პოლიტიკური გაერთიანება „ქართული ოცნება-დემოკრატიული საქართველოს“ თავმჯდომარე ბიძინა ივანიშვილი, დღეს, სასტუმრო “პარაგრაფში” მმართველი პარტიის გურიის ორგანიზაციების წევრებს შეხვდა.
შეხვედრაზე, რომელსაც „ქართული ოცნება – დემოკრატიული საქართველოს“ ოზურგეთის საოლქო ორგანიზაციის თავმჯდომარე მერაბ ჭანუყვაძე, „ქართული ოცნების“ გურიის რეგიონული ორგანიზაციების ხელმძღვანელები, შტაბის წევრები, გურიის სახელმწიფო რწმუნებული ზურაბ ნასარაია, ლანჩხუთი მერი ალექსანდრე სარიშვილი, ჩოხატაურის მერი ირაკლი კუჭავა, ოზურგეთის საკრებულოს თავმჯდომარე დავით დარჩია, ჩოხატაურის საკრებულოს თავმჯდომარე ზაალ მამალაძე და ლანჩხუთის საკრებულოს თავმჯდომარე ბესიკ ტაბიძე პარტიულ აქტივთან ერთად ესწრებოდნენ, რეგიონის პრობლემები განიხილეს და სამომავლო გეგმებზეც ისაუბრეს.
ჩვენი წყაროს თქმით, შეხვედრაზე ერთ-ერთი მთავარი თემა, ოზურგეთის მერის საქმიანობა და მის მიერ “ნაციონალური მოძრაობის” წევრების დასაქმება იყო:
_ ძალიან მნიშვნელოვანი შეხვედრა იყო და ვფიქრობთ, შედეგი აუცილებლად მოყვება. ბიძინა ივანიშვილს ის რეალობა დავანახეთ, რაც ოზურგეთშია. ვუთხარით, რომ მასიურად ხდება “ნაციონალური მოძრაობის” აქტივისტების დასაქმება, “ქართული ოცნების” წევრების დევნა. არც ის დაგვიმალავს, რომ ხელისუფლების და პირადად ბიძინა ივანიშვილის მაგინებელი პირები მაღალანაზღაურებად თანამდებობებზე ჰყავს დასაქმებული, _ გვითხრა შეხვედრის ერთ-ერთმა მონაწილემ.
კიდევ ერთი მონაწილე ამბობს, რომ ივანიშვილს ოზურგეთში არსებული რეალობის შესახებ ინფორმაცია არ ჰქონდა:
_ ძალიან გაკვირვებული დარჩა. არ იცოდა თუ ასეთი სიტუაცია იყო. არ იცოდა, რომ ოზურგეთის მერის შესაძლო დანაშაულზე რამდენიმე უწყებაში მიმდინარეობს გამოძიება, რომ მმართველი პარტიის წევრები იდევნებიან და გაუსაძლის მდგომარეობაში არიან. გულდასმით მოგვისმინა და აღნიშნა, რომ ყველაფერი სასწრაფოდ უნდა გამოსწორდეს, _ გვითხრა წყარომ.
მისივე თქმით, ერთადერთი ადამიანი დარბაზში, ვინც ოზურგეთის მერის დაცვა სცადა, გურიის გუბერნატორი იყო, რომელმაც მერიის ერთ-ერთ თანამშრომელს, როცა იგი კონკრეტულ ფაქტებს ჰყვებოდა “ნაციონალური მოძრაობის” გაძლიერების შესახებ, სიტყვა შეაწყვეტინა და აღნიშნა, რომ მსგავს ფაქტს ადგილი არ ჰქონია:
_ ნასარაიას რეპლიკას, რომ შარაშენიძე “ნაციონალური მოძრაობის” გაძლიერებით არაა დაკავებული, დარბაზში ხმაური მოჰყვა. ოზურგეთის აქტივმა, ყველამ, აღნიშნა, რომ გუბერნატორი არ ამბობდა სიმართლეს. არავის დაუხევია უკან და იქვე, ბიძინა ივანიშვილის თანდასწრებით, ნასარაიას ხმა აღარ ამოაღებინეს. უფრო მეტიც, კონკრეტული გვარები და ფაქტები დაასახელეს, _ გვითხრა წყარომ.
როგორც გავარკვიეთ, “ოცნების” ოზურგეთის რაიონული ორგანიზაციის წევრებს ბიძინა ივანიშვილთან პერსონალური შეხვედრებიც ჰქონდათ, სადაც უფრო დეტალურად ესაუბრნენ არსებულ პოლიტიკურ სიტუაციაზე და კონკრეტული ფაქტები გააცნეს.
ჩვენ შევეცადეთ ამ შეხვედრის შესახებ ოფიციალური კომენტარები შეხვედრაშ მონაწილე პირებისგან მიგვეღო, თუმცა, ტელეფონს არავინ პასუხობს.
