რა იქნება ლანჩხუთის “გურიასთვის” იდეალური ვარიანტი

საფეხბურთო კლუბ ლანჩხუთის “გურიაზე” არაერთხელ დაგვიწერია, მაგრამ არსებული სიტუაციიდან გამომდინარე, თემა იმდენად აქტუალურია, მაინც გვიწევს მასზე საუბარი, მით უმეტეს, რომ წელს “გურიას” საიუბილეო თარიღი მოდის, თუმცა, 100 წლის იუბილეს კლუბი და გულშემატკივარი ფრიად სამარცხვინო მოვლენების ფონზე ეგებება.

ხუთშაბათს საქართველოს ჩემპიონატის ლიგა 3-ის მორიგი ტური შედგა და “გურია” შინაურ სარბიელზე გარდაბნის “გარდაბანს” მასპინძლობდა.  10 წლის წინ ვინმეს რომ თქვა, ეს გუნდები  ერთ ლიგაში მოხვდებიანო, გიჟს დავუძახებდით, მაგრამ ისიც რომ დაეყოლებინა, გარდაბნელები სამი უპასუხო გოლით მოგვიგებენო, საერთოდ არაფრად ჩავთვლიდით და კაი გვარიან ქოქოლასაც დავაყრიდით.

ჰოდა, აგერ ყველაფერი ცხადში აგვიხდა _ გარდაბანმა 3:0 მოგვიგო, თანაც ისე, რომ გეგონებოდათ, სტუმრები კი არა, მასპინძლები იყვნენ. არადა, აქამდე ბოლო ორ შეხვედრაში თითქოს დადებითი ტენდენციები შეინიშნებოდა ლანჩხუთელთა თამაშში _ ჯერ ამ ლიგის უპირობო ლიდერ “გონიოსთან” კი დამარცხდნენ, თუმცა, თამაშის ხარისხით ტოლი არ დაუდიათ მეტოქისთვის. მერე კიდევ ერთ აჭარულ გუნდთან _ ქედის “ბეთლემთან” სტუმრად იბრძოლეს და იქიდან ქულა წამოიღეს. ჰოდა, ბევრი ელოდა, რომ “გარდაბანთან” “გურია” პირველ მოგებას იგემებდა, თუმცა, სამარცხვინოდ ითამაშა და დიდი ანგარიშითაც დამსახურებულად დამარცხდა.

“ფსკერის ფსკერზე ვართ; საქმე მართლაც ცუდად მიდის, ძნელი იქნება ამის ამოქაჩვა; საერთოდ, ასეთ სიტუაციაში და სამარცხვინოდ ყოფნას ყველაფერი სჯობს; ისეთი გუნდები გვიგებს, საუბარი ზედმეტია _ ჩემი პატივისცემა გარდაბანს, მარა გურია რომ გარდაბანთან წააგებს, თანაც ასე… სახელი შეუცვალეთ “გურიას”, სირცხვილია!”_ წერენ გულნატკენი გულშემატკივრები.

“რა ხდება? ვინმე ხომ იკითხავს, ვინმე თორემ, ბევრს ეს ეტყობა არც ადარდებს რაც ხდება. სხვის გამჭვირვალობაზე ვსაუბრობთ და კლუბში რა ხდება, ეს მიჩქმალულია. ასე იყო 2013-15 წლებშიც, როცა 7 მილიონი დაიხარჯა ბიუჯეტიდან, გუნდი კი უმაღლესიდან მესამე ლიგაში დაქვეითდა. ახლაც არ ვიცით ვინაა “გურიას” ხელმძღვანელი, სტაფში ვინები არიან. ან ძველი უფროსები რად ტრიალებენ გრიგოლეთის ბაზაზე, ან ბუღალტერი რატომაა ისევ იგივე”, _  ამბობს,  საკრებულოს წევრი პარტია “ლელოდან” გოჩა ჯანაშია, რომელიც წლების განმავლობაში ლანჩხუთში სპორტულ სფეროს კურირებდა და ამავდროულად, სპორტულ ჟურნალისტადაც წლები უმუშავია:

“აბა, რა უბედურებაა, როცა 7 ტურში გუნდს ორად-ორი ფრე აქვს, მხოლოდ ერთი გოლი გაიტანა, საკუთარ კარში კი 12 მიიღო? შედეგად მესამე ლიგის ცხრილის ფსკერზე იმყოფება და გასავარდნი ზონიდან 5 ქულა აშორებს,  პროტესტი კი ყველაფერ ამაზე, ფაქტობრივად, არ ჩანს. საუბედუროდ, არსებული რესურსით არც პერსპექტივაა საიმედო. ალექსანდრე კოშკაძის თავკაცობით გუნდის თამაში ვერავითარ კრიტიკას ვერ უძლებს, დაცვა მოშლილია, შუა ხაზი ვერ ალაგებს თამაშს, შემტევი პოტენციალი კი ნულია. ერთი მეკარეებზე ვერ იტყვის კაცი აუგს და ეგაა. არადა, იმდენად რთული ლიგაა წელს, დიდი შანსია გავვარდეთ და ამ 100 წლის თავზე სამარცხვინოდ დავქვეითდეთ და სად? მეოთხე ლიგაში!!!” _ ამბობს ჯანაშია.

მისი თქმით, ყოფილი ფეხბურთელი მერაბ ჟორდანია ლანჩხუთის საფეხბურთო კლუბით დაინტერესდა. როგორც გოჩა ჯანაშია ამბობს, ამ ფაქტს თავად მერაბ ჟორდანიაც ადასტურებს:

“რამდენიმე დღეა, საუბრები დაიწყო კლუბში მერაბ ჟორდანიას მოსვლაზე, თუმცა, ეს ადრეც არაერთხელ ყოფილა. სამწუხაროდ, ამ კაცს არ მიეცა საშუალება, რომ ლანჩხუთის “გურიისთვის” ეთავკაცა და ამაში უამრავი სუბიექტური ფაქტორი იყო ხელისშემშლელი. მე პირადად დავუკავშირდი ბატონ მერაბს და მისგან გავიგე, რომ ახლანდელი საუბრები რეალურია. მისი თქმით, მუნიციპალიტეტის მერთან უკვე შეხვედრა შემდგარა და თანხმობაც მიუღია მისგან, რომ ჩაიბაროს კლუბი. როგორც მერაბმა მითხრა, იგი დღესაც მზადაა საამისოდ, მაგრამ მერიამ ჯერ კლუბის საბუთები უნდა მოაწესრიგოს სახელშეკრულებოდ და ამის შემდეგ შეთანხმებაც შედგება.  აქამდე  სპორტის სამინისტროსგან თანხმობის მოლოდინშია  პროცესი და იმედია ყველაფერი კარგად იქნება.

ჰოდა, ძალიანაც კარგი თუ ასე მოხდება, “სჯობს გვიან, ვიდრე არასდროსო”, _ ნათქვამია და ეს რომ ადრე გვექნა,  ახლა სულ სხვა მიზნები გვექნებოდა, მაგრამ რას ვიზამთ, მოხდა ის, რაც მოხდა და იმედია, ამ ჯერზე ხელისშეშლა არ იქნება და მერწმუნეთ, ეს ის იდეალური ვარიანტია, ამ ეტაპზე მით უმეტეს, რომელსაც ვერც ვინატრებდით, იმიტომ, რომ მერაბ ჟორდანიას ძალიან უყვარს ლანჩხუთი, კლუბი “გურია” და ესეც რომ არა, იგი ის პროფესიონალია, რომელიც საქმეს ხელს თუ მოიკიდებს, აუცილებლად შედეგს დადებს და ჩვენც ეგ გვინდა სწორედ”, _ დასძენს გოჩა ჯანაშია.

საგულისხმოა, რომ “გურიაში” მერაბ ჟორდანიას შესაძლო მოსვლაზე საუბრები არაერთხელ იყო. ბოლოს ეს ინფორმაცია 2020 წლის ნოემბერში გაჟღერდა. ამ ფაქტს მაშინ თავად ჟორდანიაც ადასტურებდა:

“ბოდიში უნდა მოვუხადო ჩემს ლანჩხუთელ გულშემატკივარს, რომ აქამდე კლუბს ყურადღება ვერ მივაქციე. წინა ხელისუფლების დროს, როგორც იცით, არანაირი შანსი არ იყო, კლუბის მიხედვა კი არა, დამიჭირეს. იცით, რამდენიმე წლის წინ მქონდა ინტერესი, მაგრამ მაშინ ეს ამბავი არ გამოვიდა, მიზეზებზე საუბარი არ მსურს”, _ ამბობდა მაშინ მერაბ  ჟორდანია, რომლის გარემოცვასაც კლუბები ჰყავთ ავსტრიასა და ჰოლანდიაში. წლების წინ, იგი ჰოლანდიური კლუბის პრეზიდენტიც იყო.

როგორც მაშინ ითქვა, “გურიაში” მოსვლის თაობაზე მერაბ ჟორდანიას კომუნიკაცია ვასილ ჩიგოგიძესთანაც ჰქონდა და მისგან მხარდაჭერის პირობაც მიიღო. ჟორდანიასთან კლუბთან დაკავშირებით კომუნიკაციის არსებობას თავად ჩიგოგიძეც ადასტურებდა:

“ჩემგან რა მხარდაჭერის პირობა შეეძლო მიეღო, მიიღო.  ჯერჯერობით, ყველაფერი საუბრის დონეზეა. მესაუბრა ამ საკითხზე მერაბი, რომელიც დაინტერესებულია “გურიას” თემით. ის ჩამოსვლას და ადგილზე გეგმავს ყველაფერში გარკვევას. მე შეხვდი კლუბის ამჟამინდელ მმართველობას, რომელთაც გარკვეული პრობლემები აქვთ და რაც, მათი ახსნით, პანდემიის გამო წარმოიშვა. მოკლედ, ჯერჯერობით, ყველაფერი საუბრის დონეზეა და ვნახოთ”, _ გვითხრა მაშინ სატელეფონო საუბრისას გურიის მაჟორიტარმა ვასილ ჩიგოგიძემ.

“გურიაში” მერაბ  ჟორდანიას  მოსვლაზე ინფორმაცია მანამდეც არაერთხელ გაჟღერდა,  თუმცა, ყოველ ჯერზე გარკვეული ხელშეშლა მოხდა. თავად ჟორდანია არასდროს არაფერს ამბობდა, თუ ვინ და რა უშლიდა ხელს  ამ ამბავს,  თუმცა, მთავარ ეჭვმიტანილად ამ საქმეში მაშინდელი მაჟორიტარი დეპუტატი, ნინო წილოსანი სახელდებოდა.

ამ ფაქტს იმით ხსნიდნენ, რომ წილოსანის ოჯახს დავა ჰქონდა ბიზნესმენ ქეთევან ცინცაბაძესთან, რომელიც ჟორდანიას ახლობელია. მაშინ ნინო წილოსანმა ასეთი ალბათობა კატეგორიულად უარყო და აღნიშნა, რომ რაიმე პირადი ინტერესი კლუბთან დაკავშირებით არ ჰქონდა. მან ისიც თქვა, რომ ჟორდანია იქნება თუ სხვა, კლუბში რამდენიმე მილიონი უნდა მოიტანოს. მაშინ დეპუტატის ეს პოზიცია ბევრმა მის პირად ინტერესად აღიქვა.

2017 წლის ზაფხულში  ლანჩხუთის მუნიციპალიტეტის საკრებულოს მაშინდელმა  სამანდატო, საპროცედურო, იურიდიულ საკითხთა და ეთიკის კომისიამ ერთ-ერთ სხდომაზე  განიხილა კიდეც  “გურიაში” მერაბ ჟორდანიას შესაძლო მოსვლის საკითხი და მაშინ კომისიის თავმჯდომარემ, რომან ბიწაძემ თქვა, რომ ჟორდანიას კლუბში მოსვლას ადგილზე ხელს უშლიან:

“ჟორდანიასა და მის კომპანიას “გურიაში” მოსვლის საკითხი ფეხბურთის ფედერაციასა და ხელისუფლების ზედა ეშელონებშიც გარკვეულია და მათი მხრიდან, ამ მხრივ, არანაირ წინააღმდეგობას ადგილი არ აქვს, ერთადერთი ლანჩხუთის ხელმძღვანელობისგან არ აქვთ კონკრეტული პასუხი მიღებული”, _ ამბობდა მაშინ რომან ბიწაძე.