სოფლის მხარდაჭერის პროგრამის ბიუჯეტიდან, რომელიც რეგიონებში გასახორციელებელი პროექტების ფონდიდან ფინანსდება, ლანჩხუთის მუნიციპალიტეტისთვის განკუთვნილი თანხა, წინა წლების მსგავსად, წელსაც748 ათასი ლარითაა განსაზღვრული. კანონმდებლობით, თვითმმართველობებს უფლება აქვთ პროგრამის ხარჯი საკუთარი შემოსავლებით ან მოზიდული სახსრებით გაზარდონ. მოცემულ შემთხვევაში, მოზიდული თანხებით ვერ, თუმცა ადგილობრივი ბიუჯეტის ხარჯზე, 330 ათასი ლარით გაზრდილია წელს ლანჩხუთში პროგრამის ხარჯი.
ვინაიდან, პროგრამა მოქალაქეთა თანამონაწილეობის მექანიზმებს მოიაზრებს, სოფლის საერთო კრებაზე, კენჭისყრით უნდა გადაწყდეს თუ რისი გაკეთებაა სოფელში პრიორიტეტი. პროგრამის ფარგლებში, მოსახლეობასთან შეხვედრები და კრებები ლანჩხუთის სოფლებში თებერვალში გაიმართა და ის პრიორიტეტებიც გამოიკვეთა, რომელთა გახორციელებასაც უნდა მოხმარდეს ზემოთ ნახსენები თანხები.
ირკვევა, რომ კრებაზე მიღებული გადაწყვეტილებით, ზემო შუხუთში 12 000 ლარი სასაფლაოს შემოღობვა- კეთილმოწყობას და სასმელი წყლის სისტემების რეაბილიტაციას მოხმარდება. ქვემო შუხუთში კი გზა, გზის შემადგენელი ინფრასტრუქტურის მოწყობასა და სკოლის მიმდებარე ტერიტორიის კეთილმოწყობას სოფლის პროგრამის თანხიდან 20 ათასი ლარი გაიხარჯება, ხოლო დამატებით 20 ლარს თანადაფინასებისთვის ადგილობრივი ბიუჯეტი გაიღებს.
რაც შეეხება ჩოჩხათის ადმინისტრაციულ ერთეულს, აქ ჯამში 74 ათასი ლარია გასახარჯი სოფლის პროგრამის თანხიდან. სოფლებში: ჯიხანჯირში, გულიანში, შრომისუბანში, მოედანსა და ხორეთში ირკვევა, რომ არჩევანი რკინა-ბეტონის გზის მოწყობაზე გაკეთდა, რასაც სოფლის პროგრამის თანხიდან 12-12 ათასი ლარი მოხმარდება, 12-12 ათას ლარს კი თანადაფინანსებისთვის ადგილობრივი ბიუჯეტი გაიღებს. სოფელ ჩოჩხათშიც რკინა-ბეტონის გზის მოწყობაზე შეჩერდა არჩევანი, რისთვისაც ადგილობრივი ბიუჯეტის თანამონაწილეობით ჯამურად 32 ათასი ლარის ღირებულების სამუშაოები უნდა შესრულდეს. ჩოჩხათის კიდევ ერთ სოფლის _ კოკათის წილმა კი, სოფლის პროგრამის თანხებიდან 10 ათასი ლარი შეადგინა და ის სასმელი წყლის მოწესრიგებას მოხმარდება.
აკეთის ადმინისტრაციულ ერთეულში შემავალ სოფლებში გაგურში, ჭანჭათში, ზემო აკეთსა და ქვემო აკეთში, ჯამში, სოფლის პროგრამის თანხიდან 54 ათასი ლარი გახარჯვაა გათვალისწინებული, ხოლო ადგილობრივი ბიუჯეტის თანადაფინანსების წილი 32 ათასი ლარია. კერძოდ, გაგურში 10 000 ლარი ფანჩატურის მოწყობას მოხმარდება. ჭანჭათში პროგრამიდან 16 ათასი ლარი ბეტონის გზის საფარის მოწყობისთვისაა გამიზნული, რისთვისაც იგივე თანხას ადგილობრივი ბიუჯეტიც გაიღებს. 12 ათასი ლარი, ზემო აკეთში, ფანჩატურის მოსაწყობადაა გამიზნული. ქვემო აკეთში გარე განათებისა და ბეტონის გზის საფარის მოწყობისთვის 16-16 ათას ლარი სოფლის პროგრამის თანხებიდან და ადგილობრივი ბიუჯეტიდან დაიხარჯება.
აცანის ადმინისტრაციულ ერთეულს მთლიანობაში 28 ათასი ლარი ერგო. აქედან, 16 ათასი ლარით სოფელ აცანაში, სასმელი წყლის სათავის მოწყობისა და სპორტული მოედნის ინფრასტრუქტურისთვის დაიხარჯება. ხოლო დარჩენილი 12 ათასი ლარი სოფელ ტელმანში გარე განათების მოწყობა გადაწყდა.
მამათის ადმინისტრაციულ ერთეულს სოფლის პროგრამის თანხიდან 44 ათასი ლარი ერგო, ხოლო 34 ათას ლარს ადგილობრივი ბიუჯეტიდან თანადაფინანსებისთვის, ადმინისტრაციული ერთეულის ოთხივე სოფელში რკინა-ბეტონის გზების, სანიაღვრე არხების, ცხაურებისა და გარე განათების მოწყობისთვისაა განკუთვნილი. ასევე სოფელ შათირში სასაფლაოს შესაღობად.
მაჩხვარეთში, წინა წლების მსგავსად, ჯამში 36 ათასი ლარის სამუშაოები შესრულდება. ჯუნმერეში, ფაცურიების უბანში, გზის მოსაწყობად და ეკლესიასთან სკვერის კეთილმოწყობისთვის 10 ათასი ლარია განკუთვნილი. სოფელ მაჩხვარეთში 16 ათასი ლარი სპორტული ინფრასტრუქტურისთვის, სასაფლაოს შეღობვითი სამუშაოებისა და საკვირაო სკოლის მიმდებარედ სკვერის მოწყობისთვის დაიხარჯება. სოფელ ორაგვეში კი 10 ათასი ლარი სასაფლაოს შემოღობვას მოხმარდება.
სოფლის პროგრამიდან, მიმდინარე წელს გვიმბალაურის ადმინისტრაციაში 28 ათასი ლარის სამუშაოები შესრულდება. ჯუნეწერში 12 ათას ლარად სპორტული ინვენტარის, განათებისა და სარეკრეაციო სივრცის მოწყობა გადაწყდა. ჯუნეწერში სპორტული ინფრასტრუქტურის გასამართად 12 ათასი ლარია განკუთვნილი. სოფელ გვიმბალაურში, მოსაცდელის მოწყობისა და სასაფლაოს შეღობვა-კეთილმოწყობისთვის _16 ათასი ლარი.
ჩიბათის ადმინისტრაციაში პრიორიტეტად ცხრა ობიექტი შეირჩა, რისთვისაც პროგრამით 40 ათასი ლარი დაიხარჯება, 40 ათას ლარს კი თანადაფინანსებისთვის ადგილობრივი ბიუჯეტი გაიღებს. ზემო ჩიბათში დაფნარის უბანში გზის დაგება, სასაფლაოსკენ მიმავალი გზის რემონტი და წყლის მილების რემონტი ჩაითვალა პრიორიტეტად. ქვემო ჩიბათში, სოფლის კრებაზე მიღებული გადაწყვეტილებით, თანხები სულაბერიძეების უბანში რკინა-ბეტონის გზის დაგებას, ჭაჭახუნას უბანში ასფალტის საფარის დაგებასა და გურული მხედრების პარკის კეთილმოწყობას მოხმარდება. სოფელ ჭალაში კი, წყლის 600 მეტრი მილის შეძენა, საქონლის გადასადენის მოხრეშვა და სოფლის ზედა უბანში რკინა-ბეტონის გზის დაგება დასახელდა პრიორიტეტად.
ლესის ადმინისტრაციაში სულ 44 ათასი ლარი დაიხარჯება, აქედან 12 ათასი ადგილობრივი ბიუჯეტიდან. აქედან 20 ათასი ლარით ლესაში გარე განათების მოწყობა და სპორტულ მოედანზე გასახდელის მოწყობა გადაწყდა, ხოლო დარჩენილი 12 ათასი ლარით _ ჭინათში რკინა-ბეტონის გზისა და გარე განათების მოწყობა.
ჯურუყვეთის ადმინისტრაციაში სოფლის პროგრამით 40 ათასი ლარით ფინანსდება. კერძოდ, სოფელ ბაღლეფში გარე განათების მოსაწყობად 12 ათასი ლარია განკუთვნილი. ასევე 12 ათასი ლარია განკუთვნილი ეწერში სკვერის შეღობვა-დასუფთავებისთვის. 16 ათასი ლარით დაიგეგმა ჯურუყვეთში, ნაცარას უბანში გარე განათების მოწყობა, ხოლო გოგუების უბანში გზის მოხრეშვა.
ნინოშვილის ადმინისტრაციაში თანხები ასე გადანაწილდა _ სოფელ ყელაში, ანთიების უბანში რკინა -ბეტონის მოსაწყობად 24 ათასი ლარის ღირებულების სამუშაოები უნდა შესრულდეს, აქედან, ადგილობრივი ბიუჯეტის თანამონაწილეობის წილი 12 ათასი ლარია. ხოლო სოფელ ნინოშვილში იგივე რაოდენობის თანხით იგივე სამუშაოების შესრულებაა გათვალისწინებული ანჯიეთის უბანში.
ნიგვზიანის ადმინისტრაციულ ერთეულში შემავალ სოფლებში კი სოფლის პროგრამიდან გასახორციელებელი სამუშაოები 62 ათასი ლარით დაფინანსდება, ხოლო 20 ათასი ლარის გაღება ადგილობრივ ბიუჯეტს მართებს. 10 ათას ლარად ჩანჩეთში პრიორიტეტად სკვერის მოწყობა და წყალმომარაგების სისტემის გაუმჯობესებისთვის მილების შეძენა ჩაითვალა. სოფელ ნიგვზიანში ჯამში 30 ათასი ლარით გადაწყდა, რომ ბეტონის გზა მოეწყოს, რიგ ადგილებში გარე განათება დამონტაჟდეს და ადმინისტრაციულ შენობაში სამუშაო ოთახი გარემონტდეს. 20 ათასი ლარი, რომელიც სოფლის პროგრამიდან სოფელ ხაჯალიას ერგო, გზის მოხრეშვას, გარე განათების დამონტაჟებას, სასაფლაოს შეღობვასა და არხის მოწყობას მოხმარდება. დანარჩენი თანხა კი სოფელ არჩეულში ბეტონის გზისა და გარე განათების მოსაწყობადაა გათვალისწინებული.
რაც შეეხება სუფსის ადმინისტრაციას, ის სოფლის პროგრამიდან 92 ათასი ლარით დაფინანსდა, ხოლო ადგილობრივი ბიუჯეტი 16 ათას ლარს გაიღებს. ახალსოფელში 16 ათასი გარე განათების მოწყობისა და წყლის სისტემის რეაბილიტაციისთვის დაიხარჯება. იმავე ოდენობის თანხით, ტაბანათში წყლის სისტემის რეაბილიტაცია, შიდა გზების მოხრეშვა და გარე განათების მოწყობა დასახელდა პრიორიტეტად. ჩქუნში 10 ათას ლარად წყლის სისტემის მოწყობა და სანიაღვრე არხი გასუფთავებაა პრიორიტეტთა ნუსხაში. სუფსაში 12 ათასი ლარი წყლის სისტემის რეაბილიტაციისა და რკინა-ბეტონის გზის მოსაწყობადაა გამიზნული. ხიდმაღალაში გარე განათებისა და სანიაღვრე არხების მოწყობა ჩაითვალა პრიორიტეტად და საამისოდ , ადგილობრივი ბიუჯეტის ჩართულობით, ჯამში 32 ათასი ლარია გამიზნული. გრიგოლეთში სანიაღვრე არხის გაწმენდისა და სარეკრეაციო სივრცის მოწყობისთვის _ 12 ათასი ლარი. 10 ათასი ლარი მოხმარდება მალთაყვაში გარე განათების და სპორტული სივრცის მოწყობას.
ღრმაღელის ადმინისტრაციულ ერთეულში, სოფლის პროგრამით, 64 ათასი ლარი გაიხარჯება, ხოლო ადგილობრივი ბიუჯეტის წილი _ 48 ათასი ლარი. კერძოდ, წყალწმინდაში რკინა-ბეტონის გზისა და გარე განათების მოწყობისთვის ჯამში 40 ათასი ლარის ღირებულების სამუშაოები შესრულდება, ღრმაღელეში სასაფლაოსა და ფეხბურთის მოედნის შეღობვისთვის 16 ათასი ლარია გათვალისწინებული, ომფარეთში კი, სოფლის კრებაზე მიღებული გადაწყვეტილებით, რკინა-ბეტონის გზისა და სანიაღვრე არხის მოწყობა ჩაითვალა პრიორიტეტად, რისთვისაც სულ 32 ათასი ლარია გათვალისწინებული. ორმეთში რკინა-ბეტონის გზის და გარე განათების მოსაწყობად 24 ათასი ლარის ღირებულების სამუშაოები შესრულდეს უნდა.
ნიგოითის ადმინისტრაციაში სოფლის პროგრამით 86 ათასი ლარია გამოყოფილი, რვა ათას ლარს კი ადგილობრივი ბიუჯეტი გაიღებს. გადაწყდა, რომ სოფელ ნიგოითისთვის განკუთვნილ16 ათასი ლარი სოფლის ცენტრში სკვერის მოწყობის სამუშაოების გაგრძელებას მოხმარდეს.
საგულისხმოა, რომ ამ სკვერის მოწყობა გასულ წელს დაიწყო სოფლის პროგრამის თანხით, რაზეც სოფლის მოსახლეობის გარკვეული ნაწილი უკმაყოფილებას გამოთქვამდა.
“სამწუხაროდ, ყველაფერი წინასწარაა გადაწყვეტილი. წინასწარ იციან რა გადაწყვეტილება უნდა მიიღონ და ვინ უნდა მიიპატიჟონ კრებაზე, რომ მხარდაჭერა მიიღონ. პრიორიტეტი რეალურად სხვაა ჩვენს სოფელში, ვიდრე ამ სკვერის მოწყობა. თან, იმდენად უთავოდ მუშაობენ, რომ ერთიდაიგივე საქმის გაკეთება ორჯერ მოუწიათ. შემოღობეს და მერე გაახსენდათ, რომ… ღობეს ფუნდამენტი ჭირდება!
სამწუხაროდ, ყოველი შეკრება ცირკს ჰგავს, კარგად დადგმულ ცირკს“, _ ამბობდნენ “გურია ნიუსთან” საუბარში ფაქტით უკმაყოფილო ნიგოითის მცხოვრებლები.
რაც შეეხება სოფელ ჯაპანას, აქ 12 ათასი ლარით გზის მოხრეშვა და სტადიონის რეაბილიტაციაა გადაწყვეტილი. ჯიხეთში კი სარეკრეაციო სივრცის შესაღობად 10 ათასი ლარია გამოყოფილი. სოფელ ჩოლობარგში სტადიონის მოწყობის სამუშაოების დაწყება იგეგმება და საამისოდ სოფლის პროგრამიდან 16 ათასი ლარი გაიხარჯება. იგივე თანხა მოხმარდება სოფელ ჭყონაგორაში საძოვართან მისასვლელ გზაზე ორი მილხიდის მოწყობას, ღია სანიაღვრე არხის ამოწმენდას, გზის მოხრეშვასა და სოფლის სტადიონთან სკვერის მოსაწყობად.
სოფელ ქვიანში სოფლის პროგრამით გათვალისწინებული სამუშაოებისთვის სულ 24 ათასი ლარის ღირებულების სამუშაოები უნდა შესრულდეს, აქედან 8 ათასი ლარი ადგილობრივი ბიუჯეტის წილია.
ავტორი
