ჩოხატაურში, მიუსაფარი აგრესიული ძაღლების რაოდენობა გაიზარდა _ ამასთან დაკავშირებით “გურია ნიუსს” არაერთი მოქალაქე უკავშირდება.
ერთ-ერთი მათგანი ფოტოსაც გვიგზავნის და ამბობს, რომ რამდენიმე დღის წინ, დილის საათებში, ტექნიკის მაღაზიის წინ, მამაკაცმა, ქოლგით ძლივს მოიგერია შავი, მოზრდილი ძაღლი. როგორც გვითხრეს, ეს ძაღლი განსაკუთრებული აგრესიულობით გამოირჩევა.
რა ზომებს იღებს მუნიციპალიტეტის მერია მიუსაფარ ძაღლებთან დაკავშირებით _ ამის გასარკვევად ჩოხატაურის მერს, დავით შარაშიძეს ვესაუბრეთ.
შარაშიძე გვეთანხმება, რომ ჩოხატაურში მიუსაფარი ძაღლებით გამოწვეული პრობლემა მართლაც დგას.
მერი იმასაც აღნიშნავს, რომ ერთი ძაღლის გადაყვანა სპეცდაწესებულებაში, აცრა, ჯანმრთელობის მდგომარეობის შემოწმება 120 ლარი ჯდება. თუმცა, მისი თქმით, რა კანონიც არ უნდა შეიმუშაოს ხელისუფლებამ, საზოგადოების ცნობიერების ამაღლების გარეშე პრობლემა ვერ აღმოიფხვრება:
“მუნიციპალიტეტში მიუსაფარი ძაღლების ძალიან დიდი პრობლემაა. არა ერთ ადამიანს მოუმართავს თხოვნით და არა ერთი წერილი შემოსულა არამარტო დაბის მცხოვრებლებიდან, არამედ სხვადასხვა სოფლიდან. ყველას აწუხებს ეს პრობლემა. ზოგი ძაღლი საკმაოდ აგრესიულია და საღამოს საათებში სიარულისას მოსახლეობას საფრთხე ექმნება. ამის გამო ჩვენ, ერთადერთი, რაც შეგვიძლია გავაკეთოთ და ვაკეთებთ, ვუკავშირდებით სპეციალურ სამსახურს _ ოზურგეთში არის ასეთი ორგანიზაცია, რომელსაც ვურეკავთ, სადაც ერთი ძაღლის წაყვანა, აცრის გაკეთება და შემოწმება ღირს 120 ლარი.
ეს კომპანია ემსახურება გურიის სამივე მუნიციპალიტეტს. ჩამოდიან, მიჰყავთ ძაღლები, მაგრამ, სამწუხაროდ, სამ დღეზე მეტ ხანს ვერ აჩერებენ და ისევ უკან, ქუჩაში აბრუნებენ. ამით ვერ გვარდება ეს პრობლემა. ამით გვარდება ის, რომ ცრიან და ადგენენ, საშიშია თუ არა ძაღლი საზოგადოებისთვის.
აქვე დავამატებდი იმასაც, რომ მარტო ხელისუფლება, მთავრობის წარმომადგენლები ვერ გადავჭრით ამ პრობლემას, თუ საზოგადოების თვითშეგნება არ გაიზარდა. უშვებენ ძაღლებს და ტოვებენ ქუჩაში. ადამიანს თუ ძაღლი რაღაც მიზეზის გამო არ უნდა, არ უნდა გამოუშვას ქუჩაში, უნდა წაიყვანოს თავშესაფარში და იქ ჩააბაროს. თავშესაფარი გურიაში არ არის, მაგრამ სხვა რეგიონში ხომ არის?! ეს ძაღლი ხომ თავისით არ ჩნდება ქუჩაში _ ვიღაც აგდებს, ვიღაც უშვებს. რაც არ უნდა კანონი შევიმუშაოთ, თუ საზოგადოებამ მხარი არ დაგვიჭირა, ისე არაფერი გამოვა”, _ ამბობს დავით შარაშიძე და აღნიშნავს, რომ იმ საკითხზე სასაუბროდ, რაც მარტო ჩოხატაურს არ აწუხებს და ოზურგეთისა და ლანჩხუთის მუნიციპალიტეტშიც აქტუალური პრობლემაა, მერებს არა ერთი შეხვედრა გაუმართავთ.
შარაშიძის თქმით, ძაღლების ინტერმუნიციპალური თავშესაფრის აშენება იგეგმება, მაგრამ ეს დიდ თანხასთან არის დაკავშირებული:
“არა ერთი შეხვედრა ჩაგვიტარებია სამივე მუნიციპალიტეტის მერს. ვფიქრობთ, რომ შევქმნათ ძაღლების ინტერმუნიციპალური თავშესაფარი, რომელიც მოემსახურება რეგიონს. ასეთი კახეთის რეგიონშია, არის თბილისში. ამ მიმართულებით ვმსჯელობთ, მაგრამ ეს დაკავშირებულია დიდ თანხებთან. ეს თანხები ჯერ, სამწუხაროდ, არ გაგვაჩნია. ვფიქრობთ, გრანტების მოპოვებით, თანადაფინანსებით გასვლას”, _ ამბობს შარაშიძე.
სანამ გურიის მუნიციპალიტეტების მერები იდეაში მყოფ თავშესაფარს ააგებენ და შიგ მიუსაფარ ძაღლებს განათავსებენ, შეშინებული მოსახლეობა სვამს კითხვას _ რა მნიშვნელობა აქვს მათთვის, აცრილი ძაღლი დაესხმება თავს თუ აუცრელი?!
“რა მნიშვნელობა აქვს, აცრილი ძაღლი დამესხმება თავს თუ აუცრელი?! ეგეც ნაკლებ სარწმუნოა, ამუშავებენ ძაღლებს დაავადებებზე თუ არა. დანომრავენ და გამოუშვებენ. გაუკეთონ კასტრაცია. ნუღარ გაამრავლებენ კიდევ უფრო მეტად”, _ ამბობენ ისინი და საკითხის დაუყოვნებლივ გადაწყვეტას ითხოვენ.
ავტორი
