საგანგებო სიტუაციების მართვის სამსახურის ყოფილი უფროსი თემურ გიორგაძე აცხადებს, რომ დასავლეთ საქართველოში უხვი ნალექი მოსალოდნელი იყო და ამ შემთხვევაში, თოვლის მოსვლის პირველივე დღიდან ტექნიკის გამოყვანა და გზების გაწმენდა პრევენციული იქნებოდა.
BMG tv -ის გადაცემა „ანალიტიკაში“ თემურ გიორგაძე აღნიშნავს, რომ 2-მეტრიანი თოვლის მოსვლა სტიქიად ითვლება და ამ პირობებში პირველივე ნალექიდან გზების გაწმენდითი სამუშაოები საგანგებო სიტუაციებსა და ჯარს თითოეულ მოსახლემდე მისვლის შესაძლებლობას მისცემდა.
„საგანგებო სიტუაციების სამსახურიდან შეტყობინებები რამდენიმე დღით ადრე მოგვივიდა. სტიქიას ვერავინ დაამარცხებს, აქ მთავარი იყო გზის გაწმენდა. ერთადერთი პირველი პრევენცია ეს არის ტექნიკის გამოყვანა და გზების გაწმენდა. ამის შემდეგ მოხდებოდა ცოცხალი ძალის შესვლა ყველა სოფელში, თორემ რამხელა თოვლი მოვიდოდა – ამას წინ ვერავინ დაუდგებოდა. აქ პირველ რიგში გზები იყო მისახედი, რომ გაეწმინდათ“, – აღნიშნა თემურ გიორგაძემ.
კითხვაზე – ვისი პასუხისმგებლობა იკვეთება ამ პროცესში, საგანრეგო სიტუაციების მართვის სამსახურის ყოფილი ხელმძღვანელი პასუხობს პასუხობს, რომ უპირველეს ყოვლისა სახელმწიფოსი და მიიჩნევს, რომ რეაგირება დაგვიანდა.
„მოსახლეობა გზას ვერ გაწმენდს. ეს თავად ადგილობრივ მუნიციპალიტეტებს უნდა ეზრუნათ პრევენციაზე, მერე მთელი მთავრობა, როგორც ახლაა ჩართული, პირველივე წუთიდან უნდა ჩართულიყო, შტაბი უნდა შექმნილიყო და ამ შტაბს უნდა ემართა პროცესი. პირველივე წუთიდან უნდა ჩართულიყვნენ კერძო კომპანიები.
ჩემს დროს გვქონდა სიები, სადაც აღრიცხული იყო კერძო კომპანიებს ვის, რა ტექნიკა ჰქონდა, როცა გვჭირდებოდა ვურეკავდით და არანაირი პრობლემა არ იყო, გვერდზე გვიდგებოდნენ. ახლაც დარწმუნებული ვარ პრობლემა არ იქნება, უბრალოდ ეს ყველაფერი წამებსა და წუთებზეა დამოკიდებული. სტიქია წამებიდან იწყება და წუთებით მთავრდება. ამ დროს როდესაც რეაგირება სწორად ხდება, ყველა პროცესი მარტივად მიდის. ყურადღება რომ გაემახვილებინათ გზებზე, მერე ყველა ადამიანთან მისვლა შესაძლებელი იქნებოდა. ახლა ჯარიც ჩაერთო, მარტო საგანგებო სიტუაციების მართვის სამსახური ამხელა სტიქიას ვერ მოერევა, მაგრამ ეს რაც შეიძლება ადრე უნდა მომხდარიყო.
კარგია რომ მოხალისეები და სახელმწიფო უწყებები კოორდინაციაში არიან, რადგან მოხალისეების მარტო მუშაობა მთლად სახარბიელო არ არის”, – აღნიშნავს თემურ გიორგაძე.
წყარო: bm.ge
