“ყველა ერთისთვის!” _ გიორგი გიორგანაშვილის მხარდამჭერი აქცია პარლამენტთან

ამ წუთებში, თბილისში, საქართველოს პარლამენტის შენობასთან მსახიობ გიორგი გიორგანაშვილის მხარდამჭერებისა და მეგობრების ინიციატივით იმართება აქცია – ყველა ერთისთვის!

აქ შეკრებილი ადამიანები მოითხოვენ, რომ:

1.         გიორგი გორგანაშვილი დაუყოვნებლივ გათავისუფლდეს საპატიმრო დაწესებულებიდან;

2.         გათავისუფლდეს თეთრი ხმაურის მოძრაობის აქტივისტი ბექა წიქარიშვილი;

3.         კანონის სრული სიმკაცრით დაისაჯონ საქმეში მონაწილე პოლიციელები;

4.         უმოკლეს ვადებში შეიცვალოს რეპრესიული და არაჰუმანური ნარკოპოლიტკა.

5.         მოვუწოდებთ საქართველოს პრეზიდენტს, გამოიჩინოს კეთილი ნება, გამოიყენოს საკუთარი უფლება-მოსილება და დაგვიბრუნოს გიორგი გიორგანაშვილი.

 როგორც გიორგანაშვილის ადვოკატმა გიორგი მახარაძემ განაცხადა, იმ შემთხვევაში, თუ მათი მოთხოვნები არ დაკმაყოფილდება, აქციების რაოდენობა გაიზრდება.

„საზოგადოება აღარ შეეგუება საბჭოურ სტანდარტებს 21-ე საუკუნეში. საბოლოოდ უნდა დასრულდეს ჩადებების პრაქტიკა. ჩვენ კიდევ ერთხელ დავანახებთ მათ, რომ საზოგადოება გაიზარდა და იმ შემთხვევაში, თუ ჩვენი მოთხოვნები არ შესრულდება, აქციების რაოდენობა გაიზრდება“, _ განაცხადა მახარაძემ.

 “ბახალას” მხარდასაჭერ აქციაზე ნარკოპოლიტიკის გასაპროტესტებლად უფლებადამცველი ბაია პატარაიაც მივიდა.  როგორც ის “გურია ნიუსთან” საუბრისას აღნიშნავს, ნარკოპოლიტიკაში ცვლილებებია საჭირო და შინაგან საქმეთა სამინისტროს რეფორმაზე საუბარი ზედმეტია, თუ პოლიცია არ მოიშლის ჩადებების პრაქტიკას.

“ერთ-ერთი პრობლემა არის ის, რომ ნარკომომხმარებელს ციხეში ვერ დაეხმარებიან. პოლიტიკაში არის ძალიან დიდი ხარვეზები და მეორე პრობლემა ამ საქმეში არის ჩადების პრობლემა. პოლიციას, სამწუხაროდ, ეს ჩვევად აქვთ. ჩვენ ვერ ვილაპარაკებთ შინაგან საქმეთა სამინისტროს რეფორმაზე, თუ არ შეიცვალა პოლიტიკა და უარი არ თქვა ჩადებაზე, რისთვისაც უნდა გამოიჩონოს პოლიტიკური ნება, რომელიც, სამწუხაროდ, არ აქვს”, _ განაცხადა პატარაიამ.

შეგახსენებთ, რომ  2018 წლის 23 იანვარს თბილისის საქალაქო სასამართლომ მსახიობ გიორგი გიორგანაშვილს 8 წლით თავისუფლების აღკვეთა მიუსაჯა და იგი სასამართლოს სხდომის დარბაზშივე დააკავეს.

პროკურატურა გიორგი გიორგანაშვილს პირადი მოხმარების მიზნით 0.37 გრამი იმ ნარკოტიკული ნივთიერების ფლობას ედავებოდა, რომელიც მისი მტკიცებით,  მას არ ეკუთვნოდა.

საქალაქო სასამართლოსთან, ასევე დააკავეს რეჟისორი თორნიკე ბზიავა და თეთრი ხმაურის მოძრაობის აქტივისტი ბექა წიქარიშვილი, რომლებმაც უსამართლო გადაწყვეტილება გააპროტესტეს.