„რესპუბლიკური პარტიის“ წარმომადგენელი ლევან ბერძენიშვილი აცხადებს, რომ საპრეზიდენტო არჩევნების მეორე ტურში „რესპუბლიკელები“ მხარს გრიგოლ ვაშაძეს უჭერენ. ამის შესახებ ლევან ბერძენიშვილმა გაერთიანებული ოპოზიციის საარჩევნო შტაბში განაცხადა, სადაც თამარ კორძაიასა და ხათუნა სამნიძესთან ერთად იყო მისული. ამის შესახებ 1tv.ge წერს.
„ჩვენ მოვედით, რომ საპრეზიდენტო არჩევნებში გრიგოლ ვაშაძეს დავუჭიროთ მხარი, გაერთიანებულ ოპოზიციასთან კავშირზე საუბარი არ გვქონია.ახლა საპრეზიდენტო არჩევნებში მხოლოდ ორი არჩევანია. მხარი ან სალომე ზურაბიშვილს ან გრიგოლ ვაშაძეს უნდა დაუჭირო. ყველა სხვა გადაწყვეტილება პოლიტიკური კრახია. პოლიტიკური პარტია, რომელიც საერთოს ამ ორს შორის ვერ პოულობს, ფაქტობრივად, თვითგანადგურების გზას ადგას. ამიტომ, დარწმუნებული ვარ, რომ ზოგიერთები თავიანთ მოსაზრებებს გადახედავენ“, – განაცხადა ლევან ბერძენიშვილმა.
„რაც მთავარია, რესპუბლიკური პარტია და გაერთიანებული ოპოზიცია თანხმდება, რომ ის პოლიტიკური კრიზისი, რომელიც დღეს არის საქართველოში, აუცილებლად უნდა იყოს გამოყენებული იმ სისტემის დემონტაჟისთვის, რომელიც ნებსით, თუ უნებლიეთ ბადებს ერთპროვნულ, ან ერთპარტიულ მმართველობას. ეს არის ჩვენი ბოლო შანსი და ამის ხელიდან გაშვება არ შეიძლება,“ – განაცხადა გრიგოლ ვაშაძემ.
გაერთიანებული ოპოზიციის საარჩევნო შტაბში „რესპუბლიკური პარტიის“ წევრებთან კონსულტაციები გაიმართა. შეხვედრას პრეზიდენტობის კანდიდატი გრიგოლ ვაშაძეც დაესწრო.
საქართველოში საპრეზიდენტო არჩევნები 28 ოქტომბერს გაიმართა.
ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების – 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ – 37,74%.
საპრეზიდენტო არჩევნების მეორე ტური საბოლოო შედეგების გამოცხადებიდან ორი კვირის ვადაში ჩატარდება. სავარაუდო თარიღად კი 2 დეკემბერი სახელდება.
