თბილისის “დინამოს” ვეტერანი ფეხბურთელი და ბიზნესმენი, გოჩა მაჩაიძე უკვე რამდენიმე დღეა, თბილისში, პარლამენტის შენობის წინ, სამართლის აღდგენაში დახმარებას ითხოვს.
სასამართლო პროცესმა, რომელიც უკვე 3 წელია ჭიანურდება, 67 წლის მაჩაიძე სტრესში ჩააგდო. ის უვადო შიმშილობის დაწყებას არ გამორიცხავს.
როგორც მაჩაიძე “გურია ნიუსთან” ჰყვება, 2011 წელს, საბურთალოზე, მიროტაძის ქუჩის #13-ში მრავალსართულიანი კორპუსის აშენება დაიწყო. პირადი სახსრების უქონლობის გამო დახმარება ერთ-ერთ მიკროსაფინანსო ორგანიზაციას სთხოვა, მაგრამ გარიგებიდან ძალიან მალე კომპანიასა და მას შორის დაპირისპირება დაიწყო.
“საზღვარგარეთ ფეხბურთი არ მითამაშია და ბიზნესი არ მქონია, შესაბამისად, ფინანსური შესაძლებლობა, რომ 11-სართულიანი შენობა დამოუკიდებლად ამეშენებინა, არ მქონდა. გამაჩნდა დანაზოგი, რაც დავხარჯე ამ სახლის მშენებლობაში. შემდეგ მივედი მიკროსაფინანსო ორგანიზაცია “სვის კაპიტალთან”. საფინანსოს დირექტორ ჯეიმზ ჯონსთან შევთანხმდი, რომ მომცემდნენ თანხას, მე კი კორპუსს ავაშენებდი. წლის განმავლობაში 48% უნდა გადამეხადა, მე კი თანხა 12 თვის განმავლობაში ტრანშებად უნდა მიმეღო. თუმცა, შეთანხმებიდან 2 თვის შემდეგ, ჯონსონი დეპუტატმა ილია წულაიამ შეცვალა. თანხა მჭირდებოდა და იძულებული გავხდი, ისეთ პირობებს დავთანხმებოდი, რაც ჩემთვის ძნელად მისაღები იყო. არ ვიცოდი, რომ ეს კაცი თვითონ იყო მშენებელი და რადგან კორპუსის ადგილი კარგია, ცხოვრებაში „ფეხის დადებას“ დამიწყებდა”, _ ამბობს მაჩაიძე.
ის იხსენებს, რომ წულაიას დირექტორად დანიშვნის შემდეგ, კომპანიამ 5 თვის განმავლობაში თანხა არ ჩაურიცხა, შემდეგ კი დამატებითი პირობები წაუყენა.
“მშენებლობას სხვადასხვა მიზეზის გამო მიჩერებდა. ხელის შეშლას ცდილობდა. 5 თვის განმავლობაში ტრანშს არ მაძლევდა. შემდეგ ისევ მომცა, მაგრამ პირობა წამომიყენა, რომ ბინა მისი ცოლის სახელზე გამეფორმებინა. თანდათან ფართს უმატებდა და 110 კვ.მ-ის ბინა წაიღო ჩემგან. 1 წელში, მითხრეს, რომ 48%-ის ნაცვლად, სესხი 96%-იანი გახდა. გავოგნდი. სასამართლოსთვის რომ მიმემართა, მშენებლობა შეჩერდებოდა. ამიტომ გადავწყვიტე თანხა სხვა კომპანიასთან მესესხებინა. ნოტარიუს ნინო გინტურისა და ია იაშვილის შუამავლობით იპოთეკარ შაჰრამ შამილ რაჯაბთან კაბალური ხელშეკრულება გავაფორმე – იპოთეკარმა საფინანსოს 810.000 დოლარი გადაუხადა, თუმცა, დოკუმენტში 930 000 დოლარი ჩაწერეს. თან რომ არ მეწვალა, ვითომ პატივი მცეს და ვიღაც ბიჭზე მინდობილობა გამაფორმებინეს”, _ ამბობს მაჩაიძე და აღნიშნავს, რომ იპოთეკური სესხის ნაცვლად, ნოტარიუსმა ნასყიდობის ხელშეკრულების გაფორმება ურჩია.
მაჩაიძე ამბობს, რომ ვალის ნაწილის დაბრუნება არაერთხელ სცადა, თუმცა, მევახშე მასთან შეხვედრაზე უარს ამბობდა. ბოლოს კი 3 მილიონი დოლარის ერთიანად გადახდა მოსთხოვა, რის შემდეგაც თავი მოტყუებულად იგრძნო და სასამართლოს მიმართა.
“რამდენჯერმე მივედი შაჰრამთან, რომ ფული მიმეცა, მაგრამ არ მიმიღო. ნოტარიუსმა მითხრა, შაჰრამი არ მიღებდა, რადგან ცოტა ფული მიმქონდა. ზაფხული იყო და საზღვარგარეთიდან ჩამოსულმა დიასპორამ თავი მოიყარა. მათ დაველაპარაკე და დაბალ ფასებში შევპირდი ბინებს. 600 000 დოლარს რომ მოვუყარე თავი, შაჰრამთან მივედი გადასახდელად, თუმცა, მან უარი თქვა თანხის აღებაზე და 3 მილიონის გადახდა მომთხოვა კორპუსში, როცა მისგან 810 000 დოლარი ვისესხე, კორპუსის მაშინდელი ღირებულება კი 2 მილიონ ნახევარს შეადგენდა. სასამართლოში სარჩელი შევიტანე, რომ მომატყუეს”, _ ამბობს მაჩაიძე.
ის სასამართლომ დაზარალებულად ცნო, თუმცა, იპოთეკარი შაჰრამ შამილ რაჯაბი, 3 მილიონის გადახდას მისგან ისევ ითხოვს. სასამართლო პროცესზე კი, რომელიც დღემდე გრძელდება, მაჩაიძის თქმით, წულაიას სათანადო დოკუმენტაცია არ მიაქვს.
თბილისის “დინამოს” ვეტერანი ფეხბურთელი არ გამორიცხავს, რომ მის შვილს საფრთხე დაემუქროს, თუმცა, ბრძოლას სამართლიანობის აღსადგენად მაინც აგრძელებს.
“სასამართლომ დაზარალებულად მცნო. ამის მიუხედავად, შაჰრამ შამილ რაჯაბმა 3 მილიონის გადახდა დაუყონებლივ მომთხოვა. არც ბინების გაყიდვის საშუალებას მაძლევს. ყველაფერს ცდილობენ, რომ კორპუსი წამართვან. შიმშილით მკლავენ. ყველანაირად შემბოჭეს. ახლა პენსიონერი ვარ, 3 წლის წინ პენსიაც არ მქონდა. წულაიას სასამართლოში მოსამართლის მიერ დავალებული საბუთები არ მოაქვს. შევხვდი მურუსიძეს. დახმარება ვთხოვე, რომ სასამართლო პროცესი დაჩქარებულიყო. 7 სხდომა ძალიან მცირე ინტერვალებით დაინიშნა, მაგრამ ამ 7-იდან 6 გადაიდო. ხან დარბაზი არ არის, ერთხელ ერთ-ერთმა ბრალდებულმა ვერ შეძლო ჩამოსვლა ცუდი მეტეოროლოგიური პირობების გამო. 4 მაისს არის პროცესი ჩანიშნული, თუმცა, დარწმუნებული ვარ, რომ კიდევ გადაიდება. 3 შვილი მყავდა. 2 გარდამეცვალა. 1 ბიჭი დამრჩა. არ გამოვრიცხავ, რომ მას შეუქმნან პრობლემები. მაგრამ ჩემს სიმართლეს ვიტყვი. მესამე დღეა აქ ვარ. თუ პასუხი არ მექნა, აქ დავაფენ „ადიალას“ და გამოვაცხადებ უვადო შიმშილობას. პასუხი ყველამ უნდა აგოს”, _ ამბობს მაჩაიძე.
