ქვეყნის არალეგიტიმური პრეზიდენტი.
მათ გაკეთებული აქვთ გააზრებული არჩევანი. ციხეში ყოფნა არავის მოსწონს და არავინ თვლის, რომ კარგია, მაგრამ როცა არჩევანს არ გიტოვებენ, როცა არჩევანი არის სირცხვილს, ნათქვამი სიტყვის გადათქმასა და ციხეში წასვლას შორის, სწორი არჩევანია ციხეში წასვლა! ეს “ქართულ ოცნებასა” და ბიძინა ივანიშვილს არ ესმით. რამდენიმე წლის წინ ივანიშვილმა თქვა, თავით კედელს რატომ ასკდებითო. მას ვერ წარმოუდგენია, რატომ შეიძლება ადამიანები ციხეში პრინციპების გამო წავიდნენ.
“ქართული ოცნების” უმრავლესობას და ბიძინა ივანიშვილს ვერ წარმოუდგენიათ, როგორ შეიძლება ციხეში პრინციპების გამო წახვიდე, როცა შეიძლება იყო გარეთ, გქონდეს იახტა, საცურაო აუზი და იცხოვრო ბედნიერად. ახლა ისეთი მდგომარეობაა, როცა შეიძლება არც ერთი დარჩეთ, არც მეორე, არც მესამე და ციხეშიც მოუწიოთ ყოფნა, ოღონდ ამაში ჩვენ არ შევუწყობთ ხელს – ამას თვითონ ბიძინა ივანიშვილი გააკეთებს“, _ განაცხადა “კოალიცია ცვლილებისთვის” წევრმა ლევან ყურაშვილმა “პალიტრა ნიუსის” გადაცემა, “დღის ნიუსრუმში”.
საკითხს გამოეხმაურა “ნაციონალური მოძრაობის” ერთ-ერთი ლიდერი ლევან სანიკიძე:
“ის, რომ ხელისუფლება ეძებს ლეგიტიმაციას და ის, რომ ყაველაშვილი ოცნებობს ოღონდ რომელიმე ოპოზიციონერმა მის სახელსა და გვარზე, ბლანკზე დაიტანოს შეწყალების თხოვნა და აღიაროს ის პრეზიდენტად, კიდევ ერთხელ მიუთითებს რა არის ივანიშვილის ხელისუფლების მთავარი მიზანი. არ მგონია, რომ ამ სამარცხვინო კაპიტულანტური შეთავაზებით, რომელიმე ოპოზიციონერი მოთაფლოს. თუმცა, კარგად ჩანს “ქართული ოცნების” მძიმე ვითარება“, _ განაცხადა ლევან სანიკიძემ.
ყაველაშვილის შეთავაზებას გადაცემა 360 გრადუსში გამოეხმაურა პარტია “ფედერალისტების” თავმჯდომარე გიგა ბოკერია.
ბოკერიას თქმით, ხვალ რომ მართლაც გაათავისუფლონ დაკავებული პოლიტიკოსები, ამით შეცდომაში არავინ უნდა შევიდეს, რადგან, მისი განმარტებით, ეს ხალხის დაბნევის მცდელობა იქნება:
“ეს, ისევე როგორც ყველა ნაბიჯი ამ რეჟიმის, არის არა მხოლოდ რომელიღაც პოლიტიკოსების და, ამ შემთხვევაში, პოლიტპატიმრების, არამედ მთელი საზოგადოების მიმართ უტიფარი, ცინიკური დამოკიდებულება იმ რეჟიმის, რომელიც შიგნით კრიზისშია, წნეხის ქვეშ არის ჩვეულ მეთოდს მიმართავენ _ საზოგადოების დეზორიენტაციისა და დემორალიზაციის მცდელობას.
როცა ასეთ რეჟიმთან გვაქვს საქმე, როგორიც ივანიშვილის რეჟიმია, სადაც ყველაფერი შეიძლება თქვა, ურთიერთგამომრიცხავი რაღაცები, რთულია ხოლმე, თან როცა იმ კაცის (ბიძინა ივანიშვილის) ინსტიქტებიდან გამომდინარე მოქმედებენ. ერთადერთი, რაც შემიძლია, ვთქვა, ეს განცხადება არაფერს არ ცვლის. მეტსაც გეტყვით, ყველა პოლიტპატიმრის ციხეში ჯდომა არის პრობლემა ზოგადად ქვეყნისთვის და ნებისმიერი მათგანის გათავისუფლება არის სრულიად ლეგიტიმური მოთხოვნა, მაგრამ ესეც კი ვერ შეცვლიდა ვერაფერს. აი, ხვალ რომ რაღაც ასეთი გააკეთოს, რათა კიდევ უფრო დააბნიოს ხალხი, ამითაც არავინ არ უნდა შევიდეს შეცდომაში.
არსებითად ეს კაცი, მისი გარემოცვა შეუთავსებელია საქართველოს ეროვნული ინტერესებთან, ჩვენს დამოუკიდებლობასთან, ჩვენს სიმშვიდესთან, უსაფრთხოებასთან, ქვეყნის ამ ჩიხიდან გამოსვლასთან – ეს არის ის, რის გარშემოც საზოგადოების მნიშვნელოვანი ნაწილი არის გაერთიანებული“, _ განაცხადა ბოკერიამ.
“გაოგნებული ვარ _ რა უნდათ ვერ ვხვდები. მგონი, თვითონ მათ მხარდამჭერებშიც არის დაბნეულობა. რაც არ უნდა ქნას, ხაზარაძისგან გმირი არ გამოვა“, _ განუცხადა ჟურნალისტებს დიასპორისა და კავკასიის საკითხთა საპარლამენტო კომიტეტის თავმჯდომარე ირაკლი ზარქუამ.
“ერთის მხრივ არ აღიარებენ (არჩევნების) ლეგიტიმაციას, შემდეგ გარბიან ცესკო–ში და ნომერი რომ შეინარჩუნონ, განცხადებებს წერენ. არ აღიარებენ პრეზიდენტ ყაველაშვილის შეთავაზებას და ამ დროს ადგილობრივ არჩევნებში იღებენ მონაწილეობას. გაოგნებული ვარ. რა უნდათ ვერ ვხვდები. მგონი თვითონ მათ მხარდამჭერებშიც არის დაბნეულობა. რაც არ უნდა ქნას, ხაზარაძისგან გმირი არ გამოვა. არც იმ დანარჩენებისგან გამოვლენ გმირები. ძალით თუ უნდათ, რომ გმირის მანტია მოისხან, რომ ციხეში გამოიკეტონ რამდენიმე თვით, ეს მათი არჩევანი იყო“, _ აღნიშნა ზარქუამ.
თქვენი აზრით, უნდა დათანხმდეს თუ არა ყაველაშვილის შეთავაზებას შეწყალების შესახებ მსჯავრდებული პოლიტიკოსები? ამ კითხვით, ჩოხატაურის მუნიციპალიტეტის საკრებულოს წევრს, კოალიცია “ცვლილებებისთვის” წარმომადგენელ ბაჩო ახალაძეს მივმართეთ.
“ყაველაშვილის “შეწყალების” ინიციატივა არაფერია, თუ არა მორიგი ცინიზმი იმ ხელისუფლებისგან, რომელიც თავად არის ამ პოლიტიკური დევნის არქიტექტორი.
პოლიტპატიმრებისთვის შეწყალებაზე საუბარი მაშინ, როცა მათი მსჯავრი პოლიტიკური შურისძიების შედეგია, ნიშნავს, რომ სისტემამ ჯერ გაგასამართლა უსამართლოდ და ახლა შენდობას გთხოვს იმ დანაშაულისთვის, რომელიც თავად ჩაიდინა.
არავის სჭირდება ყალბი დიდსულოვნება დამნაშავე რეჟიმისგან – სჭირდებათ სამართლიანობა, აღიარება, რომ ეს ადამიანები იყვნენ მსხვერპლნი და არა დამნაშავეები.
შეწყალებაზე საუბარი მხოლოდ იმას ამტკიცებს, რომ ხელისუფლება ცდილობს გაექცეს საერთაშორისო ზეწოლას და შიდა პროტესტს…
მაგრამ აქ მთავარია ისიც, რომ ამ შემოთავაზების უკან დგას ცალსახა პოლიტიკური ანგარიში – სურთ, რომ მსჯავრდებული პოლიტიკოსები “შეწყალების” სანაცვლოდ გავიდნენ ადგილობრივ თვითმმართველობის არჩევნებში, რათა შექმნან ვითომ მრავალფეროვანი პოლიტიკური ველი და მოახდინონ საკუთარი არალეგიტიმური მმართველობის ლეგიტიმაცია.
ანუ ჯერ ჩაგსვამენ, მერე “შეგიწყალებენ“, მერე კი შენით შეინარჩუნებენ და მოიპოვებენ ძალაუფლებას“, _ ამბობს ბაჩო ახალაძე.
ამავე კითხვაზე “ლელო – ძლიერი საქართველოს” ჩოხატაურელი ლიდერი მალხაზ ჩხიკვაძე გვპასუხობს:
“ამ კითხვაზე მკაფიო და მოკლე პასუხია უკვე გაცემული ჩვენი პარტიის ლიდერების მიერ და ყაველაშვილს მიუთითეს თუ საით უნდა იმოძრაოს. არ ველოდები რომ ვინმემ ისარგებლოს მაგ შეთავაზებით. არც ერთ პოლიტპატიმარს არაფერი აქვს შესაწყალებელი. ისინი უდანაშაულოები არიან!”
ინფორმაციისთვის, “კოალიცია ცვლილებისთვის” ერთ-ერთ ლიდერს ნიკა მელიას დროებით საგამოძიებო კომისიაზე გამოუცხადებლობის საქმეზე 8 თვით თავისუფლების აღკვეთა აქვს მისჯილი, ამასთან, 2 წლის ვადით თანამდებობის დაკავება აეკრძალა.
მსგავსი სასჯელი აქვს მისჯილი “კოალიცია ცვლილებისთვის” ერთ-ერთი ლიდერს, ნიკა გვარამიასაც _ ის სასამართლომ პარლამენტის დროებითი საგამოძიებო კომისიის მოთხოვნის შეუსრულებლობის ფაქტზე დამნაშავედ ცნო და 8 თვით თავისუფლების აღკვეთა მიესაჯა, ასევე, 2 წლის ვადით თანამდებობის დაკავებაც აეკრძალა.
პარლამენტის დროებითი საგამოძიებო კომისიის მოთხოვნის შეუსრულებლობის ფაქტზე “კოალიცია ცვლილებისთვის” ერთ-ერთ ლიდერს, ზურაბ გირჩი ჯაფარიძეს სასამართლომ შვიდი თვით თავისუფლების აღკვეთა მიუსაჯა. ასევე, მას აეკრძალა ორი წლით თანამდებობის დაკავება.
