მთავრობის ადმინისტრაციის გავრცელებული ინფორმაციით, საქართველოს პრემიერ–მინისტრი ირაკლი კობახიძე, რეგიონული განვითარებისა და ინფრასტრუქტურის მინისტრებთან _ კახა გულედანთან და რევაზ სოხაძესთან ერთად, რეგიონებში სახელმწიფო რწმუნებულებს, აჭარის ავტონომიური რესპუბლიკის მთავრობის თავმჯდომარეს და მუნიციპალიტეტების მერებს შეხვდა.
ოფიციალური ინფორმაციით, მთავრობის მეთაურმა მერებს ადგილობრივი თვითმმართველობის არჩევნებში გამარჯვება მიულოცა და წარმატებები უსურვა.
როგორც ოფიციალურ ინფორმაციაშია აღნიშნული, “პრემიერ–მინისტრმა ყურადღება გაამახვილა თითოეული მუნიციპალიტეტის სისტემურად განვითარებაზე, როგორც მთავრობის ერთ–ერთ უმთავრეს პრიორიტეტზე. საუბარი შეეხო ქვეყნის განვითარების ახალ ათწლიან სტრატეგიას 2026-2035 წლებისთვის და დოკუმენტზე მუშაობის პროცესში მუნიციპალიტეტების აქტიური ჩართულობის აუცილებლობას. მთავრობის მეთაურმა ხაზგასმით აღნიშნა, რომ ახალ ინიციატივებზე მუშაობისას სრულად უნდა იყოს გათვალისწინებული მოსახლეობის საჭიროებები.
პრემიერ–მინისტრმა განსაკუთრებული ყურადღება დაუთმო რეგიონებში მიმდინარე პროექტების კეთილსინდისიერად განხორციელების მნიშვნელობას და სახელმწიფო რწმუნებულებსა და მუნიციპალიტეტების მერებს მიმდინარე სამუშაოების აქტიური კონტროლისკენ მოუწოდა.
ირაკლი კობახიძემ ასევე ისაუბრა ცენტრალური და ადგილობრივი ხელისუფლების მჭიდრო კოორდინაციის მნიშვნელობაზე და მუნიციპალიტეტების მერებს სრული მხარდაჭერა დაუდასტურა“.
შეხვედრას მთავრობის ადმინისტრაციის უფროსი ლევან ჟორჟოლიანი დაესწრო.
გარდა ამისა, შეხვედრას ესწრებოდნენ ოზურგეთის, ჩოხატაურის, ლანჩხუთის მერები და სახელმწიფო რწმუნებული გურიის მხარეში გიორგი ღურჯუმელიძე.
ოფიციალური ინფორმაციით, ირაკლი კობახიძე აცხადებს, რომ ქვეყნის განვითარების მოქმედი სტრატეგია იყო შედგენილი 2030 წლის ჩათვლით. რაც შეეხება ახალ სტრატეგიას, ის მომზადდება მომდევნო ათწლიანი პერიოდისთვის _ 2026-2035 წლებისთვის.
“ქვეყნის განვითარების მოქმედი სტრატეგია იყო შედგენილი 2030 წლის ჩათვლით. ახალ სტრატეგიას რაც შეეხება, ის მომზადდება მომდევნო ათწლიანი პერიოდისთვის – 2026-2035 წლებისთვის. შესაბამისად, აქ იქნება შემდეგი ათი წლისთვის ასახული პრიორიტეტები. რაც შეეხება თვითონ დოკუმენტის შინაარსს, ამაზე გვექნება საუბარი მინისტრებთან ერთად. ეს უნდა იყოს ძალიან ლაკონური დოკუმენტი, კომპაქტურად უნდა იყოს წარმოდგენილი თითოეული პრიორიტეტი. ჩვენ ზუსტად უნდა ვიცოდეთ, დღევანდელი დღიდან რა შედეგზე უნდა გავიდეთ 10 წელიწადში. ამას კონკრეტული ვადებით დაერთვება სამოქმედო გეგმა. ეს ძალიან ლაკონური, კომპაქტური დოკუმენტი იქნება, სადაც ზუსტად განისაზღვრება ის შედეგები, რასაც უნდა მიაღწიოს ქვეყანამ 10-წლიან პერსპექტივაში“, _ განაცხადა პრემიერმა.
შეხვედრის შესახებ “გურია ნიუსი” ჩოხატაურის მუნიციპალიტეტის მერს, მინდია ჟღერიას ესაუბრა.
“პრემიერმა მოგვილოცა და შემდგომ საქმიანობაში წარმატებები გვისურვა. ეს იყო შეხვედრის მთავარი არსი და გვითხრა, რომ უფრო მეტად მუნიციპალიტეტების საჭიროებებზე, ხედვებზე შემდგომშიც იქნება არაერთი შეხვედრა“, _ გვეუბნება შეხვედრის შესახებ მინდია ჟღერია.
_ ბატონო მინდია, ოფიციალურად გავრცელებულ ინფორმაციაში აღნიშნულია რომ პრემიერმა მერებს კონკრეტული დავალებები მისცა. მათ შორის, პროექტების კეთილსინდისიერად განხორციელების შესახებ. ამასთან დაკავშირებით რას გვეტვით?
_ რასაკვირველია, პროექტების კეთილსინდისიერად გახორციელებას კანონიც გვავალდებულებს, მოვალეობაც და კიდევ ერთხელ გაამახვილა პრემიერმა ამაზე ყურადღება. ქვეყანა ვერ განვითარდება, თუ ყველამ კეთილსინდისიერად არ იმოქმედა. ეს ბიზნესის სექტორის წარმომადგენელი იქნება, სახელმწიფო მოხელე თუ რიგითი მოქალაქე.
_ ბატონო მინდია, უნდა გკითხოთ ასევე შეხვედრის ერთ–ერთ საკითხზე, რომელიც მოსახლეობის საჭიროებების გათვალისწინებას შეეხებოდა. ამ კუთხით რას აპირებთ?
_ ზოგადად ჩვენს ხელისუფლებას, ეს ცენტრალური იქნება თუ ადგილობრივი, ჩვენს მოსახლეობასთან კომუნიკაციის პრობლემა არასდროს არ გვქონია. ვაპირებთ, რომ აქტიურ რეჟიმში ვითანამშრომლოთ თითოეულ მოქალაქესთან მათი საჭიროებების მიხედვით მოხდეს დაგეგმვა შემდგომი პროექტების, პროგრამების და ნებისმიერ დროს, ნებისმიერ მოქალაქეს შეუძლია ამომწურავად მიიღოს პასუხი მიმდინარე პროექტზე.
_ რომელი საზოგადოებრივი საჭიროება არის ამ დროისთვის უმთავრესი პრიორიტეტი ჩოხატაურის მუნიციპალიტეტში?
_ არაერთი მიმართულება და პრიორიტეტია. ეს საგზაო ინფრასტრუქტურას, ახალგაზრდულ სივრცეებს, სპორტულ თუ მოსასვენებელ სივრცეებს შეეხება. ამ საკითხებზე დაწყებული გვაქვს მუშაობა და შედეგებიც შესაბამისი გვექნება.
_ რაც შეეხება განვითარების ახალ სტრატეგიას, რაც 2026-2035 წლების პერიოდს მოიცავს, თუ არის გამოკვეთილი პრიორიტეტული პროექტები სისტემური განვითარებისთვის?
_ კიდევ ერთხელ აღვნიშნავ, რომ ამაზე უკვე ვიწყებთ მუშაობას. ჩოხატაურის მუნიციპალიტეტში ეს შეეხება მცირე ბიზნესის განვითარებას, ტურიზმის განვითარებას და პოპულარიზაციას, სხვადასხვა ინფრასტრუქტურულ პროექტებს, რომელთა ნაწილი წინა წლებში გახორციელდა და შემდგომშიც არაერთი ინფრასტრუქტურული პროექტი გახორციელდება. აქედან გამომდინარე ეს მასშტაბური სამუშაოა. ერთი სიტყვით რთული იქნება ამ ყველაფერზე ამომწურავი პასუხის გაცემა თუმცა როცა დოკუმენტზე დაიწყება აქტიური მუშაობა და გეგმა დაიდება, საზოგადოებისთვის იქნება ცნობილი.
ცნობისთვის, კობახიძის წინამორბედმა, ამჟამად ბრალდებულმა ირაკლი ღარიბაშვილის მთავრობამ 2023 წელს დაამტკიცა საქართველოს განვითარების სტრატეგია “ხედვა _ 2030”.
ავტორი
