რა ქონებას ფლობს ოზურგეთის რაიონული სასამართლოს თავმჯდომარე

ოზურგეთის რაიონული სასამართლოს თავმჯდომარეს ბიძინა სტურუას ოჯახის საკუთრებაში ორი ბინაა, ბათუმსა და თბილისში.

კერძოდ, ბიძინა სტურუა ფლობს ბათუმში, ჯავახიშვილის ქუჩაზე მდებარე  53.00 კვ.მ-ის ფართობისა და თბილისში, თამაზ ნადარეიშვილის ქუჩაზე მდებარე 73.80 კვ.მ-ის ფართობის ბინებს. ხოლო მისი მეუღლის, რუსუდან ბერიძის 100%-იან საკუთრებაშია 2002 წელს გამოშვებული მსუბუქი ავტომანქანა Toyota rav 4.

რაც შეეხება ოჯახის ფინანსურ მდგომარეობას, როგორც 2016 წლის 12 დეკემბერს შევსებული დეკლარაციიდან ირკვევა, ბიძინა სტურუას ოზურგეთის რაიონული სასამართლოდან (მოსამართლე) 73 600.00 ლარის შემოსავალი, ხოლო მეუღლეს, რუსუდან ბერიძეს ხელვაჩაურის რაიონული სასამართლოდან, სადაც ის სხდომის მდივანია 8492.00 ლარი მიუღია.

დეკლარაციის შევსების მომენტში ბიძინა სტურუას “თი–ბი–სი ბანკის” სახელფასო  ანგარიშზე 14.90 ლარი; „საქართველოს ბანკის“ სახელფასო ანგარიშზე – 4.98 ლარი; “თი–ბი–სი ბანკის” ანაბარზე 25.05 ევრო; ხოლო საქართველოს ბანკის მიმდინარე ანგარიშზე 1335.17 დოლარი ჰქონდა.

მისი მეუღლის ანგარიშზე საქართველოს ბანკში კი თანხა არ ირიცხებოდა.

გარდა ამისა, დეკლარაციაში აღნიშნულია, რომ ბიძინა სტურუას ბათუმში ბინის შესაძენად 2013 წელს საქართველოს ბანკიდან 37000.00-ლარიანი სესხი გამოუტანია, რომლის ვადაც 2017 წელს იწურება. გასულ წელს კი, ბანკისთვის პროცენტის დასაფარად 6000.00 ლარი გადაუხდია.

რაც შეეხება თბილისში მდებარე ბინას, ამავე დეკლარაციის თანახმად, ბიძინა სტურუას ის 2015 წელს შეუძენია; „საქართველოს ბანკიდან“ კი ამისთვის 48500.00-დოლარიანი სესხი აქვს გამოტანილი, რომლის გასტუმრების ვადაც 2025 წელს იწურება. 

ცნობისთვის, ბიძინა სტურუა 1980 წლის 17 ივლისს  ქუთაისში დაიბადა.

1997 წელს დაამთავრა ქუთაისის №1 საშუალო სკოლა;

2002 წელს  დაამთავრა ქუთაისის აკაკი წერეთლის სახელმწიფო უნივერსიტეტის იურიდიული ფაკულტეტი;

2005 წელს დაამთავრა საქართველოს მეცნიერებათა აკადემიის თინათინ წერეთლის სახელობის სახელმწიფოსა და სამართლის ინსტიტუტის ასპირანტურა;

2005 წელს დაამთავრა მიუნსტერის (გერმანიის ფედერაციული რესპუბლიკა) ვესტფალური ვილჰელმის უნივერსიტეტის იურიდიული ფაკულტეტის მაგისტრატურა და მიენიჭა სამართლის მაგისტრის ხარისხი;

2001-2002 წლებში წითელი ჯვრის საერთაშორისო კომიტეტის მხარდაჭერით უძღვებოდა სემინართა კურსს საქართველოს შეიარაღებული ძალების ჯარისკაცებისა და ოფიცრებისათვის;

2010 წლის სექტემბრიდან 2011 წლის სექტემბრამდე იყო იუსტიციის უმაღლესი სკოლის მსმენელი;

2012-2013 წლებში კითხულობდა ლექციების კურსს ბათუმის შოთა რუსთაველის სახელმწიფო უნივერსიტეტში;

რაც შეეხება სამუშაო გამოცდილებას, როგორც საქართველოს იუსტიციის უმაღლესი საბჭოს ვებ-გვერდზე განთავსებული ინფორმაციიდან ირკვევა, მან 2006 წელს ჩათვლით გაიარა სტაჟირება ქუთაისის სააპელაციო სასამართლოში;

2006-2010 წლებში მუშაობდა ქუთაისის სააპელაციო სასამართლოს მოსამართლის თანაშემწედ;

2006-2010 წლებში მუშაობდა ქუთაისის სამართლისა და ეკონომიკის უნივერსიტეტში ასოცირებულ პროფესორად;

2011-2012 წლებში იყო ხელვაჩაურის რაიონული სასამართლოს მოსამართლე;

2012 წლის დეკემბრიდან გათავისუფლდა ხელვაჩაურის რაიონული სასამართლოს მოსამართლის თანამდებობიდან და თავისი სამოსამართლო უფლებამოსილების ვადის ფარგლებში დაინიშნა ოზურგეთის რაიონული სასამართლოს მოსამართლედ;

2013 წლის მარტიდან დაინიშნა ოზურგეთის რაიონული სასამართლოს თავმჯდომარედ.