გუშინ ბელგიურმა გამოცემამ „Voetbalkrant“ გაავრცელა ინფორმაცია რომ „გენტი“ კვლავ იჯარით გაანათხოვრებს გიორგი ჩაკვეტაძეს, რომელსაც გუნდთან ხელშეკრულება კიდევ ერთი წლით აკავშირებს.
„ყველაფერი გაირკვა ოსმან ბუკარისა და გიორგი ჩაკვეტაძის შემთხვევაში. ბუკარი საბოლოოდ დატოვებს გუნდს, ჩაკვეტაძე კი ისევ იჯარით წავა,“ – დაწერა გამოცემამ.
დღევანდელი გადასახედიდან ყველაზე რეალურად მოჩანს გიორგი ჩაკვეტაძის დაბრუნება თბილისის „დინამოში“. ალბათ ეს ვარიანტი გიორგისაც უნდა აძლევდეს ხელს. მას საშუალება მიეცემა, მშობლიურ გარემოში აღიდგინოს სათამაშო ფორმა.
გუშინ ცნობილი გახდა რომ საქართველოს ნაკრების თავდამსხმელმა თორნიკე ოქრიაშვილმა ნიქოზიის „აპოელი“ დატოვა. მოთამაშემ „აპოელთან” კონტრაქტი ურთიერთშეთანხმების საფუძველზე შეაჩერა.
„ვუსურვებთ თორნიკეს წარმატებას პროფესიონალურ კარიერასა და პირად ცხოვრებაში,“ – გაავრცელა განცხადება „აპოელმა“.
გუშინ ესპანურმა გამოცემამ „Superdeporte.es“ „ვალენსიას“ სპეციალური წერილი მიუძღვნა და გიორგი მამარდაშვილის თემასაც შეეხო.
„გიორგი მამარდაშვილი „ვალენსიაში“ სარეზერვო გუნდის გასაძლიერებლად გადმოვიდა, მაგრამ წინასასეზონო ეტაპი ძირითად გუნდში ადგილის დამკვიდრებაში დაეხმარა. სილესენის ტრავმებისა და მისი ბრწყინვალე თამაშის გამო, იგი სეზონის სტარტზევე სასტარტო შემადგენლობაში მოგვევლინა.
გიორგიმ ძირითადში ადგილი შუა სეზონში ჩატარებული სუსტი მატჩების შემდეგ დაკარგა, თუმცა ბორდალასმა შანსი კიდევ ერთხელ მისცა და ამის შემდეგ, მისი სათადარიგოთა სკამზე გადაყვანა ვერავინ და ვერაფერმა მოახერხა. ამბობენ, რომ ის არის მეკარე, რომელიც „ვალენსიას“ კარის დარაჯი დიდი ხნის განმავლობაში იქნება და კლუბი მასთან კონტრაქტის გახანგრძლივებაზე უკვე მუშაობს. არადა, იგი ერთი წლის წინ გაიფორმა. გიორგის გადაბირებით პრემიერ ლიგის კლუბები ინტერესდებიან, მაგრამ მას „ვალენსიაში“ დარჩენა და კლუბში პროგრესის მიღწევა სურს“, – დაწერა გამოცემამ.
იტალიური გამოცემა „La Repubblica“-ს მტკიცებით, კრიშტიანუ რონალდუმ შესაძლოა უახლოეს მომავალში „მანჩესტერ იუნაიტედი“ დატოვოს. ამ ეტაპზე მისი გადაბირებით „რომა“ ინტერესდება.
პორტუგალიელი თავდამსხმელი არ ჯდება იმ სათამაშო სისტემაში, რომლის დანერგვასაც „მანჩესტერ იუნაიტედში“ ახალი მწვრთნელი ერიკ ტენ ჰაგი გეგმავს. ამის გარდა, „იუნაიტედი“ მომავალ სეზონში ჩემპიონთა ლიგაზე არ ითამაშებს. ცნობილი გახდა რომ შემტევის საფეხბურთო აგენტი ჟორჟე მენდეში კლიენტისთვის ახალი კლუბის ძიებით არის დაკავებული.
37 წლის რონალდოთი იტალიური „რომა“ ინტერესდება. კლუბში მიაჩნიათ, რომ რონალდუს ტრანსფერი დიდად დაეხმარება „რომას“ ბრენდის განვითარებას და მის ხილვადობას.
რონალდუსთვის მნიშვნელოვანი როლი იტალიის საგადასახადო რეჟიმმა შეიძლება შეასრულოს – ის ბევრად უფრო რბილია, ვიდრე ევროპის სხვა ქვეყნებში. თუმცა, რონალდუს „რომაში“ შესაძლო ტრანსფერის დაბრკოლებები არსებობს. ჯერ ერთი, რომაელები ვერ გადაუხდიან მას წელიწადში 23 მილიონ ევროს, რომელსაც „მანჩესტერ იუნაიტედში“ იღებს. მეორეც, „რომა“ ისევე როგორც „მანჩესტერ იუნაიტედი“, მომავალ სეზონში „ევროპის ლიგაზე“ ითამაშებს. ეს ტურნირი რონალდუს არ იზიდავს.
პორტუგალიელის კარიერის გაგრძელების კიდევ ერთი ვარიანტი ლისაბონის „სპორტინგში“ დაბრუნებაა, რომელიც „ჩემპიონთა ლიგაზე“ ითამაშებს.
მილანის „ინტერი“ კი რომელუ ლუკაკუს ტრანსფერზე მუშაობას აგრძელებს. მოლაპარაკება წარმატებით მიმდინარეობს და იტალიური კლუბი ბელგიელი ფორვარდის დამატებაში დარწმუნებულია.
გამოცემა „La Gazzetta dello Sport“-ის მტკიცებით, მხარეებმა შეთანხმებას თითქმის მიაღწიეს, მოლაპარაკება ფინალურ სტადიაზეა და მხოლოდ მცირე დეტალებია გასარკვევი. „ინტერი“ ლუკაკუს იჯარით დამატებაზე მუშაობს. ამ ეტაპზე იტალიური კლუბი ფეხბურთელის გამოსყიდვას არ გეგმავს.
ავტორი
